សារព័ត៌មាន នគរវត្ត តែងតែនាំមុខគេជានិច្ច
បាត់ដំបង ៖ ផ្ទះឈើបណ្តែតលើទឹកចំនួន១ខ្នងនៅបឹងទន្លេសាបត្រូវភ្លើងឆាបឆេះអស់ទាំងស្រុងសមត្ថកិច្ច និងប្រជាពលរដ្ឋជួយធ្វើអន្តរាគមន៍រំដោះក្មេងតូច២នាក់ និងមនុស្សចាស់ម្នាក់ឲ្យផុតពីសេចក្តីស្លាប់ទាំងព្រលឹងនៅចុងសក់ ។
ហេតុការណ៍មានអគ្គិភ័យនេះបានកើតឡើងកាលពីព្រឹកថ្ងៃអង្គារ ១០ កើត ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវ និង ថ្ងៃទី១៥ខែមករាឆ្នាំ២០១៩ នៅចំណុចផ្ទះលេខ៤៥៦ក្នុងក្រុមទី៦ភូមិអន្លង់តាអួរឃុំកោះជីវាំងស្រុកឯកភ្នំខេត្តបាត់ដំបង ។
មន្ត្រីនគរបាលស្រុកឯកភ្នំ បានឲ្យដឹងថា មូលហេតុនៃការឆាបឆេះនេះ ផ្តើមចេញពីក្នុងផ្ទះឆ្លងចរន្តអគ្គិសនី ខណៈគេឃើញបែកផ្កាភ្លើងចេញពីក្នុងផ្ទះ ហើយបានមួយសន្ទុះបង្កជាអណ្តាតភ្លើងឆាបឆេះយ៉ាងសន្ធោសន្ធៅពេញបន្ទុកមួយរំពេចតែម្តង ។ ភ្លាមៗនោះដែរ ប្រជាពលរដ្ឋរស់នៅជិតខាង និងអាជ្ញាធរមូលដ្ឋាន បានស្ទុះចូលទៅរំដោះក្មេងតូចៗចំនួន២នាក់ និងមនុស្សចាស់ម្នាក់ចេញពីក្នុងផ្ទះសឹងមិនទាន់ ។ ចំណែកម្ចាស់ផ្ទះរងគ្រោះឈ្មោះ សែន សុខភិន អាយុ៣៨ឆ្នាំ ក្នុងពេលកើតហេតុ រវល់ទៅយាមសត្វ នៅតំបន់អភិរក្ស និងប្រពន្ធមាន ឈ្មោះ សែម ឡាក់គី អាយុ៣២ឆ្នាំ រវល់ទៅលក់បង្អែមនៅខាងក្រៅផ្ទះជារៀលថ្ងៃដោយបានផ្ញើកូនតូច អាយុ៥ឆ្នាំ ម្នាក់ និងអាយុ១១ឆ្នាំ ម្នាក់ ឲ្យម្តាយមីងជួយមើលការខុសត្រូវ ។
យ៉ាងណាឧបទ្ទវហេតុនេះ ត្រូវម្ចាស់ផ្ទះអះអាងថា បានបំផ្លាញទ្រព្យសម្បត្តិអស់ជាច្រើននៅក្នុងភ្នក់ភ្លើងមានគ្រឿងអលង្ការមានតម្លៃ រួមទាំងប្រាក់ប្រហែលជាង៦០លានរៀលផងដែរ៕ សហការី
