សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មុខសញ្ញាចោរឆក់ម្នាក់ ត្រូវបានសមត្ថកិច្ចឃាត់ខ្លួន ក្រោយធ្វើសកម្មភាពឆក់កាបូបលុយពីបុរសម្នាក់បានសម្រេចនៅផ្លូវកម្ពុជាក្រោម តែរត់មិនរួច ក៏ត្រូវសមត្ថកិច្ចឃាត់ខ្លួន និងឈានដល់ឃាត់ខ្លួនបក្ខពួក២នាក់ទៀតដែលជាអ្នកផ្សំគំនិត ។
ហេតុការណ៍នេះកើតឡើងនៅវេលាម៉ោង៣រសៀលថ្ងៃអាទិត្យ ១១កើត ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២៥ ខែកុម្ភៈ ឆ្នាំ២០១៨ នៅចំណុចផ្លូវកម្ពុជាក្រោម ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ ។
សមត្ថកិច្ចឲ្យដឹងថា ជនសង្ស័យឈ្មោះ ម៉ាប់ ហេង ភេទប្រុស អាយុ១៦ឆ្នាំ ស្នាក់នៅមុខរបរមិនពិតប្រាកដ ។ ដកហូតម៉ូតូមួយគ្រឿងម៉ាក NEX ពាក់ស្លាកលេខ ភ្នំពេញ 1GI.0294, ឈ្មោះ លាប សុវណ្ណរ៉េត ភេទប្រុស អាយុ២៣ឆ្នាំ ស្នាក់នៅមុខរបរមិនពិតប្រាកដ និងឈ្មោះ ឡាក់ ណត់ ភេទប្រុស អាយុ២២ឆ្នាំ ស្នាក់នៅមុខរបរមិនពិតប្រាកដ ជាម្ចាស់ម៉ូតូមួយគ្រឿងម៉ាក NEX ពាក់ស្លាកលេខ ភ្នំពេញ 1GI.0294 ។
បើតាមសម្ដីពីសមត្ថកិច្ចខណ្ឌ៧មករា បានប្រាប់ឲ្យដឹងថា មុខសញ្ញាចោរឆក់ខាងលើ ដែលត្រូវបានសមត្ថកិច្ចខណ្ឌដូនពេញសហការជាមួយសមត្ថកិច្ចខណ្ឌ៧មករាឃាត់ខ្លួនបានទាំង៣នាក់ បន្ទាប់ពីជនសង្ស័យម្នាក់បានធ្វើសកម្មភាពឆក់កាបូបលុយពីបុរសម្នាក់ដែល កំពុងជិះម៉ូតូម៉ាកធូដេ ហើយបានលៀនកាបូបលុយចេញពីក្នុងហោប៉ៅ ក៏ត្រូវជនសង្ស័យខាងឆក់បានសម្រេច នៅចំណុចកើតហេតុខាងលើបណ្ដោយឲ្យជនរងគ្រោះខឹងយ៉ាងខ្លាំងហើយបានបើកម៉ូតូដេញតាមពីក្រោយ រហូតដល់ផ្សារកណ្ដាលក៏បានឃើញបក្ខពួកជនសង្ស័យ២នាក់ទៀត ដែលកំពុងឈរចាំភ្លាមរូបខ្លួនបានចុះពីលើម៉ូតូ និងបានដេញចាប់ហើយបានស្រែកឲ្យសមត្ថកិច្ច ដែលប្រចាំការនៅក្បែរនោះធ្វើការឃាត់ខ្លួនបានទាំង៣នាក់តែមង្ត ។
ក្រោយពីឃាត់ខ្លួនជនសង្ស័យទាំង៣នាក់ខាងលើរួច សមត្ថកិច្ចខណ្ឌដូចពេញសហការជាមួយខណ្ឌ៧មករាឲ្យមកនាំខ្លួនទៅខណ្ឌ៧មករាដោយសារជាម្ចាស់ទឹកដីផងដែរ។ ចំណែកកាបូបលុយរបស់ជនរងគ្រោះត្រូវបានសមត្ថកិច្ចប្រគល់ទៅឲ្យម្ចាស់វិញផងដែរ។
បច្ចុប្បន្នជនសង្ស័យខាងលើ និងម៉ូតូត្រូវបានកម្លាំងសមត្ថកិច្ចខណ្ឌ៧មករាបញ្ជូនខ្លួនមកអធិការដ្នាននគរបាលខណ្ឌ៧មករា ដើម្បីចាត់ការតាមច្បាប ៕ សរស្មី
