សារព័ត៌មាន នគរវត្ត តែងតែនាំមុខគេជានិច្ច
មិត្តអ្នកនិយមបណ្តាញសង្គមហ្វេសប៊ុកបានបង្ហោះរូបភាពមួយសន្លឹក គឺរណ្តៅលូ ដែលមានជម្រៅជ្រៅ ហើយរថយន្ត ជាច្រើនគ្រឿងព្យាយាមចៀសរណ្តៅនេះ ។ សម្រាប់នាងខ្ញុំ ដែលឃើញរូបភាពនេះ ក៏ចាប់អារម្មណ៍ដែរ ហើយមិននឹកស្មានថា អាជ្ញាធរបណ្តោយឲ្យមានទិដ្ឋភាពនេះនោះឡើយ ។ តាមរយៈការសន្ទនាគ្នានៅលើបណ្តាញសង្គមហ្វេសប៊ុក អ្នកខ្លះឲ្យដឹងថា រូបភាពបែបនេះ គឺជារណ្តៅលូ មួយកន្លែងស្ថិតក្នុងខណ្ឌចំការមន ព្រំប្រទល់ខណ្ឌមានជ័យ ។
តាមអ្វីដែលនាងខ្ញុំធ្លាប់ឮ មិនត្រឹមតែបញ្ហាសណ្តាប់ធ្នាប់នោះទេ សូម្បីតែបញ្ហាសន្តិសុខ ដែលកើតឡើងនៅតាមព្រំដែនខណ្ឌនីមួយៗ អាជ្ញាធរតែងតែរុញដាក់គ្នា ។ ឧទាហរណ៍ ករណីមានខ្មោចអណ្តែតទឹកនៅត្រើយខាងកើត មុខព្រះបរមរាជវាំង ខាងខណ្ឌជ្រោយចង្វា អាជ្ញាធរខណ្ឌនេះព្យាយាមរុញខ្មោចនោះឲ្យអណ្តែតមកត្រើយខាងលិច ដែលជាការទទួលខុសត្រូវរបស់ខណ្ឌដូនពេញ ។ ដូចគ្នានេះដែរ រណ្តៅលូ ដែលបងប្អូនបានឃើញនេះ ទំនងជាកើតឡើងនៅកណ្តាលព្រំដែនខណ្ឌណាមួយ ទើបបានជាគ្មាននរណាអើពើ ។
វាជារឿងតូច ប៉ុន្តែវាអាចគ្រោះថ្នាក់ដល់អាយុជីវិតមនុស្ស ។ ដូច្នេះ អាជ្ញាធរមានសមត្ថកិច្ចគួរចាត់វិធានការដោះស្រាយបញ្ហាបែបនេះឲ្យបានលឿនរហ័ស ចៀសវាងមានគ្រោះថ្នាក់ ទើបនាំគ្នាទម្លាក់កំហុសទៅវិញទៅមក ។ បញ្ហានេះ គេឃើញ ថា បណ្តាលមកពីការមិនទទួលខុសត្រូវរបស់ស្ថាប័នជំនាញ ឬក្រុមហ៊ុនដែលទទួលម៉ៅការ ក្នុងការធ្វើគម្របលូនោះ ។ រឿងធ្វើហើយដើរចេញនេះ គឺមានច្រើនករណីណាស់ ។ ជាក់ស្តែងក្រុមហ៊ុនជួសជុលផ្លូវដាក់លូ នៅតាមបណ្តោយផ្លូវសហព័ន្ធរុស្ស៊ី មុខសកលវិទ្យាល័យភូមិន្ទភ្នំពេញ ដែលធ្វើលូ តាំងពីខែឧសភា រហូតមកដល់ពេលនេះ លូធ្វើរួចហើយ ប៉ុន្តែចិញ្ចើមផ្លូវមិនបានធ្វើឲ្យរួចរាល់នោះទេ ។
វាជារឿងតួចតាចសម្រាប់អ្នកទទួលម៉ៅការ ប៉ុន្តែនៅពេលដែលមានគ្រោះថ្នាក់កើតឡើង ជួនកាលអាចបាត់បង់អាយុជីវិតអ្នកធ្វើដំណើរនៅតាមផ្លូវក៏ថាបាន ។ រឿងរ៉ាវតួចតាចបែបនេះ ញាំងឲ្យមានការរិះគន់ជាខ្លាំងដល់អាជ្ញាធរមានសមត្ថកិច្ច ។ ដូច្នេះ នាងខ្ញុំរំពឹងថា រឿងរ៉ាវតូចតាចបែបនេះ គួរតែត្រូវបានដោះស្រាយភ្លាមៗ ដើម្បីកុំឲ្យមានគ្រោះថ្នាក់ ៕ ប្រជាពលរដ្ឋម្នាក់
