សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ បុរស២នាក់បានស្លាប់ភ្លាមៗ នៅកន្លែងកើតហេតុ ក្នុងគ្រោះថ្នាក់ចរាចរណ៍រវាងរថយន្តបុកនឹងម៉ូតូ ។
ហេតុការណ៍នេះបានកើតឡើង កាលពីវេលាម៉ោង២០និង១៧នាទីថ្ងៃទី១០ ខែកញ្ញា ឆ្នាំ២០១៩ នៅត្រង់ចំណុចខាងជើងផ្លូវចុះភូមិភ្លង់ ចម្ងាយប្រហែល២០០ម៉ែត្រ លើផ្លូវក្រាលកៅស៊ូ ស្ថិតនៅក្នុងភូមិភ្លុង ឃុំលាងដៃ ស្រុកអង្គរធំ ខេត្តសៀមរាប ។
លោកវរសេនីយ៍ទោ ជ្រិញ គឹមនី អធិការនគរបាលស្រុកអង្គរធំ បានឲ្យដឹងថា គ្រោះថ្នាក់ចរាចរណ៍នេះបង្កឡើងរវាងរថយន្ត ម៉ាក់ អ៊ីស៊ុយស៊ុយ ពណ៌ទឹកប៊ិច ពាក់ស្លាកលេខ សៀមរាប 2A 8754 បើកបរទិសដៅពីជើងទៅត្បូង បានបុកនឹងម៉ូតូម៉ាកហុងដា ឌ្រីម ពាក់ស្លាកលេខ សៀមរាប 1X 2453 ដែលជិះឌុបគ្នា២នាក់ មានទិសដៅពីត្បូងទៅជើង ។
ក្រោយពេលកើតហេតុ អ្នកបើកបររថយន្តបានរត់គេចខ្លួនបាត់បណ្ដាលឲ្យអ្នកបើកបរម៉ូតូឈ្មោះ ឈិន វន ភេទប្រុស អាយុ២៤ឆ្នាំ រស់នៅភូមិសំរោង ឃុំលាងដៃ ស្រុកអង្គរធំ ខេត្តសៀមរាប និងអ្នករួមដំណើរឈ្មោះ ភិន រ៉េ ភេទប្រុស អាយុ២៣ឆ្នាំ នៅភូមិ ឃុំជាមួយគ្នា ខាងលើ (ទាំង២នាក់ស្លាប់) ។
ក្រោយពីកើតហេតុ កម្លាំងសមត្ថកិច្ចនគរបាលជំនាញស្រុក បានចុះទៅដល់ពិនិត្យកន្លែងកើតហេតុ និងវាស់វែងធ្វើកំណត់ហេតុ ដកហូតវត្ថុតាង យកមករក្សាទុកនៅអធិការដ្ឋាននគរបាលស្រុក ដើម្បីអនុវត្តនីតិវិធីបន្ត ។
មូលហេតុគ្រោះថ្នាក់នេះបណ្តាមកពីរថយន្តបើកបរក្នុងល្បឿនលឿន ហើយមិនប្រកាន់ស្តាំ ។ ចំណែកសាកសព សមត្ថកិច្ចបានប្រគល់ឲ្យទៅក្រុមគ្រួសារដើម្បីធ្វើបុណ្យតាមប្រពៃណី ។
បើតាមប្រភពព័ត៌មាន ពីកន្លែងកើតហេតុបានឲ្យដឹងថា អ្នកបើកបររថយន្តត្រូវបានគេស្គាល់ឈ្មោះថា ខាន ម៉ាង ជានាយករដ្ឋបាលនៅសាលាស្រុកអង្គរធំ ។ ប្រភពបន្តថា មុនពេលកើតជនបង្កបានជួបជុំមិត្តភក្តិស៊ីផឹក រហូតដល់ស្រវឹង ទើបបើកបររថយន្តចេញមក ក៏បង្កជាគ្រោះថ្នាក់នេះឡើង ៕ ប៊ុនរិទ្ធី
