សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រសៀលថ្ងៃពុធ ៧កើតខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៤ ខែវិច្ឆិកា ឆ្នាំ២០១៨ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចេញដីកាឃុំខ្លួន ជនសង្ស័យម្នាក់ ដែលជាមុខសញ្ញាចោរលួចម៉ូតូតាមផ្ទះប្រជាពលរដ្ឋក្នុងខណ្ឌឬស្សីកែវ ហើយត្រូវបានសមត្ថកិច្ចស្រាវជ្រាវតាមរយៈកាមេរ៉ាសុវត្ថិភាពរបស់ម្ចាស់ផ្ទះ ដោយកំណត់មុខសញ្ញាច្បាស់រហូតឈានទៅដល់ការឃាត់ខ្លួនយកមកសាកសួរបញ្ចប់នីតិវិធី ។
ជនសង្ស័យខាងលើឈ្មោះ រុន វិរៈ ភេទប្រុស អាយុ៣៩ឆ្នាំ មុខរបរជាជាងជួសជុលរថយន្ត ស្នាក់នៅមិនពិតប្រាកដ ចំណែកជនរងគ្រោះជាម្ចាស់ម៉ូតូឈ្មោះ លី គីមឡេង ភេទស្រី អាយុ៣៨ ឆ្នាំ មុខរបរលក់ដូរ រស់នៅសង្កាត់ទួលសង្កែទី១ ខណ្ឌឫស្សីកែវ។
គួររំលឹកផងដែរថា កាលពីវេលាម៉ោង៨និង២៧នាទីយប់ ថ្ងៃទី៥ វិច្ឆិកា ជនសង្ស័យបានធ្វើសកម្មភាពចូលលួចម៉ូតូរបស់ជនរងគ្រោះ មួយគ្រឿងម៉ាកហុងដា ស្កុបពី ពណ៌ខៀវ ឆ្នាំ២០១៧ ដែលមានពាក់ស្លាកលេខ ភ្នំពេញ ១.GM ២៥៩៩ បានសម្រេច នៅមុខផ្ទះលេខ ៥២៣F២ ផ្លូវលេខ ៩៩R សង្កាត់ទួលសង្កែទី១ ខណ្ឌឫស្សីកែវ ។ បន្ទាប់ពីជនសង្ស័យលួចម៉ូតូបាត់ទៅ ជនរងគ្រោះបានថតចម្លងរូបភាពសកម្មភាពក្នុងកាមេរ៉ាសុវត្ថិភាពដែលចោរចូលលួចនោះយកទៅប្តឹងសមត្ថកិច្ចមូលដ្ឋានភ្លាមៗផងដែរ ។
ក្រោយពីសមត្ថកិច្ចបានទទួលពាក្យបណ្តឹង និងពិនិត្យមើលក្នុងកាមេរ៉ាសុវត្ថិភាពរួច កម្លាំងនគរបាលការិយាល័យជំនាញព្រហ្មទណ្ឌកម្រិតស្រាលរាជធានីភ្នំពេញ ចុះធ្វើការស្រាវជ្រាវរហូតកំណត់បានមុខសញ្ញាលួច និងឈានដល់ការឃាត់ខ្លួនជនសង្ស័យបាន កាលពីថ្ងៃទី១០ វិច្ឆិកា ឆ្នាំ២០១៨ នៅចំណុចផ្លូវលេខ២៨៩ មុខពេទ្យប៉ាស្ទ័រ សង្កាត់បឹងកក់ទី២ ខណ្ឌទួលគោក ហើយកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីធ្វើការសាកសួរ ។ លុះរសៀលថ្ងៃទី១៤ ខែវិច្ឆិកា ឆ្នាំ២០១៨ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចេញដីកាឃុំខ្លួនជនសង្ស័យ ដាក់ពន្ធនាគារជាបណ្តោះអាសន្ន ៕ អារុណរះ
