សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានរងរបួសធ្ងន់បាក់ក ជើងខាងស្ដាំ ខណៈដែលជួបករណីគ្រោះថ្នាក់ចរាចរណ៏ជិះម៉ូតូបុកគោយន្តដឹកទឹកកកពីក្រោយពេញទំហឹងបង្កការភ្ញាក់ផ្អើល កាលពីវេលាម៉ោង៩ព្រឹក នៅថ្ងៃទី១៣ ខែសីហា ឆ្នាំ២០១៩ លើផ្លូវជាតិលេខ១ ចន្លោះបង្គោលគីឡូម៉ែត្រលេខ១៣១ និង១៣២ ត្រង់ចំណុចភូមិទន្លៀង ឃុំរមាំងថ្កោល ស្រុកស្វាយទាប ខេត្តស្វាយរៀង ។
បើតាមសមត្ថកិច្ចនគរបាលស្រុកបានឲ្យដឹងថា បុរសរងគ្រោះមានឈ្មោះ ស៊ន ហុន អាយុជាង២០ឆ្នាំ រស់នៅភូមិឃុំកណ្តៀងរាយ ស្រុកស្វាយទាប ខេត្តស្វាយរៀង ។
ចំណែកអ្នកបើកគោយន្តត្រូវបានស្គាល់ឈ្មោះកឹម សឿន ភេទប្រុស អាយុ៤១ឆ្នាំ មុខមុខរបរលក់ទឹកកក រស់នៅភូមិទួលអង្គប់ ឃុំសំបួរ ស្រុកស្វាយទាប ខេត្តស្វាយរៀង ។
បើតាមសាក្សីបានឲ្យដឹងថាមុនកើតហេតុមានគោយន្តដឹកទឹកកកមួយគ្រឿង ពណ៌បៃតង គ្មានស្លាកលេខ ធ្វើដំណើរទៅទិសខាងលិច ហើយក៏បានឈប់នៅទ្រូងផ្លូវ ស្រាប់តែមានម៉ូតូមួយគ្រឿងម៉ាក ហុងដា ឌ្រីមី ស៊េរីឆ្នាំ២០១៧ ពណ៌ខ្មៅ ពាក់ស្លាកលេខស្វាយរៀង ១J ២២០៤ក្នុងទិសដៅ ពីកើតទៅលិចបុកពីក្រោយពេញទំហឹង បណ្ដាលឲ្យរងរបួសធ្ងន់ ត្រូវបានសមត្ថកិច្ចដឹកមកសង្គ្រោះនៅមន្ទីរពេទ្យបង្អែកស្រុកស្វាយទាប ។
ចំណែកមធ្យោបាយធ្វើដំណើរទាំងពីរគ្រឿង ត្រូវបានសមត្ថកិច្ចវាស់វែង និងអូសយកមករក្សាទុកនៅអធិការដ្ឋាននគរបាលស្រុកស្វាយទាប ដើម្បីចាត់ការបន្តតាមច្បាប់ ៕ យឹម សុថាន
