ការណ៍ពិតដែលនាំឲ្យសម្លាប់មនុស្ស៣នាក់នៅស្រុកអូររាំង

ខេត្តមណ្ឌលគិរី៖ តើមូលហេតុពិត ប្រាកដនៃការបាញ់ប្រហារបណ្ដាលឲ្យ ស្លាប់មនុស្ស៣នាក់នៅស្រុកអូររាំង ខេត្ត មណ្ឌលគិរីមានដំណើរដើមទងយ៉ាងណា?

ខាងក្រោមនេះជាអង្គហេតុលម្អិតដែល ត្រូវបានលោកឧត្តមសេនីយ៍ ហុង វិណុល មេបញ្ជាការរងអាវុធហត្ថលើផ្ទៃប្រទេសនិងជាប្រធានក្រុមស៊ើបអង្កេតលើករណីឃាតកម្មនេះដាក់ជូនទៅតំណាងអយ្យការអមសាលាដំបូងខេត្តមណ្ឌលគិរី ៖

អង្គហេតុ ៖ នៅអំឡុងថ្ងៃទី១៨ ខែ មករា ឆ្នាំ២០១៨ឈ្មោះ ជិន ជនជាតិវៀត ណាមបានជួបជាមួយមនុស្ស៣នាក់ ទី១-ឈ្មោះ ផល ពេញ នាយប៉ុស្តិ៍អូរលែវរៈ នគរបាលការពារព្រំដែនលេខ៦២១នៃ ស្នងការដ្ឋានខេត្តមណ្ឌលគិរី, ទី២-ឈ្មោះ ទន ធារ៉ា ហៅក្អូន មន្រ្តីប៉ុស្តិ៍អូរលែវរៈនគរ បាលការពារព្រំដែនលេខ៦២១នៃស្នងការ ដ្ឋានខេត្តមណ្ឌលគិរី, ទី៣-ឈ្មោះ កើត វេហា ហៅឆៃ ជាមេបញ្ជាការរងកងអនុ សេនាតូចទី៣កងអនុសេនាធំទី២វរយោធាការពារព្រំដែនលេខ១០៣ តំបន់ប្រតិបត្តិការសឹករងមណ្ឌលគិរីដើម្បីសុំយកម៉ូតូ៤គ្រឿង និងរណារយន្ត២គ្រឿងចូលមកកាប់ ឈើនៅភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរីរយៈពេល១ សប្តាហ៍ដោយបង់ប្រាក់ជូន៥លានដុងក្នុងម៉ូតូ១គ្រឿង ។

ពួកគេក៏បានឯកភាពហើយក៏ធ្លាប់ទទួលលុយពីជនជាតិវៀតណាមម្តងរួចមកហើយដោយខាងនគរបាល (ផល ពេញ និង ទន ធារ៉ា) បានទទួលប្រាក់១០លានដុងនិងខាង យោធាឈ្មោះ កើត វេហា ទទួលបាន១០ លានដុង ហើយបែងចែកឲ្យឈ្មោះ កើត វេត្តា មេបញ្ជាការកងអនុសេនាតូចទី៣នៃ វរៈយោធាការពារព្រំដែនលេខ១០៣តំបន់ប្រតិបត្តិការសឹករងមណ្ឌលគិរីជាមេរបស់ឈ្មោះ កើត វេហា ។

នៅព្រឹកថ្ងៃទី៣០ ខែមករា ឆ្នាំ២០១៨ ក្រុមល្បាតព្រៃឈើ៣នាក់និងគ្រូបង្រៀនម្នាក់ឈ្មោះ សេក វឌ្ឍនា នាយអាវុធហត្ថ លើផ្ទៃប្រទេស, ឈ្មោះ តើន សុខណៃ មន្ត្រី បរិស្ថាន, ឈ្មោះ ធុល ខ្នា, បុគ្គលិកអង្គការសមាគមអភិរក្សសត្វព្រៃ(WCS) និងឈ្មោះ ពូម ងា ជាគ្រូបង្រៀនបានជិះម៉ូតូ៣គ្រឿងចុះល្បាតដើម្បីទៅពិនិត្យផ្លូវដែលក្រុមវិស្វកម្មកំពុងធ្វើនិងទៅមើលចំណុចដែលឈ្មោះ ពូម ងា ស្នើសុំឈើធ្វើផ្ទះរបស់ខ្លួន ។

ពេលដល់ចំណុចប៉ុស្តិ៍អូរលែចាស់ក៏ ប្រទះឃើញម៉ូតូវៀតណាមដឹកឈើ២គ្រឿង ហើយនាំគ្នាតាមរហូតប្រទះឃើញជំរំមួយកន្លែងមានជនជាតិវៀតណាមចំនួន១០ នាក់មានរណារយន្ត២គ្រឿង(ខូច១គ្រឿង) ឈើប្រភេទបេង នាងនួន ធ្នង់ ទាំងតូច ទាំងធំ៧៥កំណាត់។ បន្ទាប់មកជនជាតិវៀត ណាមក៏បានប្រាប់ឈ្មោះ តើន សុខណៃ ថា ការចូលមកកាប់ឈើនៅតំបន់នេះគឺ មានការអនុញ្ញាតពីឈ្មោះ ពេញ, ឈ្មោះ វី, ឈ្មោះ តុន និងឈ្មោះ ក្អូន ។

ពេលនោះជនជាតិវៀតណាមឈ្មោះ ជិន បានទូរស័ព្ទទៅឈ្មោះ ផល ពេញ ប្រធានប៉ុស្តិ៍អូរលែដើម្បីសុំកិច្ចអន្តរាគមន៍ បន្ទាប់មកឈ្មោះ តើន សុខណៃ ក៏បានរាយ ការណ៍ជូនលោក ឌិន ប៊ុនធឿន នាយក ដែនជម្រកសត្វព្រៃកែវសីមា ហើយត្រូវ បានការណែនាំមកវិញថា ដកមកវិញសិន ដោយសារកម្លាំងយើងតិចហើយចាំរៀបចំផែនការចុះទៅបង្ក្រាប ប៉ុន្តែឈ្មោះតើន សុខណៃ បានដកហូតរណារយន្ត២គ្រឿង ព្រមទាំងបានអប់រំណែនាំកម្មករជនជាតិវៀតណាមទាំងនោះឲ្យចូលទៅទឹកដីខ្លួនវិញ ។

ជនជាតិវៀតណាមដដែលបានទូរស័ព្ទទៅឈ្មោះ ផល ពេញ ម្តងទៀត ហើយ ឈ្មោះ ផល ពេញ បានហុចទូរស័ព្ទឲ្យ ឈ្មោះ ទន ធារ៉ា នគរបាលប៉ុស្តិ៍អូរលែ (កូន ចៅរបស់ខ្លួន)និយាយជជែកចរចាជាមួយ ឈ្មោះ តើន សុខណៃ ហើយបានព្រមព្រៀង គ្នាលុយចំនួន៥លានដុងជាថ្នូរនឹងការមិនបង្រ្កាបទីតាំងវៀតណាមនោះ។ ឈ្មោះក្អូន ក៏បានទូរស័ព្ទទៅឈ្មោះ កើត វេហា ហៅ ឆៃ ដើម្បីប្រាប់រឿងមន្រ្តីបរិស្ថានចុះទៅជំរំវៀតណាម ហើយព្រមព្រៀងលុយ៥លាន ដុង ព្រោះឈ្មោះ ឆៃ ក៏មានការដឹងឮរឿង នេះដែរ ។

លោក ឌិន ប៊ុនធឿន បានរាយការណ៍ទៅព្រះរាជអាជ្ញារងឈ្មោះ ម៉ម វ៉ាន់ដា ដើម្បី សុំគោលការណ៍បង្រ្កាប។ បន្ទាប់មកលោក ម៉ម វ៉ាន់ដា បានទូរស័ព្ទទៅលោក ឡេង សោភណ្ឌ មេបញ្ជាការវរសេនាតូចនគរ បាលការពារព្រំដែនគោកលេខ៦២១ស្នងការដ្ឋាននគរបាលខេត្តមណ្ឌលគិរីប្រាប់ពី បញ្ហានេះ។ ឈ្មោះ ផល ពេញ ខឹងនឹងឈ្មោះ ណៃ មន្រ្តីបរិស្ថានចេះតែចុះទៅរញ៉េរញ៉ៃ នៅទីនោះក៏បញ្ជាឲ្យឈ្មោះ ទន ធារ៉ា ហៅ ក្អូន ដែលកំពុងអង្គុយផឹកជាមួយគ្នានោះទៅ យកកាំភ្លើង ប៉ុន្តែឈ្មោះ ក្អូន ជាប់និយាយ ទូរស័ព្ទក៏មិនបានឮធ្វើឲ្យឈ្មោះ ផល ពេញ រឹតតែខឹងហើយឡើងឡានទៅយកកាំភ្លើង នៅផ្ទះរបស់ខ្លួនតែម្នាក់ឯង។ ឈ្មោះ ផល ពេញ ក៏ទូរស័ព្ទទៅឈ្មោះ កើត វេហា ប្រាប់ ថា ពួកបរិស្ថានចូលទៅរញ៉េរញ៉ៃខាងក្នុង ឲ្យឈ្មោះឆៃយកកាំភ្លើងទៅភ្ជង់បាញ់ពួកហ្នឹងម្តង ។

ពេលនោះឈ្មោះ ឆៃ បានរាយការណ៍ ឲ្យឈ្មោះ កើត វេត្តា ហៅតុន ទៅតាមអ្វី ដែលទទួលបានពីឈ្មោះផល ពេញ ហើយ ឈ្មោះ តុន បានឲ្យចុះទៅជាមួយ។ ឈ្មោះ ផល ពេញ ក្រោយពីទៅយកកាំភ្លើងអាកាស្វាយបត់មួយដើមពីផ្ទះរបស់ខ្លួនហើយក៏បើករថយន្តយកទៅទុកនៅផ្ទះមួយកន្លែងជិតផ្លូវចូល ហើយយកម៉ូតូមួយគ្រឿងនិងកាំភ្លើងអាកាស្វាយបត់មួយដើមជិះចេញទៅ។ ចំណែកឈ្មោះ ឆៃ ក៏បានយកកាំភ្លើង ស្វាយបត់មួយដើមរបស់ខ្លួនពីផ្ទះចេញទៅដែរ ហើយចូលទៅផ្ទះឈ្មោះ ក្អូន បំណង ហៅទៅទាំងអស់គ្នា ប៉ុន្តែឈ្មោះ ក្អូន បាន បដិសេធជាមួយឈ្មោះ ឆៃ តាមទូរស័ព្ទថា មិនបានទៅទេ ព្រោះអត់មានអីជិះ។ បន្តិច ក្រោយមកឈ្មោះ ពេញ បានជិះកាត់ផ្ទះឈ្មោះក្អូនហើយស្រែកថា តោះទៅក្នុង ឈ្មោះឆៃ ក៏ជិះតាមពីក្រោយ ។

ពេលទៅដល់កន្លែងកើតហេតុលោក ឡេង សោភណ្ឌ បានទូរស័ព្ទទៅឈ្មោះ ផល ពេញ ប្រាប់ថា ជនជាតិវៀតណាមអី ចូលមកកាប់ឈើនៅក្នុងនោះ? រឿងនេះ ដឹងដល់ព្រះរាជអាជ្ញាហើយឈ្មោះ ផល ពេញ កាន់តែខឹងខ្លាំងឡើងៗបាននិយាយជាមួយឈ្មោះឆៃថា តើពួកយើងត្រូវដោះស្រាយគ្នាយ៉ាងម៉េច ព្រោះលើកមុនឈ្មោះ ឆៃ មានការពាក់ព័ន្ធនឹងករណីជនជាតិវៀតណាមចូលកាប់ឈើ ហើយត្រូវបានថ្នាក់ជាតិ ចុះបង្រ្កាប ហើយលើកនេះឈ្មោះ ផល ពេញ ក៏ជិតមានរឿងដែរព្រោះរឿងនេះខាង បរិស្ថានបានរាយការណ៍ទៅព្រះរាជអាជ្ញាទៀត។ ដូចនេះតើយើងត្រូវសម្លាប់ចោល ឬមិនសម្លាប់ ។

កំពុងតែនិយាយគ្នាក៏ឮសំឡេងម៉ូតូជិះចុះមកហើយឃើញនាយអាវុធហត្ថម្នាក់ជិះម៉ូតូ១គ្រឿងដឹករណារយន្ត១គ្រឿងនៅពីក្រោយ និងមានស្ពាយកាំភ្លើងអាកានៅពីក្រោយផង។ ពេលនោះឈ្មោះ ផល ពេញ និងឈ្មោះ ឆៃ បានភ្ជង់ហើយសួរថា មកពី ណា? នាយអាវុធហត្ថបាននិយាយថា មកពី លើហើយបង្វិលកាំភ្លើងពីក្រោយមកមុខ ស្រាប់តែឈ្មោះ ផល ពេញ បានបាញ់៤ គ្រាប់ដួល ហើយដើរទៅថែម១គ្រាប់ទៀត បណ្តាលឲ្យស្លាប់នៅនឹងកន្លែង ហើយក៏ដើរ ឡើងទៅលើភ្ជង់មន្រ្តីបរិស្ថាននិងមន្រ្តីអង្គការ WCSដោយនិយាយថា ហេតុអ្វីរាយ ការណ៍ទៅព្រះរាជអាជ្ញា? ខាងបរិស្ថាន បានឆ្លើយថា អត់បានរាយការណ៍ទេ! ចុះហេតុអ្វីបានជាព្រះរាជអាជ្ញាទូរស័ព្ទទៅមេខ្ញុំ? ហើយគាត់ស្តីបន្ទោសខ្ញុំសួរចប់ភ្លាមក៏បាញ់១គ្រាប់ចំពោះមន្រ្តីអង្គការ WCS ដួល នឹងដីនិងបាញ់មន្រ្តីបរិស្ថាន១គ្រាប់ចំភ្លៅ។

មន្រ្តីបរិស្ថានបានអង្វរថា ខ្ញុំខុសហើយសុំទោសទុកជិវិតឲ្យខ្ញុំផង។ ពេលនោះ ឈ្មោះ ពេញ ក៏បាញ់បន្ថែម២គ្រាប់ទៀត បណ្តាលឲ្យស្លាប់នៅនឹងកន្លែង ហើយមន្រ្តី អង្គការ WCS រងរបួសហើយបានស្លាប់នៅពេលបញ្ជូនទៅដល់មន្ទីរពេទ្យខេត្តមណ្ឌលគិរី។ ចំណែកជនរងគ្រោះម្នាក់ទៀតឈ្មោះ ពូម ងា បានរត់គេចខ្លួនរួច ។

ជនជាប់ចោទទាំង៦នាក់មានឈ្មោះ ដូចខាងក្រោម ៖

ទី១-ឈ្មោះ ផល ពេញ ជានាយនគរ បាលប៉ុស្ដិ៍អូរលែនៃវរការពារព្រំដែនលេខ ៦២១ស្នងការដ្ឋាននគរបាលខេត្តមណ្ឌលគិរីត្រូវបានចាប់ខ្លួនកាលពីព្រឹកថ្ងៃទី២ ខែ កុម្ភៈ ស្ថិតនៅហាងគុយទាវមួយកន្លែង ក្នុង ស្រុកមេមត់ ខេត្តត្បូងឃ្មុំ ជាអ្នកបាញ់ផ្ទាល់ទៅលើជនរងគ្រោះទាំង៣នាក់។ ជននេះ ត្រូវបានចោទថា ជាអ្នកប្រព្រឹត្តបទល្មើសឃាតកម្មគិតទុកជាមុននិងប្រើប្រាស់អាវុធខុសច្បាប់ ។

ទី២-ឈ្មោះ កើត វេហា ហៅឆៃ ជា ទាហានការពារព្រំដែនត្រូវបានចាប់ខ្លួន កាលពីយប់ថ្ងៃទី៣១ ខែមករាជាជនពាក់ ព័ន្ធ។ ជននេះត្រូវចោទថា ប្រព្រឹត្តបទល្មើស ឃាតកម្មគិតទុកជាមុននិងប្រើប្រាស់អាវុធខុសច្បាប់ ។

ទី៣-ឈ្មោះ កើត វេត្តា ហៅតុន មេ បញ្ជាការកងអនុសេនាតូចទី៣ជាជនសមគំនិតក្នុងបទល្មើសឃាតកម្មគិតទុកជាមុន និងត្រូវបានចាប់ខ្លួនកាលពីយប់ថ្ងៃទី១ ខែ កុម្ភៈ ឆ្នាំ២០១៨ ។

ទី៤-ឈ្មោះ ឡាយ សាវី មេបញ្ជាការរង កងអនុសេនាតូចទី៣បានឃុបឃិតឲ្យជនបរទេសឆ្លងដែនខុសច្បាប់បោះជំរំ និងលួច កាប់ព្រៃឈើបំផ្លិចបំផ្លាញធនធានធម្មជាតិ ដែលជាមូលហេតុនាំឲ្យកើតមានអំពើឃាតកម្មគិតទុកជាមុន និងត្រូវបានចាប់ខ្លួនកាល ពីយប់ថ្ងៃទី១ ខែកុម្ភៈ។

ទី៥-ឈ្មោះ ទន់ ធារ៉ា ហៅក្អូន នគរបាល ប៉ុស្ដិ៍អូរលែបានឃុបឃិតឲ្យជនបរទេសឆ្លងដែនខុសច្បាប់បោះជំរុំ និងលួចកាប់ព្រៃឈើបំផ្លិចបំផ្លាញធនធានធម្មជាតិដែលជាមូលហេតុនាំឲ្យកើតមានអំពើឃាតកម្មគិតទុកជាមុនត្រូវបានចាប់ខ្លួនកាលពីយប់ថ្ងៃទី១ ខែកុម្ភៈ ។

ទី៦-ឈ្មោះ ឈាង វ៉ាន់និត ប្អូនថ្លៃ ផល ពេញ ត្រូវបានចាប់ខ្លួននៅរសៀលថ្ងៃទី២ ខែកុម្ភៈ ឆ្នាំ២០១៨ ជាជនសមគំនិតក្នុង បទល្មើសឃាតកម្មគិតទុកជាមុន ។

ដោយឡែកជនរងគ្រោះទាំង៣នាក់រួម មាន មន្ដ្រីកងរាជអាវុធហត្ថលើផ្ទៃប្រទេសឈ្មោះ សេក វឌ្ឍនា, មន្ដ្រីឧទ្យានុរក្សនៃ មន្ទីរបរិស្ថានខេត្តមណ្ឌលគិរីឈ្មោះ តើន សុខណៃ និងបុគ្គលិកអង្គការសមាគមអភិ រក្សាសត្វព្រៃ Wildlife Conservation Society (WCS) ឈ្មោះ ថុល ខ្នា ដែលការបាញ់ ប្រហារនេះផ្តើមចេញពីបទល្មើសព្រៃឈើ។

នៅទីបំផុតកាលពីរសៀលថ្ងៃចន្ទ ៥រោច ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៥ ខែកុម្ភៈ ឆ្នាំ២០១៨បន្ទាប់ពីបញ្ចប់ការសួរនាំចៅក្រមស៊ើបសួរសាលាដំបូងខេត្តមណ្ឌលគិរីបានសម្រេចចេញដីកា បង្គាប់ឲ្យឃុំខ្លួនជនល្មើសទាំង៦នាក់រួម មានជនដៃដល់ឈ្មោះ ផល ពេញ ជានាយ នគរបាលប៉ុស្តិ៍អូរលែពាក់ព័ន្ធនឹងការបាញ់ សម្លាប់មនុស្ស៣នាក់នៅស្រុកអូររាំង ខេត្ត មណ្ឌលគិរី ។

សូមបញ្ជាក់ថា ការបាញ់ប្រហារនេះ បានកើតឡើងនៅចំណុចប៉ុស្ដិ៍អូរលែក្នុង ភូមិសាស្ដ្រភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរីនៅចន្លោះ ម៉ោង៤ទៅម៉ោង៥ល្ងាចថ្ងៃទី៣០ ខែមករា ឆ្នាំ ២០១៨ បានបណ្ដាលឲ្យស្លាប់មនុស្ស៣ នាក់ ៕ ហេង សូរិយា