សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ហេតុការណ៍គ្រោះថ្នាក់ចរាចរមួយ បានកើតឡើងរវាងរថយន្តស៊េរីទំនើបនិងរទេះលក់ភេសជ្ជៈ ប៉ុន្តែសំណាងល្អមិនមានអ្នករងរបួស គ្រាន់តែរងការខូចខាតសម្ភារៈមួយចំនួនធំ ខណៈដែលបុរសម្នាក់សង្ស័យស្រវឹងស្រាជោកជាំ បានបើករថយន្តស៊េរីទំនើបមួយគ្រឿង ម៉ាកហ្វ័ត បោះពួយយ៉ាងលឿនរួចក៏រេចង្កូតទៅបុករទេះលក់ភេសជ្ជៈនៅលើខឿនតាមចិញ្ចើមផ្លូវ ហើយម្ចាស់រថយន្តរត់គេចបាត់ស្រមោល ។
ករណីគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១០និង៣០នាទីយប់ថ្ងៃចន្ទ ៧កើត ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹង ថ្ងៃទី២១ ខែឧសភា ឆ្នាំ២០១៨ ត្រង់ចំណុចស្តុបមជ្ឍមណ្ឌលម៉ុងឌីយ៉ា តាមបណ្តោយផ្លូវលេខ២៣០កែងនឹងផ្លូវម៉ៅសេទុង ស្ថិតក្នុងសង្កាត់ផ្សារដើមគ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើកបររថយន្តស៊េរីទំនើបមួយគ្រឿង ម៉ាកហ្វ័ត ពណ៌ស ពាក់ស្លាកលេខ ភ្នំពេញ ២AP-០២៧០ ធ្វើដំណើរតាមបណ្តោយផ្លូវ២៣០ក្នុងទិសដៅពីកើតទៅលិច និងក្នុងល្បឿនលឿន ។ លុះមកដល់ចំណុចកើតហេតុរថយន្តបង្កខាងលើស្រាប់តែរេចង្កូតទៅខាងស្តាំទៅបុកនឹងរទេះដែលគេដាក់លក់ភេសជ្ជៈនៅលើខឿនតាមចិញ្ចើមផ្លូវចំពេញទំហឹងបណ្តាលឲ្យភេសជ្ជៈដែលគេដាក់លក់ខ្ទាតរាយពាយពេញផ្លូវតែម្តង ។
បន្ទាប់មករថយន្តបង្កមិនបានឈប់ដើម្បីធ្វើការដោះស្រាយគ្នាជាមួយភាគីជនរងគ្រោះនោះទេ គឺព្យាយាមបើករត់គេចខ្លួនទៅទៀតទាំងកៀបជាប់រទេះនៅពីមុខរថយន្តអូសជាង៥០០ម៉ែត្រទើបរទេះរបួតចេញពីរថយន្តបង្ក ។ ចំណែកឯរថយន្តរងការខូចខាតក្រពឹតកាងផ្នែកខាងមុខចំហៀងខាងស្តាំតែរថយន្តបង្កនៅតែមិនព្រមឈប់នៅតែបន្តដំណើរបើករត់គេចខ្លួនទៅមុខបន្តទៀតមានប្រជាពលរដ្ឋដែលឃើញហេតុការណ៍បានជិះម៉ូតូដេញតាមពីក្រោយរហូតទៅដល់ខាងមុខភោជនីយដ្ឋាន ហ្គោលស៊ីតធី តាមបណ្តោយផ្លូវ២០២ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក ទើបរថយន្តបង្កព្រមឈប់រថយន្ត ដោយឡែកអ្នកបើករថយន្តបង្កបានចុះពីលើរថយន្តគេចខ្លួនចូលទៅក្នុងភោជនីយដ្ឋានខាងលើបាត់ស្រមោល ។
ក្រោយកើតហេតុសមត្ថកិច្ចជំនាញឲ្យចុះមកធ្វើការស្ទូចយករថយន្តបង្កខាងលើទៅរក្សាទុកនៅអធិការដ្ឋាននគរបាលខណ្ឌទួលគោក ដើម្បីរងចាំម្ចាស់ចូលខ្លួនមកធ្វើការដោះគ្នាតាមច្បាប់ ៕ ស តារា
