សារព័ត៌មាន នគរវត្ត តែងតែនាំមុខគេជានិច្ច
ខ្ញុំបាទជាប្រជាពលរដ្ឋមួយរូប រស់នៅក្រុងសែនមនោរម្យ ខេត្តមណ្ឌលគិរី កំពុងតាមមើលព័ត៌មានពាក់ព័ន្ធនឹងការបង្ក្រាបបទល្មើសព្រៃឈើនៅខេត្តមណ្ឌលគិរី ។ ខ្ញុំបាទសាទរចំពោះចំណាត់ការរបស់អាជ្ញាធរមានសមត្ថកិច្ច ក្នុងការចាត់វិធានការចំពោះឈ្មួញ ដែលរកស៊ីល្មើសច្បាប់ ។ ប៉ុន្តែមិនទាន់ឃើញមានចំណាត់ការចំពោះអាជ្ញាធរដែលពាក់ព័ន្ធ ឬអ្នកបណ្តែតបណ្តោយឲ្យមានបទល្មើសព្រៃឈើនេះនៅឡើយទេ ។ ដូច្នេះនៅពេលខាងមុខ មន្ត្រីដែលឃុបឃិតបណ្តែតបណ្តោយឲ្យមានបទល្មើស អាចនឹងត្រូវរ៉ូវជាមួយពួកឈ្មួញដទៃទៀត ប្រព្រឹត្តបទល្មើសនៅថ្ងៃក្រោយទៀត ។ ដូច្នេះ អាជ្ញាធរថ្នាក់ជាតិគួរកាត់ឫសគល់នៃបទល្មើសនេះ ពោលគឺត្រូវមានអ្នកទទួលខុសត្រូវខាងអាជ្ញាធរឲ្យប្រឈមចំពោះមុខច្បាប់ផង មិនមែនត្រឹមតែពួកឈ្មួញ ក្រុមស៊ឹង សំអុលនោះទេ ។
មិនមែនតែខ្ញុំបាទម្នាក់នោះទេ ដែលដឹងរឿងខ្លះៗ អំពីបញ្ហាបទល្មើសព្រៃឈើនៅខេត្តនេះ ។ ប៉ុន្តែមន្ត្រីរាជការ ប្រជាពលរដ្ឋធម្មតា សុទ្ធតែបានដឹងថា ការរកស៊ីល្មើសច្បាប់របស់ឈ្មួញ ស៊ឹង សំអុល អាចដំណើរការដោយរលូនរហូតមានរថយន្តធំៗជាង៤០គ្រឿងចូលក្នុងព្រៃដើម្បីដឹកឈើចេញនោះ គឺមានពាក់ព័ន្ធនឹងមន្ត្រីជាន់ខ្ពស់នៅខេត្តមណ្ឌលគិរីនោះតែម្តង ។ ពោលគឺសមត្ថកិច្ចគ្រប់ជាន់ថ្នាក់ សុទ្ធតែទទួលបានលាភសក្ការពីឈ្មួញ ស៊ឹង សំអុល ដូច្នេះ គួរតែមានអាជ្ញាធរថ្នាក់ខ្ពស់រួមទទួលខុសត្រូវក្នុងការបណ្តែតបណ្តោយឲ្យមានបទល្មើសនេះ នៅគ្រាដែលគេដឹងថា កូនប្រសារបស់ថ្នាក់ដឹកនាំខេត្ត ជំពាក់វាក់វិនក្នុងបទល្មើសព្រៃឈើនេះដែរ ។ ករណីនេះ ពលរដ្ឋ មន្ត្រីរាជការ ក្នុងខេត្តមណ្ឌលគិរី សុទ្ធតែដឹងគ្រប់ៗគ្នា ។
យុទ្ធនាការប៉ុន្មានថ្ងៃនេះ ហាក់ដូចជាបានធ្វើឲ្យប្រជាពលរដ្ឋអស់សង្ឃឹម ពីព្រោះថា មានជនពាក់ព័ន្ធនឹងបទល្មើសនេះជាច្រើននាក់ មិនត្រូវបានសមត្ថកិច្ចចាត់វិធានការនោះឡើយ ផ្ទុយទៅវិញ មានតែក្រុមឈ្មួញស៊ឹង សំអុលប៉ុន្មាននាក់ប៉ុណ្ណោះ ដែលត្រូវបានឃាត់ខ្លួន ។ ការដែលអាជ្ញាធរមានសមត្ថកិច្ចមិនចាត់វិធានការជនពាក់ព័ន្ធក្នុងដែនសមត្ថកិច្ចរបស់រដ្ឋ បានធ្វើឲ្យប្រជាពលរដ្ឋអស់សង្ឃឹម ហើយថា ការអនុវត្តច្បាប់នេះ ហាក់ដូចជាមិនបានគ្រប់ជ្រុងជ្រោយ ឬជាការអនុវត្តច្បាប់សម្តៅតែទៅលើបុគ្គលស៊ឹង សំអុល និងគូកនប៉ុណ្ណោះ ។ ដូច្នេះដើម្បីឲ្យប្រជាពលរដ្ឋជឿជាក់ទៅលើការអនុវត្តច្បាប់សម្រាប់មនុស្សទូទៅ គួរតែចាត់វិធានការផងដែរចំពោះអាជ្ញាធរថ្នាក់ដឹកនាំខេត្ត ដែលគេជឿថា មានពាក់ព័ន្ធយ៉ាងជ្រៅក្នុងជំនួញឈើដ៏ធំធេងនេះ ។
ក្រៅតែពីអាជ្ញាធរខេត្ត ដែលជាអ្នកមានសិទ្ធិអនុញ្ញាតឲ្យមានបទល្មើសនោះ ក៏មានមន្ត្រីមានសមត្ថកិច្ចមួយចំនួនទៀតដែលគេដឹងឮគ្រប់ៗគ្នាថា ក៏មានជាប់ពាក់ព័ន្ធក្នុងបទល្មើសទ្រង់ទ្រាយធំនេះដែរ ហើយឈ្មួញក៏មិនមែនមានតែក្រុមឧកញ៉ាស៊ឹង សំអុលនោះដែរ ដែលជាអ្នករកស៊ីឈើនៅក្នុងខេត្តមណ្ឌលគិរី ។ ព្រៃឈើនៅតំបន់ណាំលៀ ក៏រងនូវការកាប់បំផ្លាញពីសំណាក់ក្រុមលោក សារឿន ម៉ាប់ ក្រោមការសម្របសម្រួលរបស់នាយកដែនជម្រកសត្វព្រៃនេះដែរ ។ នាយកដែនជម្រកសត្វព្រៃត្រូវគេបង្ហើបថា ក្រៅតែពីជាប់ពាក់ព័ន្ធជាមួយឈ្មួញសារឿន ម៉ាប់ ក៏ជាអ្នកដើរតួនាទីជាអ្នកសម្របសម្រួលបទល្មើសនៅក្នុងខេត្តនេះតែម្តង ។ គាត់ជាមេដ្យាទ័រ ដ៏ធំ ដែលក្លាយទៅជាឧកញ៉ា តែមួយប៉ព្រិចភ្នែកដោយសារតែការរួមចំណែកកសាងបទល្មើសព្រៃឈើនៅក្នុងខេត្តមណ្ឌលគិរី ៕ ប្រជាពលរដ្ឋម្នាក់
