សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ បុរសវ័យចំណាស់ម្នាក់ជិះម៉ូតូឌ្រីមសង់ ត្រូវរថយន្តសាំយ៉ុងបុកពីមុខពេញទំហឹងក្នុងទិសដៅច្រាស់ទិសគ្នាបណ្តាលឲ្យស្លាប់ភ្លាមៗនៅនឹងកន្លែង។
ហេតុការណ៍គ្រោះថ្នាក់ចរាចរណ៍គួរឲ្យរន្ធត់នេះ បានកើតឡើងកាលពីវេលាម៉ោង១១និង៤៣នាទីព្រឹក ថ្ងៃសុក្រ ២រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២ ខែកុម្ភៈ ឆ្នាំ២០១៨ នៅតាមបណ្តោយផ្លូវជាតិ៦ ចំណុចផ្លូវចូលវត្តអូរសារ៉ាយ ស្តិតនៅភូមិថ្មី ឃុំប្រឡាយ ស្រុកស្ទោង ខេត្តកំពង់ធំ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តសាំយ៉ុង ពណ៌លឿង ស្លាកលេខភ្នំពេញ2AE 5874ចេញពីជើងទៅត្បូងហើយគេឃើញបុរសម្នាក់ជិះម៉ូតូឌ្រីមសង់ ពណ៌ខ្មៅ សេរីឆ្នាំ២០១៣ស្លាកលេខ កំពង់ធំ1G 1578ចេញពីត្បូងទៅជើងទិសដៅបញ្ច្រាស់ទិសគ្នា លុះដល់កន្លែងកើតហេតុ មិនដឹងរថយន្តវ៉ាក់អឺនឹងអីឲ្យពិតប្រាកដក៍ទៅបុកអ្នកជិះម៉ូតូពេញទំហឹងបណ្តាលឲ្យបុរសអ្នកជិះម៉ូតូស្លាប់ភ្លាមៗនៅនឹងកន្លែងកើតហេតុ ។ ចំណែកតៃកុងរថយន្តចុះរត់គេចខ្លួនបាត់ស្រមោល។
ជនរងគ្រោះឈ្មោះចាន់ ចូច ភេទប្រុស អាយុ៥០ឆ្នាំ ទីលំនៅភូមិគោក វៀង ឃុំប្រឡាយ ស្រុកស្ទោង ខេត្តកំពង់ធំ។
ក្រោយកើតហេតុសមត្ថកិច្ច ចុះវាស់វែងធ្វើកំណត់ហេតុ និងប្រគល់សាកសពជនរងគ្រោះជូនប្រពន្ធកូនយកទៅធ្វើបុណ្យតាមប្រពៃណី ។ ចំណែកវត្ថុតាងរថយន្ត និងម៉ូតូប៉ូលិសចរាចរណ៍ស្រុកស្ទោងយកទៅរក្សារទុកនៅអធិការស្រុកដើម្បីរង់ចាំដោះស្រាយនាពេលក្រោយ៕ ប៊ុន រិទ្ធី
