ព័ត៌មានទាន់ហេតុការណ៍៖

សង្ស័យ​ប្រើប្រាស់ថ្នាំ​លើសកម្រិត​ ខាងស្រី​បែកពពុះមាត់ស្លាប់​ ខណៈ​ខាងប្រុសបញ្ជូនទៅសង្គ្រោះ​នៅ​មន្ទីរពេទ្យ​

ចែករំលែក៖

ខេត្តកណ្តាល​ ៖ នារី​ម្នាក់បែកពពុះមាត់ផុត​ដង្ហើម​នៅក្នុងបន្ទប់​ និង​ជន​រងគ្រោះ​ជា​មនុស្សប្រុស​ម្នាក់​ទៀត​ មាន​អាការៈ​ពុលធ្ងន់ធ្ងរ​ ត្រូវ​បាន​បញ្ជូនទៅសង្គ្រោះ​នៅ​មន្ទីរ​ពេទ្យ​ ខណៈ​នៅ​ក្បែរ​ជនរងគ្រោះ​គេរកឃើញ​ សំបក​ថ្នាំ TRAUIC ប្រើ​អស់​ចំនួន​៤​បន្ទះ​ សំបក​ប្រអប់​២ និង​សំបក​ថ្នាំ Laroxyl មាន​១​បន្ទះ ប្រើ​អស់​៣០​គ្រាប់ MIRAL GINE អស់​១៨​គ្រាប់ TRAVIC អស់​៣៩​គ្រាប់​ ជា​ហេតុ​គេដាក់ការសង្ស័យថា​ បាន​ប្រើប្រាស់ថ្នាំប្រភេទនេះលើសកម្រិត​ ក្នុងចេតនាសម្លាប់ខ្លួន​ ។

តាម​ព័ត៌មាន​អោយដឹងថា​ ហេតុការណ៍​នេះកើតឡើង​នៅ​ចំណុច​បន្ទប់​លេខ A101 ផ្ទះសំណាក់​យីហោ សុខា សម្បត្តិ ផ្លូវ​១១០ ភូមិ​ថ្មី​២ សង្កាត់​តាខ្មៅ ក្រុង​តាខ្មៅ ខេត្តកណ្តាល វេលា​ម៉ោង​១៥​និង​១០​នាទី ថ្ងៃទី​៣១ ខែ​ សីហា ឆ្នាំ​២០១៩ ។​

នៅពេលចុះពិនិត្យ​សមត្ថកិច្ច​​ឲ្យ​ដឹងថា សព​ ជនរងគ្រោះ​ឈ្មោះ មួន ស្រី​នឿន ភេទ​ស្រី អាយុ​២៩​ឆ្នាំ ជនជាតិខ្មែរ មុខរបរ​កម្មករ​រោងចក្រ​កាត់ដេរ ស្នាក់នៅ​ភូមិ​លេខ​៤ សង្កាត់​ស្វាយ​រលំ ក្រុង​តាខ្មៅ ខេត្តកណ្តាល មាន​ស្រុកកំណើត ភូមិ​ឱ​ម៉ា​ល ឃុំ​អំពិល​ទឹក ស្រុក​កំពង់ត្រឡាច ខេត្តកំពង់ឆ្នាំង​ និងជនរង​គ្រោះ​ទី២ឈ្មោះ យ៉ែម នៅ ភេទ​ប្រុស អាយុ​៣២​ឆ្នាំ ស្រុកកំណើត ស្រុ​កំពង់ត្របែក ខេត្តព្រៃវែង កំពុងធ្វើការ​សង្គ្រោះបន្ទាន់​នៅ​មន្ទីរពេទ្យ​ជ័យជំនះ ក្រុង​តាខ្មៅ ។

តាមរយៈ​ការបំភ្លឺជូនសមត្ថកិច្ចពីឈ្មោះ ជួន កុសល ភេទ​ប្រុស អាយុ​៣៤​ឆ្នាំ មុខរបរ​សន្តិសុខផ្ទះសំណាក់កើតហេតុបានអោយដឹងថា​ នៅ​វេលា​ម៉ោង​ប្រហែល​១៤​រសៀល ថ្ងៃ​ទី​៣១ ខែសីហា ឆ្នាំ​២០១៩​ បានមក​មើល​ភ្ញៀវ​នៅផ្ទះ​សំណាក់​ខាងលើ ដោយសារ​ដល់​ម៉ោង​សំអាត​បន្ទប់ និង​ដល់​ម៉ោង​ដើម្បី​ឲ្យ​ភ្ញៀវ​បង់លុយ​ថ្មី​ទៀត បាន​ទៅ​គោះទ្វារ​បន្ទប់​លេខ A 101 តែ​ភ្ញៀវ​មិន​ព្រម​បើក​ក៏​យក​សោរ​បន្ទប់​មកចាក់ ហើយ​ឃើញ​ភ្ញៀវ​ខាង​ប្រុស​ឈ្មោះ យ៉ែម នៅ ភេទ​ប្រុស អាយុ​៣២​ឆ្នាំ បាន​ដើរ​ចុះ​ដើរ​ឡើង​ក្នុង​បន្ទប់​ក៏​សួរនាំ តែ​មិន​និយាយស្តី​អ្វី​ទេ ។

សាក្សី​បន្តថា​ បន្ទាប់មក​ដោយមាន​កា​រ​សង្ស័យ បាន​ហៅ​បុគ្គលិក​ផ្សេងទៀត​មកជួយ​មើល ឃើញ​ជនរងគ្រោះ​ឈ្មោះ មួន ស្រី​នឿន ដេក​បែកពពុះមាត់​នៅលើ​ពូក រួច​បាន​រាយការណ៍​ជូន​សមត្ថកិច្ច​ចុះ​ពិនិត្យ ។​

​តាមកំណត់ហេតុពីម្ចាស់ផ្ទះសំណាក់បាន​ បង្ហាញ​ថា​ បន្ទប់​លេខ A101 នេះ​ ឈ្មោះ យែ​ម នៅបាន​ចូលមក​សំរាក​នៅ​ថ្ងៃទី​២៩ ខែ​ សីហា ឆ្នាំ​២០១៩ នាវេលា​ម៉ោង​២០​៖២០​នាទី បន្ទាប់មក​ទើបឃើញខាង​ស្រី​ ​​ចូលមក​សម្រាក​នៅ​ថ្ងៃទី​៣០ ខែសីហា ឆ្នាំ​២០១៩ វេលា​ម៉ោង​១០​ព្រឹក ។ លុះដល់​ថ្ងៃទី​៣១​ខែសីហា ឆ្នាំ​២០១៩ ទើប​មានករណីនេះកើតឡើង​នៅក្នុងបន្ទប់នេះតែម្តង​ ។

​តាម​ការពិនិត្យ​របស់​សមត្ថកិច្ច​ជំនាញ​បច្ចេកទេស​ខេត្តកណ្តាល និង​នគរបាល​ផ្នែក​ពិនិត្យ​វិភាគ​កន្លែងកើតហេតុ​ក្រុង​តាខ្មៅ ព្រមទាំង​អាជ្ញាធរ និង​គ្រូពេទ្យ​អនុ​មន្ទីរពេទ្យ​ជ័យជំនះ បានធ្វើ​សន្និដ្ឋានថា ជនរងគ្រោះ​ពិតជា​បាន​ស្លាប់ ដោយសារ​ការប្រើប្រាស់​ថ្នាំ​ហួសកំណត់ ក្នុង​គោលបំណង​ធ្វើអត្តឃាត ។​

វត្ថុតាង​នៅ​កន្លែងកើតហេតុ​មាន ៖ សំបក​ថ្នាំ TRAUIC ប្រើ​អស់​ចំនួន​៤​បន្ទះ​, សំបក​ប្រអប់​២ និង​សំបក​ថ្នាំ Laroxyl មាន​១​បន្ទះ ប្រើ​អស់​៣០​គ្រាប់ MIRAL GINE អស់​១៨​គ្រាប់ TRAVIC អស់​៣៩​គ្រាប់ ។​

​ក្រោយ​ពិនិត្យ​ចប់សព្វគ្រប់ សាកសព​បាន​ប្រគល់ជូន​ក្រុមគ្រួសារ​យកទៅ​ធ្វើបុណ្យ​តាម​ប្រពៃណី​នៅ​ស្រុកកំណើត ។ ដោយឡែក ឈ្មោះ យ៉ែម នៅ ភេទ​ប្រុស អាយុ​៣២​ឆ្នាំ ស្រុកកំណើត ស្រុ​កំពង់ត្របែក ខេត្តព្រៃវែង កំពុងធ្វើការ​សង្គ្រោះបន្ទាន់​នៅ​មន្ទីរពេទ្យ​ជ័យជំនះ ក្រុង​តាខ្មៅ ៕ស្អាងជ័យ


ចែករំលែក៖