រថយន្ដចុះពីលើភ្នំ ដាច់ហ្វ្រាំង ក្រឡាប់ជាច្រើនត្រឡប់ ខូចរថយន្ដទាំងស្រុង តែរងរបួសមនុស្ស៣នាក់ប៉ុណ្ណោះ

ខេត្តឧត្ដរមានជ័យ៖ រថយន្ដដាច់ហ្វ្រាំងពេលចុះពីលើភ្នំដងរ៉ែកក្រឡាប់ជាច្រើនត្រឡប់ ខូចរថយន្ដទាំងស្រុង ប៉ុន្តែគ្រាន់តែរងរបួសមនុស្សបីនាក់ប៉ុណ្ណោះ ។

ហេតុការណ៍នេះកើតឡើងកាលពីវេលាម៉ោងពីរសៀលថ្ងៃទី១៨ ខែកក្កដា ឆ្នាំ២០១៩ ស្ថិតនៅលើកំណាត់ផ្លូវជាតិលេខ៦៧ ចំណុចចំរាក់ទី១ ផ្លូវឡើងភ្នំ ស្ថិតនៅភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្ដរមានជ័យ ។

សាក្សីនៅកន្លែងកើតហេតុបានឲ្យដឹងថា ដោយរថយន្តម៉ាក់ត្រៃណូ ពណ៌លឿង ពាក់ស្លាកលេខភ្នំពេញ 5A 0829 បើកបរចុះពីលើភ្នំ ដល់ចំណុចកើតហេតុបានដាច់ហ្វ្រាំងក្រឡាប់ធ្លាក់ពីលើផ្លូវ បណ្តាលឲ្យរងរបួសធ្ងន់ ចំនួន ០៣ នាក់ ប្រុស និងរថយន្តត្រូវខូចទាំងស្រុង។

សមត្ថកិច្ចបានឲ្យដឹងថាអ្នករងរបួស ១- ឈ្មោះ ឈួន អូរ ភេទប្រុស អាយុ២៣ ឆ្នាំ រស់នៅភូមិសាវាំង ឃុំស្វាយជ្រុំ ស្រុកមេសាង ខេត្តព្រៃវែង រងរបួសធ្ងន់ ( ជាអ្នកបើកបរ ) ២- ឈ្មោះ កែង ផ្លូវ ភេទប្រុស អាយុ៤០ ឆ្នាំ រស់នៅភូមិជាមួយគ្នា រងរបួសធ្ងន់ និង ៣- ឈ្មោះ លឺញ ម៉ៅ ភេទប្រុស អាយុ១៨ ឆ្នាំ រស់នៅភូមិជាមួយគ្នា រងរបួសធ្ងន់។

ក្រោយពេលកើតហេតុ អធិការនគរបាលស្រុកអន្លង់វែង បានចាត់កម្លាំងចុះទៅកាន់កន្លែងកើតហេតុភ្លាមៗ ដើម្បីជួយធ្វើការអន្តរាគមន៍យកជនរងគ្រោះ មកកាន់បន្ទីពេទ្យបង្អែកស្រុក ដើម្បីសម្រាកព្យាល ៕ ប៉ែននួន