សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តស៊េរីទំនើបមួយគ្រឿង ម៉ាកBMW បានបើកក្នុងល្បឿនលឿន ក៏ជ្រុលបុករថយន្តឡិចសុីស300 ពីចំហៀងបណ្តាលឲ្យរងការខូចខាតយ៉ាងដំណំ ។
ហេតុការណ៍នេះ បានកើតឡើងកាលពីវេលាម៉ោងរំលងអធ្រាត្រ ឈានចូលថ្ងៃសុក្រ ១៤កើត ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី៣០ ខែមីនា ឆ្នាំ២០១៨ នៅចំណុចស្តុបរតនាស្រីម៉ៅ តាមបណ្តោយផ្លូវលេខ២៨៩ កែងផ្លូវលេខ៥១៦ ស្ថិតក្នុងសង្កាត់បឹកកក់ទី១ ខណ្ឌទួលគោក រាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តម៉ាកឡិចសុីសRX 300 ពណ៌ស ពាក់ស្លាកលេខភ្នំពេញ2AJ 7873 បើកបរដោយបុរសម្នាក់ធ្វើដំណើរតាមបណ្តោយផ្លូវលេខ៥១៦ ក្នុងទិសដៅពីលិចទៅកើតខណះមកដល់ចំណុចកើតហេតុដោយសញ្ញាស្តុបខៀវទើបបន្តបើកទៅមុខទៀតស្រាប់តែមានរថយន្តស៊េរីទំនើប ម៉ាកBMW ពណ៌ស ពាក់ស្លាកលេខភ្នំពេញ2AH 1088 បើកបរដោយនារីវ័យក្មេងម្នាក់ធ្វើដំណើរតាមបណ្តោយផ្លូវលេខ២៨៩ ក្នុងទិសដៅពីជើងទៅត្បូងក្នុងល្បឿនលឿនដោយបំពានភ្លើងស្តុបជ្រុលបុករថយន្តឡិចសុីសពីចំហៀងពេញទំហឹងវឹលមួយជុំបណ្តាលឲ្យរងការខូចខាតយ៉ាងដំណំ តែមិនមានអ្នករងរបួស ។
ក្រោយពេលកើតហេតុសមត្ថកិច្ចបានចុះមកដល់ចំណុចកើតហេតុ និងវាស់វែងយករថយន្តទាំង២គ្រឿង ទៅរក្សាទុកនៅអធិការដ្ឋាននគរបាលខណ្ឌទួលគោករង់ចាំដោះស្រាយពេលក្រោយ ៕ សុខាសែនជ័យ
