សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្រជាពលរដ្ឋនិងកម្លាំងកងរាជអាវុធហត្ថខណ្ឌទួលគោក បាននាំគ្នាដេញតាមចាប់យុវជន២នាក់ រួមនិងដកហូតបានកាំភ្លើងខ្លីកែច្នៃហ្គាសប្រើហ្គាសមួយដើម ក្រោយពីពួកគេបានធ្វើសកម្មភាពដេញបាញ់យុវជន៥នាក់ទៀត ដែលកំពុងជិះម៉ូតូ៤គ្រឿង បង្កឲ្យផ្អើលដល់សមត្ថកិច្ចនិងប្រជាពលរដ្ឋ ឃាត់ខ្លួននិងវាយម្នាក់មួយដៃមួយជើងរងរបួសធ្ងន់ រួចទើបប្រគល់ឲ្យកងរាជអាវុធហត្ថខណ្ឌទួលគោក ចាត់ការតាមច្បាប់ ។
ករណីខាងលើនេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃអាទិត្យ ៤រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៤ ខែកុម្ភៈ ឆ្នាំ២០១៨ តាមបណ្តោយផ្លូវ៥៩៨ នៅចំណុចមុខផ្ទះលេខ១៧២ ស្ថិតនៅក្នុងសង្កាត់បឹងកក់២ ខណ្ឌទួលគោក ។
ជនសង្ស័យដែលឃាត់ខ្លួនបានមានឈ្មោះ រិទ្ធី ភេទប្រុស អាយុ១៥ឆ្នាំ មុខរបរមិនពិតប្រាកដ ស្នាក់នៅសង្កាត់ភ្នំពេញថ្មី ខណ្ឌសែនសុខ ជាអ្នកបើកម៉ូតូ និងជនសង្ស័យម្នាក់ទៀតមានឈ្មោះ សែន ពន្លឺ ភេទប្រុស អាយុ១៨ឆ្នាំ ស្នាក់នៅសង្កាត់ភ្នំពេញថ្មី ខណ្ឌសែនសុខ ។
តាមប្រភពព័ត៌មានពីកងរាជអាវុធហត្ថខណ្ឌទួលគោក បានឲ្យដឹងថា មុនពេលកើតហេតុ កម្លាំងល្បាតបានឃើញជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរី២០១៨ ពាក់ស្លាកលេខ ភ្នំពេញ ១GV-២៥២៧ ធ្វើដំណើរមកតាមបណ្តោយផ្លូវ៥៩៨ ក្នុងទិសដៅពីត្បូងទៅជើង កំពុងតែជិះដេញម៉ូតូហុងដាឌ្រីម និងស៊ុយសុគីនិច២គ្រឿងទៀត រួចហើយបានដកកាំភ្លើងខ្លីម៉ាកឡុកចិន ដេញបាញ់ទៅលើយុវជន៤ទៅ៥នាក់ទៀត ភ្លាមៗនោះដែរ កម្លាំងល្បាតបានឃើញក៏ជិះរថយន្តដេញកាក់ និងឃាត់ខ្លួនបានទាំង២នាក់ ត្រូវប្រជាពលរដ្ឋចោមរោមព្រួតវាយមួយដៃមួយជើង បណ្តាលឲ្យរងរបួសយ៉ាងដំណំ ទើបអាវុធហត្ថទួលគោកមកអន្តរាគមន៍ឃាត់ខ្លួន ។
បើតាមសម្ដីរបស់យុវជនសង្ស័យទាំង២នាក់ដែលសមត្ថកិច្ចឃាត់ខ្លួននោះ បានឲ្យដឹងថា មុនពេលកើតហេតុ ពួកគេបានឃើញក្រុមចោរមានគ្នាប្រមាណជា៥ទៅ៦នាក់ ជិះម៉ូតូ៤គ្រឿង បានធ្វើសកម្មភាពឆក់ទូរស័ព្ទដៃពីជនរងគ្រោះម្នាក់ទៀតកំពុងដកទូរស័ព្ទមកនិយាយនៅក្រោមស្ពានអាកាស៧មករា ហើយខ្លួនជាមួយមិត្តភក្តិ(យុវជនសង្ស័យ)ឃើញដូច្នេះក៏ជួយធ្វើអន្តរាគមន៍ដោយជិះម៉ូតូដេញតាមចាប់ និងបង្កការភ្ញាក់ផ្អើលដល់កម្លាំងកងរាជអាវុធហត្ថហើយបែរជាមកចាប់ពួកគេទៅវិញ ។ យុវជនសង្ស័យបន្តទៀតថា ចំណែកកាំភ្លើងខាងលើនេះ ពិតជារបស់ពួកគេពិតប្រាកដមែន តែកាំភ្លើងនេះជាកាំភ្លើងកែច្នៃប្រើហ្គាសទេ ដោយខ្លួនទិញតម្លៃ១៤០ដុល្លារ ទុកគ្រាន់ប្រើលេងតែប៉ុណ្ណោះ ។
ក្រោយពេលកើតហេតុ ជនសង្ស័យលើខាងនេះ ត្រូវបានកងរាជអាវុធហត្ថខណ្ឌទួលគោកកសាងសំណុំរឿងបញ្ជូនទៅកាន់បញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចាត់ការទៅតាមនីតិវិធី ៕ ស តារា
