រថយន្ដឡង់គ្រីស័រស៊េរីទំនើប បើកលឿនក្នុងក្រុងសៀមរាប បុកមនុស្សស្លាប់ម្នាក់ យ៉ាងអាណោចអាធ័ម

ខេត្តសៀមរាប៖ បុរសម្នាក់កំពុងបើកម៉ូតូ ត្រូវបានរថយន្តឡង់គ្រីស័រស៊េរីទំនើបមួយគ្រឿង បានបើកមកបុកចំពេញទំហឹង បណ្ដាលឲ្យស្លាប់នៅកន្លែងកើតហេតុ ។

ហេតុការណ៍នេះ កើតឡើងនៅលើផ្លូវជាតិលេខ៦ កាលវេលាម៉ោង៣និង៣០នាទីទៀបភ្លឺ ថ្ងៃទី១៦ ខែកញ្ញា ឆ្នាំ២០១៩ ស្ថិតនៅត្រង់ចំណុចផ្លូវបំបែកជាបួនភ្លើងស្តុបសុខា ភូមិមណ្ឌល២ សង្កាត់ស្វាយដង្គំ ក្រុងសៀមរាប ។

សមត្ថកិច្ចបានឲ្យដឹងថា រថយន្តឡង់គ្រីស័រ ពណ៌ស ពាក់ស្លាកលេខ ភ្នំពេញ ២BD ៥៨៧៨ អ្នកបើកបរមិនស្គាល់អត្តសញ្ញាណ រត់គេចខ្លួនបាត់ស្រមោលបន្សល់ទុករថយន្ដ បានបើកបរក្នុងល្បឿនលឿន ទិសដៅ ពីលិចទៅកើត បានទៅបុកម៉ូតូមួយគ្រឿងម៉ាក Zoomer X ពណ៌បៃតង ពាក់ស្លាកលេខសៀមរាប ១V- 5028 បណ្ដាលឲ្យ អ្នកបើកបរម៉ូតូឈ្មោះ ប៊ន ឡឹក ភេទប្រុស អាយុ២០ ឆ្នាំរស់នៅភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប ស្លាប់កន្លែងកើតហេតុ ។

សមត្ថកិច្ចបានបន្តថា ក្រោយពីកើតហេតុនគរបាលបានចុះទៅពិនិត្យធ្វើការវាស់វែង និងប្រគល់សាកសពជនរងគ្រោះឲ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែកយកវត្ថុតាងយកមករក្សាទុក នៅការិយាល័យនគរបាលចរាចណ៍ ដើម្បីអនុវត្តនីតិវិធីបន្ត៕ ប៊ុនរិទ្ធី