សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ លោក អ៊ូ សុខខឿន អនុប្រធានមន្ទីរ ការងារ និងបណ្តុះបណ្តាលវិជ្ជាជីវៈខេត្តស្វាយរៀង បានថ្លែងថា នៅព្រឹកថ្ងៃទី១៧ ខែមករា ឆ្នាំ២០១៩ កម្មករ កម្មការិនីរោងចក្រផលិតស្បែកជើង KINGMAKERS ក្នុងតំបន់សេដ្ឋកិច្ចពិសេសមេនហាតធេន ស្ថិតនៅភូមិតាបិប សង្កាត់បាវិត ក្រុងបាវិត បានចូលធ្វើការងារជាធម្មតាវិញហើយ ខណៈមិនបានធ្វើកូដកម្មនោះទេ ។
លោកបានបន្តថា ចំពោះការចូលបម្រើការងារក្នុងរោងចក្រវិញនោះ បន្ទាប់ពីថៅកែរោងចក្របាននិយាយថា ព្រមបើកប្រាក់ឲ្យកម្មករកម្មការិនីតែ៣០ភាគរយប៉ុណ្ណោះ ប៉ុន្តែលោកមិនដឹងថា ក្រុមកម្មករយល់ព្រម ឬមិនយល់ព្រមនោះទេ លុះព្រឹកឡើងថ្ងៃទី១៧ ខែមករា ឆ្នាំ២០១៩ ស្រាប់តែចូលធ្វើការវិញជាធម្មតាដោយមិនមានអ្នកណាម្នាក់ធ្វើកូដកម្មអ្វីទេ ។
សូមបញ្ជាក់ថា កម្មករ កម្មការិនី ប្រមាណ២ពាន់នាក់ បានលើកគ្នាបាតុកម្មតវ៉ាទាមទារប្រាក់៥០ភាគរយ ដែលថៅកែរោងចក្រផលិតស្បែកជើង KINGMAKERS ប្រកាសព្យួរការងាររយៈពេល១ខែ ដោយលើកហេតុផលថា គ្មានអ្នកបញ្ជាទិញ ។
ករណីផ្ទុះបាតុកម្មនេះកើតឡើងតាំងពីថ្ងៃទី១១ ខែមករា ឆ្នាំ២០១៩ នៅរោងចក្រឃីងម៉េកឃើរ KINGMAKERS ក្នុងតំបន់សេដ្ឋកិច្ចពិសេសមេនហាតធេន ស្ថិតនៅភូមិតាបិប សង្កាត់បាវិត ក្រុងបាវិត ។
លោក អ៊ូ សាខឿន អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត និងជាសមាជិកអចិន្ត្រៃយ៍នៃគណកម្មាធិការកណ្តាលប្រចាំនៅតំបន់សេដ្ឋកិច្ចពិសេសក្រុងបាវិត បានឲ្យដឹងថា មូលហេតុកម្មករ កម្មការិនីបាតុកម្ម គឺដោយសារថៅកែររោងចក្រផលិតស្បែកជើង ប្រកាសសុំព្យួរការងារកម្មកររយៈពេល១ខែ មូលហេតុគ្មានអ្នកបញ្ជាទិញ ហើយការបាតុកម្មតវ៉ានេះកម្មករ កម្មការិនីបានទាមទារសុំឲ្យថៅកែរបើកប្រាក់៥០ភាគរយឲ្យកម្មករ ក៏ប៉ុន្តែភាគីថៅកែងរោងចក្រមិនយល់ព្រម ទើបផ្ទុះការតវ៉ា ដោយនាំគ្នាធ្វើបាតុកម្មបែបនេះ ៕ យឹមសុថាន
