សមត្ថកិច្ចចុះបង្ក្រាបជនជាតិចិនជាង១០០នាក់ពាក់ព័ន្ធការស្នាក់នៅខុសច្បាប់ និងបើកល្បែងអនឡាញ 

ភ្នំពេញ ៖ ​កម្លាំងនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍ បានបើកប្រតិបត្តិការចាប់ខ្លួនជនជាតិចិន សរុប១០៥នាក់ ស្រី១០នាក់ នៅយប់ថ្ងៃទី០៩ ខែកញ្ញា ឆ្នាំ២០១៩នេះ ពាក់ព័ន្ធការស្នាក់នៅខុសច្បាប់ និងបើកល្បែងតាមអ៊ីនធ័រណេត (Game Online) ​ក្នុងអគារកម្ពស់៩ជាន់ នៅតាមបណ្ដោយផ្លូវទ្រុងមាន់ ស្ថិតក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។

លោកឧត្តមសេនីយ៍ទោ វឌ្ឍនៈ មង្គល បានឲ្យដឹង​ថា ទីតាំងដែលសមត្ថកិច្ចចុះបង្ក្រាបជនជាតិចិនទាំងអស់នេះ មានបំពាក់ស្លាកយីហោសាកលវិទ្យាល័យ «Excelpolitan University» ប៉ុន្ដែធាតុពិតទីតាំងនេះ បើកជួលឲ្យប្រព្រឹត្តអំពើល្មើសច្បាប់ទៅវិញ។ ក្នុងប្រតិបត្តិការនេះ សមត្ថកិច្ចក៏បានដកហូត កុំព្យទ័រលើតុ DeskTop ចំនួន៨០គ្រឿងផងដែរ។

លោកឧត្តមសេនីយ៍ទោ បន្ត​ថា ជនជាតិដែលសមត្ថកិច្ចចាប់ខ្លួននៅពេលនេះ ​មានខ្លះពាក់ព័ន្ធករណីស្នាក់នៅដោយខុសច្បាប់ និងខ្លះទៀត ពាក់ព័ន្ធករណីបើកលេងល្បែងស៊ីសងតាមអ៊ីនធឺ​ណេត។

​បច្ចុប្បន្នជនសង្ស័យខាងលើ​​​​ ត្រូវបានបញ្ចូនទៅនាយកដ្ឋានស៊ើបអង្កេត និងអនុវត្តនីតិវិធី ដើម្បីចាត់ការបន្ដតាមច្បាប់៕ សុខាសែនជ័យ​