សារព័ត៌មាន នគរវត្ត តែងតែនាំមុខគេជានិច្ច
នាងខ្ញុំសង្កេតឃើញប៉ុន្មានថ្ងៃនេះ អាជ្ញាធររាជធានីភ្នំពេញដាក់បន្ទុកបញ្ហាសំរាមទៅលើប្រជាពលរដ្ឋ ។ ប៉ុន្តែបើតាមនាងខ្ញុំយល់ គឺបញ្ហាសំរាមមិនមែនជាការទទួលខុសត្រូវរបស់ប្រជាពលរដ្ឋឡើយ ។ ប៉ុន្តែប្រជាពលរដ្ឋគ្រាន់តែជាចំណែកនៃការចូលរួមប៉ុណ្ណោះ ។ ចូលរួមក្នុងការទុកដាក់សំរាមឲ្យមានរបៀបរៀបរយ ដើម្បីឲ្យងាយស្រួលដល់ក្រុមហ៊ុនប្រមូលសំរាមគេមកប្រមូល ។ ប៉ុន្តែបើរថយន្តក្រុមហ៊ុនប្រមូលសំរាមមិនមកទេនោះ វាមិនមែនជាកំហុសរបស់ប្រជាពលរដ្ឋឡើយ ។ គ្មានពលរដ្ឋណាចង់ឲ្យសំរាមនៅស្អុយក្នុងផ្ទះនោះឡើយ ។
ប៉ុន្មានថ្ងៃនេះ ក្រុមហ៊ុនប្រមូលសំរាមនៅរាជធានីភ្នំពេញហាក់ដូចជាមិនបានបំពេញតួនាទីតាមកាលវិភាគនោះឡើយ ។ ទាំងនាងខ្ញុំនៅខណ្ឌទួលគោក មិនឃើញរថយន្តក្រុមហ៊ុនស៊ីនទ្រីចុះមកប្រមូលសំរាម៣-៤ថ្ងៃ ។ ការខកខាននេះ បណ្តាលឲ្យសំរាមចាល់នៅក្នុងផ្ទះ និងផ្ទះខ្លះត្រូវលើកសំរាមមកដាក់លើចិញ្ចើមផ្លូវមុខផ្ទះ ។ សំរាមដែលក្រុមហ៊ុនមិនមកប្រមូលយកទៅនោះ បណ្តាលឲ្យស្អុយរលួយជះក្លិនអសោចិ៍ពេញផ្លូវ ពេញភូមិ ។ ចំណុចនេះ វាមិនមែនជាកំហុសរបស់ប្រជាពលរដ្ឋឡើយ ។ ផ្ទុយទៅវិញ វាជាការទទួលខុសត្រូវរបស់ក្រុមហ៊ុនប្រមូលសំរាម ។
ពិតហើយ មានប្រជាពលរដ្ឋមួយចំនួនបានបំពានបំរាមរបស់សាលារាជធានីភ្នំពេញ ដោយមិនបានទុកដាក់សំរាមឲ្យមានរបៀបរៀបរយ ឬមានសណ្តាប់ធ្នាប់នោះឡើយ ។ ចំណុចនេះ អាជ្ញាធរគួរតែមានវិធានការជាក់ស្តែងទៅលើបុគ្គល ដែលមិនគោរពច្បាប់ ។ ប៉ុន្តែអាជ្ញាធរគួរតែមានវិធានការផងដែរទៅលើការខកខានរបស់ក្រុមហ៊ុនដឹកជញ្ជូនដែលមិនបានភារកិច្ចឲ្យបានត្រឹមត្រូវ ។ នាងខ្ញុំចង់សួរទៅវិញថា បើក្រុមហ៊ុនមិនមកប្រមូលសំរាមឲ្យបានទៀងទាត់ តើអាជ្ញាធរអាចផាកពិន័យក្រុមហ៊ុននោះបានដែរឬទេ? នាងខ្ញុំសង្កេតឃើញថា បញ្ហាកើតឡើងសព្វថ្ងៃនេះ សំរាមចាល់ស្អុយគរដូចភ្នំ នៅកណ្តាលទីក្រុង ឬនៅជាយក្រុង ព្រោះតែក្រុមហ៊ុនប្រមូលសំរាមមិនប្រមូលឲ្យបានទៀតទាត់ ៕ ប្រជាពលរដ្ឋម្នាក់
