សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ មន្ត្រីយោធាម្នាក់បានរងរបួសធ្ងន់ ដោយសារយុវជនស្រវឹងថ្នាំញៀន(ប្រើលើសកម្រឹត) យកកាំបិតចូលអារ ក ដល់ក្នុងផ្ទះខណមន្រី្តយោធារូបនេះកំពុងអង្គុយមើលទូរទស្សន៍។
ហេតុការណ៍នេះបង្កការភ្ញាក់ផ្អើលកាលពីព្រលប់ ថ្ងៃចន្ទ ២ រោច ខែ មិគសិរ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៤ ខែធ្នូ ឆ្នាំ២០១៨ នៅក្នុងភូមិល្វេថ្មី ឃុំប្រាំបីមុំ ស្រុកទ្រាំង ខេត្តតាកែវ។
ជនសង្ស័យឈ្មោះ សង សារ៉ាត់ (ហៅឆិច) ភេទប្រុស អាយុ២៤ឆ្នាំ រស់នៅភូមិល្វេថ្មី ឃុំប្រាំបីមុំ ស្រុកទ្រាំង ខេត្តតាកែវ មុខរបរកសិករ ត្រូវបានសមត្ថកិច្ចមូលដ្ឋានចាប់ខ្លួនបានភ្លាមៗក្រោយកើតហេតុបានតែបន្តិច។រីឯជនរងគ្រោះ ឈ្មោះ ទូច បញ្ញា ភេទប្រុស អាយុ៥៣ឆ្នាំ រស់នៅផ្ទះជិតគ្នានឹងជនសង្ស័យ មុខរបរ មន្ត្រីយោធាសឹករងតាកែវ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុជនរងគ្រោះកំពុងអង្គុយលើកៅអីមើលទូរទស្សន៍នៅក្នុងផ្ទះសុខៗ ស្រាប់តែជនសង្ស័យនៅផ្ទះជិតគ្នាដែលទើបចេញពីជក់សារធាតុញៀននៅព្រៃខាងកើតផ្ទះបានដើរចូលទៅផ្ទះជនរងគ្រោះ រួចយកកាំបិតកញ្ចែតចូលទៅអារ.កជនរងគ្រោះឆៅៗ ដោយពុំដឹងខ្លួនឡើយ។ ករណីនេះបណ្តាលឲ្យជនរងគ្រោះ របួសធ្ងន់នៅត្រង់កផ្នែកខាងមុខ នឹងរបួសស្នាមនៅប្រអប់ដៃឆ្វេង។ ពេលឃើញដូចនោះឈ្មោះ ម៉ុក សោភា ជាប្រពន្ធ និងឈ្មោះ ប៉ូ ពិសី ជាកូនស្រីជនរងគ្រោះ បានចូលទៅជួយចាប់ជនសង្ស័យបានជាមួយនិងវត្ថុតាងនៅខាងមុខផ្ទះប្រគល់ឲ្យសមត្ថកិច្ចតែម្តង ។
នៅចំពោះមុខសមត្ថកិច្ចជនសង្ស័យ បានបានប្រាប់ថា ខ្លួនគេមានគុំនំជាមួយជនរងគ្រោះជាយូរមកហើយដោយជនរងគ្រោះធ្វើអំពើពុំគប្បីដាក់គេ។ ជាលទ្ធផលជំនាញបានធ្វើតេស្តទឹកនោមឃើញជនសង្ស័យមានសារធាតុញៀនក្នុងទឹកនោមហើយត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្តតាកែវ ចាត់ការតាមនីតិវិធីច្បាប់ ជាមួយវត្ថុតាងកាំបិតកញ្ចែតមួយដើមផង ៕ សហការី
