សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រោយពីឃាត់ខ្លួនកាលពីម្សិលមិញ នៅព្រឹកថ្ងៃសៅរ៍ ២រោច ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៣ ខែមីនា ឆ្នាំ២០១៨នេះ សមត្ថកិច្ចខណ្ឌសែនសុខ បានម្រេចដោះលែង មេការជាងកាត់សម្លៀកបំពាក់ ហាង អេលីត ឡាហ្គា ដែលត្រូវម្ចាស់ហាងប្តឹងឲ្យសមត្ថកិច្ចចាប់ខ្លួន លើបទល្មើសជាក់ស្តែង ដោយបានលួចសម្ភារ កាត់ដេរ និងរំលោភលើទំនុកចិត្ត ឲ្យមានសេរីភាពវិញហើយ ។
ស្ត្រីសង្ស័យដែលត្រូវបានសមត្ថកិច្ចដោះលែង មានឈ្មោះ ជៀម ស្រីម៉ិច ភេទស្រី អាយុ ៣២ឆ្នាំ មុខរបរ មេជាងកាត់ដេរ ទីលំនៅផ្ទះជួល (ម្ចាស់ហាងជួលឲ្យរស់នៅ) លេខ ៩៩អា ផ្លូវ១៩៩០ សង្កាត់ភ្នំពេញថ្មី ខណ្ឌសែនសុខ ។
ពាក់ព័ន្ធការសម្រេចដោះលែងជនសង្ស័យខាងលើនេះ លោក ហួរ ម៉េងវ៉ាង អធិការនគរបាលខណ្ឌសែនសុខ បានបញ្ជាក់ថា ក្រោយពីសមត្ថកិច្ចជំនាញ សាកសួរ និងពិនិត្យលើភស្តុតាង រួចមក សមត្ថកិច្ចយល់ឃើញថា បទល្មើសនេះជាបទល្មើស មជ្ឈិម និងជាបទល្មើសតូចតាច ការខូចខាតតិចតួច ទើបលោកឆ្លងយោបល់ទៅ លោក គង់ សំសារ៉េត ព្រះរាជអាជ្ញារងអមសាលាដំបូងរាជធានីភ្នំពេញ ស្នើសុំដោះលែងជនសង្ស័យឲ្យមានសេរីភាពវិញ ដោយកសាងតែសំណុំរឿងបញ្ជូនទៅតុលាការ ចាត់ការបន្តនាពេលក្រោយទៀត ។
លោក គង់ សំសារ៉េត ព្រះរាជអាជ្ញារងអមសាលាដំបូងរាជធានីភ្នំពេញ បានថ្លែងថា លោកពិតជាបាន ឯកភាពឲ្យសមត្ថកិច្ចដោះលែងជនសង្ស័យឈ្មោះ ជៀម ស្រីម៉ិច មែនដោយសារតែ សមត្ថកិច្ចរាយការណ៍ជូនលោក ថារឿងនេះ ជារឿងតូចតាច និងមានការខូចខាតបន្តិចបន្តួច ទើបលោកយល់ព្រមតាមសំណើររបស់សមត្ថកិច្ចទៅ ។ ចំណែកសំណុំរឿង គឺសមត្ថកិច្ចមិនទាន់បញ្ជូនទៅឲ្យលោកនៅឡើយទេ បានត្រឹមតែឆ្លងយោបល់ផ្ទាល់មាត់តែប៉ុណ្ណោះ ។
សូមបញ្ជាក់ថា កាលពីព្រឹកថ្ងៃទី០២ ខែមីនា ឆ្នាំ២០១៨ម្សិលមិញ កម្លាំងសមត្ថកិច្ចប៉ុស្តិ៍ភ្នំពេញថ្មី សហាការជាមួយកម្លាំងនគរបាលអធិការដ្ឋាននគរបាលខណ្ឌសែនសុខ បានឃាត់ខ្លួនស្ត្រីជនសង្ស័យឈ្មោះ ជៀម ស្រីម៉ិច និងកូនជាងកាត់ដេរ ចំនួន ០៦នាក់ របស់ហាងកាត់សម្លៀកបំពាក់ យីហោ អេលីត ឡាហ្គា មានទីតាំងនៅផ្ទះលេខ២៦ ផ្លូវ១៩៨៦ សង្កាត់ភ្នំពេញថ្មី ខណ្ឌសែនសុខ ពាក់ព័ន្ធករណី លួច និងរំលោភលើទំនុកចិត្ត ។
សមត្ថកិច្ចបញ្ជាក់ថា ការឃាត់ខ្លួនក្រុមជនសង្ស័យខាងលើនេះ ធ្វើឡើងដោយយោងតាមពាក្យបណ្ដឹងចុះថ្ងៃទី២៨ ខែកុម្ភៈ ឆ្នាំ២០១៨ របស់ម្ចាស់ហាងកាត់សម្លៀកបំពាក់ អេលីត ឡាហ្គា មានទីតាំងផ្ទះលេខ២៦ ផ្លូវ១៩៨៦ សង្កាត់ភ្នំពេញថ្មី ខណ្ឌសែនសុខ ។
យោងតាមប្រភពដដែលបានបញ្ជាក់ថា កាលពីអំឡុងខែធ្នូ ឆ្នាំ២០១៧ ជនសង្ស័យឈ្មោះ ជៀម ស្រីម៉ិច ជាមេការជាងកាត់ដេរនៅក្នុងហាង កាត់សម្លៀកបំពាក់ អេលីត ឡាហ្គា បានលួចយកសម្ភារកាត់សម្លៀកបំពាក់ជាច្រើនមុខ ពីក្នុងហាងរបស់ជនរងគ្រោះ ទៅលួចកាត់ដេរសម្លៀកបំពាក់ឲ្យភ្ញៀវជាលក្ខណៈឯកជន នៅក្នុងផ្ទះជួលដែលម្ចាស់ហាង អេលីត ឡាហ្គា ជួលឲ្យឈ្មោះ ជៀម ស្រីម៉ិច ជាមេការ ស្នាក់នៅ ដោយយកម៉ូតតាម ហាង អេលីត ឡាហ្គា ប៉ុន្តែយកតម្លៃ ធូរថ្លៃជាង ដែលជាការប៉ះពាល់ដល់ចំណូលរបស់ហាង ។
សមត្ថកិច្ចបន្ថែមថា ជនសង្ស័យឈ្មោះ ជៀម ស្រីម៉ិច បានធ្វើសកម្មភាព លួចយកសម្ភារកាត់ដេរសម្លៀកបំពាក់របស់ហាង អេលីត ឡាហ្គា ទៅលួចដេរសម្លៀកបំពាក់ឲ្យភ្ញៀវ យកតម្លៃទាបជាងហាង តាំងពីអំឡុងឆ្នាំ២០១៤មកម្ល៉េះ ប៉ុន្តែម្ចាស់ហាង អាណិត និងហៅធ្វើកិច្ចសន្យាជាច្រើនលើកច្រើនសារ ឲ្យពួកគេឈប់ធ្វើបែបនោះតទៅទៀត តែក្រុមជនសង្ស័យ នៅតែបន្តធ្វើដដែល ទើបម្ចាស់ហាង ដាច់ចិត្តប្តឹងសមត្ថកិច្ចឲ្យឃាត់ខ្លួនតែម្តងទៅ ។
ក្រោយពីសាកសួរ កាលពីម្សិលមិញសមត្ថកិច្ចបាន ដោះលែងកូនជាងកាត់ដេរ ០៦នាក់ឲ្យត្រលប់ទៅផ្ទះវិញ ដោយរក្សាទុកតែជនសង្ស័យឈ្មោះ ជៀម ស្រីម៉ិច ដែលរកឃើញថា ពាក់ព័ន្ធរឿង លួច និងរំលោភលើទំនុកចិត្ត ប៉ុន្តែមកដល់ព្រឹកថ្ងៃទី០៣ ខែមីនា ឆ្នាំ២០១៨នេះ សមត្ថកិច្ចក៏បានដោះលែងជនសង្ស័យរូបនេះឲ្យមានសេរីភាពវិញ ម្នាក់ទៀត ដោយបន្សល់ទុកតែកំណត់ហេតុសាកសួរយកចម្លើយ និងពាក្យបណ្តឹងរបស់ជនរងគ្រោះ ដោយមានវីដេអូសកម្មភាពជនង្ស័យលួចសម្ភារម្ចាស់ហាង ដែលជាភស្តុតាង ទុកបញ្ជូនទៅតុលាការតាមនីតិវិធី៕ អរុណរៈ
