សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ រថយន្តហាយឡេនឌ័រមួយគ្រឿង ត្រូវជនទុច្ចរិតលួចដឹកឈើប្រភេទគ្រញូង៤១ដុំ ស្មើ២៤១គីឡូក្រាម ហើយត្រូវបានបង្ក្រាបដោយកម្លាំងការិយាល័យនគរបាលប្រឆាំងបទល្មើសសេដ្ឋកិច្ច សហការជាមួយកម្លាំងជំនាញការិយាល័យចរាចរណ៍ជើងគោក នៅចំណុចភូមិខ្សាច់ ឃុំរអាង ស្រុកកំពង់សៀម ខេត្តកំពង់ចាម ។
កិច្ចបង្ក្រាបអំពើល្មើសលួចដឹកជញ្ជូនផលអនុផលព្រៃឈើនេះ ធ្វើឡើងកាលពីវេលាម៉ោង៩ និង១៥នាទី ថ្ងៃទី១៩ ខែមីនា ឆ្នាំ២០១៨ ក្រោមបទបញ្ជាលោកឧត្តមសេនីយ៍ទោ ឯម កុសល បន្ទាប់ពីទទួលបានព័ត៌មានជាក់លាក់អំពីក្រុមទុច្ចរិតលួចដឹកឈើខាងលើ ។
សមត្ថកិច្ចបានឲ្យដឹងថា ក្រោយការស្ទាក់បង្ក្រាប កម្លាំងដកហូតបានរថយន្តមួយគ្រឿង ម៉ាកហាយឡេនឌ័រ ពណ៌ស ស្លាកលេខ2A-9216 និងឈើគ្រញូងចំនួន៤១ដុំ ស្មើ២៤១គីឡូម៉ែត្រគូប ។ ដោយឡែកម្ចាស់ និងជាអ្នកបើករថយន្តបានរត់គេចខ្លួនបាត់ស្រមោល ។
បច្ចុប្បន្នវត្ថុតាងខាងលើ កម្លាំងសមត្ថកិច្ចបានប្រគល់ជូន ជំនាញរដ្ឋបាលព្រៃឈើចាត់ការបន្តតាមនីតិវិធី ៕ វណ្ណៈ
