សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ ក្នុងចំណោមបក្ខពួក២នាក់ ត្រូវកម្លាំងនគរបាលខណ្ឌដូនពេញ ឃាត់ខ្លួន ក្រោយពីពួកគេទាំង ២នាក់ ធ្វើសកម្មភាពឆក់កាបូបពីជនបរទេស បានសម្រេច តែរត់មិនរួច ។ ហេតុការណ៍បានកើតឡើងកាលពីម៉ោង ៤រសៀល ថ្ងៃទី២៦ ខែមករា ឆ្នាំ២០១៩ នៅតាមផ្លូវលេខលេខ១៨៤ ស្ថិតនៅក្នុងសង្កាត់ជ័យជំនៈ ខណ្ឌដូនពេញ រាជធានីភ្នំពេញ ។
សមត្ថកិច្ចបានឲ្យដឹងថា ជនសង្ស័យឈ្មោះ អន់ ស៊ីដេត អាយុ ២០ឆ្នាំ មុខរបរ មិនពិតប្រាកដ ស្នាក់នៅផ្ទះភូមិព្រែកតាអុង ឃុំពាមឧកញ៉ាអុង ស្រុកល្វាឯម ខេត្តកណ្តាល និងម្នាក់ទៀតឈ្មោះ អាលុង អាយុប្រហែល ២០ឆ្នាំជាង មុខរបរ មិនពិតប្រាកដ ស្នាក់នៅផ្ទះខាងក្រោយប៉ុស្តិ៍នគរបាលទួលសង្កែ ភូមិផ្សារតូច សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ ។
ប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកើតហេតុ គេឃើញមានជនជាតិបរទេសចំនួន ២នាក់ បានធ្វើដំណើរតាមផ្លូវលេខលេខ១៨៤ ខណៈមកដល់កន្លែងកើតហេតុ ស្រាប់តែមានជនសង្ស័យចំនួន ២នាក់ ជិះម៉ូតូ មួយគ្រឿង ម៉ាក ហុងដាសង់ សេ១២៥ ពណ៌ខ្មៅ ពាក់ស្លាកលេខ ភ្នំពេញ 1GE-8005 បានជិះមកជិតរួចបានធ្វើសកម្មភាពឆក់កាបូបរបស់ជនបរទេសខាងលើបានសម្រេច តែត្រូវកម្លាំងសមត្ថកិច្ចនៅជិតនោះ ដេញតាមរហូតឃាត់ខ្លួនជនសង្ស័យបានម្នាក់ រឺឯម្នាក់ទៀតបានរត់គេចខ្លួនបាត់តែម្តង ។
ក្រោយពេលកើតហេតុ កម្លាំងសមត្ថកិច្ចបានបញ្ជូនខ្លួនជនសង្ស័យ មកកាន់អធិការដ្ឋាននគរបាលខណ្ឌដូនពេញ ដើម្បីសាកសួរស្វែងរកឃាត់ខ្លួនបក្ខពួកម្នាក់ទៀតយកមកផ្តន្ទាទោសទៅតាមច្បាប់ ៕ ជ្រោយពេជ្រ
