ជនជាតិចិន៣នាក់ក្រឡាប់រថយន្តនៅស្រុកកំពង់សិលា ម្នាក់បានស្លាប់ និង២នាក់ទៀតរងរបួសធ្ងន់

ខេត្តព្រះសីហនុ៖ ព័ត៌មានពីមន្ត្រីនគរបាលស្នងការដ្ឋាន នគរបាលខេត្តព្រះសីហនុ បានឲ្យដឹងថា៖ វេលាម៉ោង១៨:៤០នាទី ថ្ងៃចន្ទ ៥រោច ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៥ ខែកុម្ភៈ ឆ្នាំ២០១៨ ថ្មីៗនេះ ជនជាតិចិន៣នាក់ បានក្រឡាប់រថយន្ត នៅផ្លូវជាតិលេខ៤ ចន្លោះគីឡូម៉ែត្រ១០៧-១០៨ ក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សិលា ខេត្តព្រះសីហនុ។

រថយន្តម៉ាក NISSAN ពណ៌ ខ្មៅ ពាក់ស្លាកលេខភ្នំពេញ2U-6212 បើកបរដោយ ជនជាតិចិន ជិះគ្នា ៣នាក់ មានទិសដៅពីភ្នំពេញ ឆ្ពោះមកខេត្តព្រះសីហនុ ដល់ចំណុចខាងលើ ក៏បានក្រឡាប់បុក នឹងដើមឈើតែម្ដង។

បណ្ដាលឲ្យអ្នកជិះក្នុងរថយន្ត ម្នាក់ស្លាប់ភ្លាមនៅនឹងកន្លែងកើតហេតុ និង ២ នាក់ទៀតរងរបួសធ្ងន់។ ជនរងគ្រោះទាំងអស់ បានបញ្ជូនទៅរាជធានីភ្នំពេញ ។

រថយន្តគ្រោះថ្នាក់ សមត្ថកិច្ច កំពុងចាត់ចែងស្ទូច ចេញយកទៅរក្សាទុកនៅ អធិការដ្ឋាននគរបាលស្រុកកំពង់សិលា៕ ឆ្លាម សមុទ្រ