ភ្នំពេញ ៖ រថយន្តសណ្ដោងរ៉ឺម៉កធុនធំមួយគ្រឿង បើកបរក្នុងល្បឿនលឿន ស្រាប់តែបែកកង់មុខបួងចង្កូតមិនទាន់ បុករះឡើងលើសួនច្បារផ្លូវ ៥០ ម៉ែត្រ ស្ថិតក្នុងភូមិហារ សង្កាត់ដង្កោ ខណ្ឌដង្កោ រាជធានីភ្នំពេញ កាលពីវេលាម៉ោង៣និង៣០នាទីរសៀល ថ្ងៃទី ២៤ ខែ ធ្នូ ឆ្នាំ ២០១៨ ។
តាមប្រភព័ត៌មានពីកន្លែងកើតហេតុបានឲ្យដឹងថា មុនដំបូងគេបានឃើញរថយន្តបង្កហេតុម៉ាក FUSO ពណ៌ខៀវ ពាក់ស្លាកលេខភ្នំពេញ 3E-4860 ធ្វើដំណើរយ៉ាងលឿនតាមបណ្តោយផ្លូវ៥០ម៉ែត្រ ទិសដៅពីលិចទៅកើតឆ្ពោះពីផ្លូវព្រៃសឡើងមកផ្លូវចំការដូង ប៉ុន្តែពេលបើកមកដល់ទីតាំងកើតហេតុស្រាប់តែរថយន្តបែកកង់មុខចំហៀងខាងឆ្វេង បណ្តាលឲ្យរថយន្តរេចង្កូតបុកឡើងសួនច្បារ និងបុកដើមឈើដែលដាំលើសួនបាក់អស់ជាច្រើនដើម ។
ប្រភពដដែលបន្តថា ក្នុងហេតុការណ៍មិនបណ្តាលឲ្យមានមនុស្សរងរបួសនោះទេ ហើយប្រជាពលរដ្ឋគិតថា ករណីនេះពិតសំណាងណាស់ដែលរថយន្តមិនរេចង្កូតបុករះបងប្អូនដែលកំពុងធ្វើដំណើរតាមផ្លូវនោះ ។
ក្រោយកើតហេតុ សមត្ថកិច្ចមូលដ្ឋានបានចុះដល់ទីតាំង និងបានឃាត់អ្នកបើកបររថយន្តបង្ករួចបានទំនាក់ទំនងទៅកម្លាំងជំនាញចុះមកវាស់វែង យករថយន្តបង្កទៅរក្សាទុកព្រោះដោយសាររថយន្តនេះបានធ្វើឲ្យទ្រព្យសម្បត្តិសាធារណៈរងការខូចខាត ៕ ភារ៉ាដង្កោ