សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ ផ្ទះឈើមួយខ្នងរបស់ប្រជាពលរដ្ឋត្រូវបានអគ្គិភ័យឆាបឆេះទាំងស្រុង ក្នុងពេលដែលម្ចាស់ផ្ទះមិននៅ ។ ហេតុការណ៍គ្រោះអគ្គិភ័យនេះបានកើតឡើងកាលពីវេលាម៉ោង៣ និង២០នាទីរសៀល ថ្ងៃទី២១ ខែសីហា ឆ្នាំ២០១៩ ស្ថិតក្នុងភូមិព្រៃគ្រីជើង ឃុំព្រៃគ្រី ស្រុកជលគិរី ខេត្តកំពង់ឆ្នាំង ។
សមត្ថកិច្ចបានឲ្យដឹងថា ផ្ទះដែលត្រូវអគិ្គភ័យឆេះបំផ្លាញនេះ មានទំហំ៥ម៉ែត្រ គុណ៧ម៉ែត្រ ធ្វើពីឈើប្រក់ស័ង្កសី ក្រាលក្តារ ដែលមានម្ចាស់ឈ្មោះ សោ អៃ ភេទស្រី អាយុ៥៣ឆ្នាំ ។
សមត្ថកិច្ចបានឲ្យដឹងថា នៅមុនពេលកើតហេតុ ម្ចាស់មិននៅផ្ទះ ហើយបានទុស្សេខ្សែភ្លើងបណ្តាលឲ្យមានផ្កាភ្លើងឆាបឆេះសន្ធោសន្ធៅតែម្តង នៅក្នុងពេលកើតហេតុនោះ រថយន្តពន្លត់អគ្គិភ័យមួយគ្រឿងរបស់អធិការដ្ឋាននគរបាល ស្រុកជលគិរី បានចេញអន្តរាគមន៍ បាញ់ទឹកពន្លត់ភ្លាមៗផងដែរ ទើបភ្លើងមិនអាចឆេះរាលដាលទៅកន្លែងផ្សេងទៀតបាន ។
ចំពោះមូលហេតុ នៃគ្រោះថ្នាក់សង្គមនេះត្រូវសមត្ថកិច្ចដាក់ការសង្ស័យថាបណ្តាលមកពីទុស្សេខ្សែភ្លើង ។ អគ្គិភ័យនេះ បានបង្កឲ្យឆេះខោអាវ ស្រូវ២បេ ទូរស្សន៍ ១ គ្រឿង និងលុយ ១ លាន រៀលផងដែរ ៕ ចន្ថា
