សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងអគ្គនាយកដ្ឋានអន្ដោរប្រវេសន៍ ការិយាល័យស៊ើបអង្កេតនិងអនុវត្តនីតិវិធី នៃស្នងការដ្ឋាននគរបាលរាជធានីភ្នំពេញ ចុះមកសហការជាមួយនគរបាលមូលដ្ឋាន ត្រួតពិនិត្យមើលទីតាំងហាងកាហ្វេង៉ុកងីង, ហាងកាហ្វេធីថាន់ ខណ្ឌឬស្សីកែវ និងខណ្ឌដូនពេញ ជាលិទ្ធផលឃាត់ខ្លួនជនជាតិវៀតណាមប្រុសស្រី១៩នាក់ គ្មានលិខិតឆ្លងដែនត្រឹមត្រូវ ។
ក្នុងប្រតិបត្តិការនេះ បានធ្វើឡើងកាលពីព្រឹកថ្ងៃសុក្រ ៩កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹង ថ្ងៃទី២៣ ខែកុម្ភៈ ឆ្នាំ២០១៨នេះ ដោយធ្វើឡើងជាច្រើនគោលដៅដូចជា៖ ទីតាំងសិប្បកម្មដែកស្មិត ផ្លូវជាតិលេខ៥ សង្កាត់ច្រាំងចំរេះ២, ហាងកាហ្វេង៉ុកងីង, ហាងកាហ្វេធីថាន់ សង្កាត់ឬស្សីកែវ ខណ្ឌឬស្សីកែវ និងតាមផ្លូវ៨០ សង្កាត់ស្រះចក ខណ្ឌដូនពេញ រាជធានីភ្នំពេញ ។
យោងតាមមន្រ្តីមូលដ្ឋាន បានឲ្យដឹងថាប្រតិបត្តិការនេះ ធ្វើឡើងក្រោមការសម្របសម្រួលពី លោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ដោយត្រួតពិនិត្យឃើញមានមនុស្ស១៩នាក់ ស្រី១០ ជាជនជាតិវៀតណាម បានលួចចូលមកស្នាក់នៅ និងប្រមុខរបរដោយខុសច្បាប់ គ្មានលិខិតឆ្លងដែន ។
ក្រោយឃាត់ខ្លួនជនជាតិវៀតណាមទាំង១៩នាក់នេះរួចមក កម្លាំងជំនាញបានបញ្ជូនទៅកាន់អគ្គនាយកដ្ឋានអន្តោប្រវេសន៍ ដើម្បីបន្តទៅតាមនីតិវិធីច្បាប់ ៕ស តារា
