សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ ៖ មុនពេលមានភ្លៀងកក់ខែយ៉ាងធំនាវេលាម៉ោង០០និង២៥នាទីរំលងអធ្រាត្រ ឈានចូលថ្ងៃ ថ្ងៃ សុក្រ៩ កើត ខែ ផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី ២៣ ខែ កុម្ភៈ ឆ្នាំ ២០១៨ មានបាតុភូតរន្ទះបាញ់ បណ្តាលឲ្យមានអគ្គិភ័យឆេះដើមត្នោតមួយដើម ស្ថិតនៅចំណុចក្បែរផ្ទះ ឈ្មោះ នូ សុខលាប ភេទស្រី អាយុ៤៥ឆ្នាំ ក្នុងភូមិត្រពាំងវែង សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ បង្កភ្ញាក់ផ្អើលពេញភូមិ ។
ក្នុងបាតុភូតនោះលោកឧត្តមសេនីយ៍ត្រី អ៊ុក កុសល ស្នងការនគរបាលខេត្តកំពង់ធំ បានដឹកនាំកងកម្លាំងនគរបាលជំនាញផ្នែកការិយាល័យបង្ការពន្លត់អគ្គិភ័យ និងសង្គ្រោះចុះប្រតិបត្តិការនិងធ្វើ អន្តរាគមន៍ពន្លត់អគ្គិភ័យឆេះដើមត្នោតមួយដើមនោះទាន់ពេលវេលា ទើបមិនបណ្តាលឲ្យរាលដាលដល់ផ្ទះអ្នកជិតខាង ។
មន្រី្តនគរបាល ក្រុងស្ទឹងសែន បានឲ្យដឹងថា មានរថយន្តពន្លត់អគ្គិភ័យ របស់ស្នងការដ្ឋាននគរបាលខេត្តកំពង់ធំ ចំនួន ១គ្រឿង បានចេញទៅធ្វើអន្តរាគមន៍បាញ់ទឹកពន្លត់ដោយប្រើប្រាស់ទឹកអស់ចំនួន ២រថយន្ត ស្មើនឹង ១០ម៉ែត្រគូប ទើបរលត់ជាស្ថពរ និងមិនរាលដាល ដល់ដើមត្នោតដទៃ និងផ្ទះប្រជាពលរដ្ឋជិតខាង ៕ សហការី
