បុរសម្នាក់បើករថយន្តប្រដេញគ្នា ជ្រុលបុកយុវជនម្នាក់រងរបួស សង១៥០ដុល្លារបញ្ចប់រឿង

ភ្នំពេញ៖ បុរសម្នាក់បើករថយន្តប្រដេញគ្នាជាមួយរថយន្តមួយគ្រឿងទៀត បានរេចង្កូតជ្រុទៅបុក យុវជនម្នាក់ដើរតាមផ្លូវបណ្តាលឲ្យរងរបួសធ្ងន់ រួចបើករថយន្តត្រឡប់មកមើលជនរងគ្រោះវិញ ។

ហេតុការណ៍នេះ បានកើតឡើងកាលពីម៉ោង១០និង៣០នាទីយប់ ថ្ងៃទី១២ ខែវិច្ឆិកា ឆ្នាំ២០១៨ ស្ថិតនៅតាមបណ្តោយផ្លូវលេខ២៦១ កែងនឹងផ្លូវសហពន្ធ័រុស្ស៊ី ក្នុងសង្កាត់ទឹកល្អក់១ ខណ្ឌទួលគោក ក្រុងភ្នំពេញ ។

ប្រភពព័ត៌មាននៅកន្លែងកើតហេតុបានឲ្យដឹងថា មុនកើតហេតុ គេឃើញបុរសម្នាក់បើករថយន្តមួយគ្រឿងម៉ាក តូយ៉ូតាព្រូស ពណ៌ស ពាក់ស្លាកលេខ ភ្នំពេញ 2AU-8917 ធ្វើដំណើរតាមបណ្តោយផ្លូវលេខ ២៦៥ ក្នុងទិសដៅពីត្បូងទៅជើង បានបើកប្រដេញគ្នាជាមួយរថយន្តមួយគ្រឿងទៀតមិនចាំម៉ាក ខណៈមកដល់ចំណុចកើតហេតុ បានរេចង្កូតជ្រុលទៅបុកយុវជនម្នាក់ កំពុងដើរតាមផ្លូវបណ្តាលឲ្យដួលបោកនឹងថ្នល់រងរបួសក្បាល និងមាត់ធ្ងន់ធ្ងរ ។ ក្រោយមក ត្រូវបានរថយន្តសង្គ្រោះបន្ទាន់ដឹកយកសង្គ្រោះនៅមន្ទីរលោកសង្ឃ ។

បន្ទាប់ពីហេតុ ម្ចាស់រថយន្តបង្កបានបើករថយន្តត្រឡប់មកមើលជនរងគ្រោះនៅឯមន្ទីរពេទ្យភ្លាមៗផងដែរ និងបានចេញសំណងទៅឲ្យភាគីរងគ្រោះចំនួន១៥០ដុល្លារដើម្បីបញ្ចប់រឿង ៕ ជ្រោយពេជ្រ