សារព័ត៌មាន នគរវត្ត តែងតែនាំមុខគេជានិច្ច
ដីរបស់រដ្ឋជាច្រើនកន្លែងក្រោមការគ្រប់គ្រងរបស់មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺច្រើនកន្លែង ត្រូវបានគេលក់បានលុយរាប់លានដុល្លារហែកចែកគ្នាទាំងថ្នាក់ដឹកនាំខេត្ត និងថ្នាក់ដឹកនាំក្រសួង ។ ករណីនេះ អ្នកដែលឆ្អែតចិត្តជាងគេ គឺមន្ត្រីនៃមន្ទីរកសិកម្មខេត្តកំពង់ស្ពឺ ចាស់វស្សាខ្លះចូលនិវត្តន៍ច្រើននាក់ មិនត្រូវបានគេឲ្យលិឌផងទេ ។ លោក ឈាង តុលា ប្រធានមន្ទីរកសិកម្មខេត្ត ដែលទើបមកកាន់តំណែងបានប៉ុន្មានឆ្នាំចុងក្រោយនេះ គឺជាមេចំណែក និងជាមេខ្លោងនៃការលក់ដីជាតិទាំងនោះ ។ បើទោះជាយ៉ាងណាក៏ដោយ ទាំងថ្នាក់ដឹកនាំខេត្ត លោក វ៉ី សំណាង ធ្វើជាមិនដឹងមិនឮ ។ គេជឿថា រឿងលក់ដីតម្លៃរាប់លានដុល្លារ ហើយអាជ្ញាធរខេត្តឆ្លើយថា មិនដឹង ដូចជាមិនទំនង ។ ពីព្រោះថា សូម្បីតែក្មេងបៀមដៃ ក៏ដឹងថា វាជាការទទួលខុសត្រូវរបស់ថ្នាក់ដឹកនាំខេត្តនេះដែរ ។
ប្រភពព័ត៌មានបានឲ្យដឹងថា លោក ឈាង តុលា គឺជាមេខ្លោងធំក្នុងការទាក់ទាញម៉ូយឲ្យមកទិញដីរបស់មន្ទីរកសិកម្មខេត្តកំពង់ស្ពឺ ច្រើនកន្លែងនោះ ។ គោលដៅរបស់លោកឈាង តុលា ដែលចេញពីមេព្រៃខេត្តស្ទឹងត្រែង មកធ្វើជាប្រធានមន្ទីរកសិកម្ម ខេត្តកំពង់ស្ពឺនោះ ក៏ព្រោះតែសំឡឹងឃើញដីជាតិជាច្រើនកន្លែងនៅក្រោមឱវាទរបស់មន្ទីរកសិកម្មខេត្តកំពង់ស្ពឺ អាចលក់ដូរបាន ។ ដូច្នេះវាជាការឃុបឃិតជាប្រព័ន្ធ ទាំងលោក ឈាង តុលា ផ្ទាល់ រួមនឹងថ្នាក់ដឹកនាំខេត្តកំពង់ស្ពឺ ។ គេរាយការណ៍ថា ដីជាច្រើនកន្លែងដូចជាទីតាំងរដ្ឋបាលព្រៃឈើកំពង់ស្ពឺជាប់ផ្លូវជាតិលេខ៤, ដីចម្ការប្រេងខ្យល់នៅភូមិព្រៃផ្តៅ ឃុំត្រពាំងទង ស្រុកសំរោងទង, ដីស្នាក់ការសង្កាត់រដ្ឋបាលព្រៃឈើស្រុកសំរោងទង ក៏ដូចជាដីរបស់មន្ទីរកសិកម្មខេត្តកំពង់ស្ពឺនោះផង ត្រូវបានលក់ក្នុងទឹកប្រាក់រាប់លានដុល្លារ ។ ការឃុបឃិតលក់ដីជាតិជាប្រព័ន្ធនេះ ធ្វើឲ្យមន្ត្រីនៃមន្ទីរកសិកម្មខេត្តកំពង់ស្ពឺចាស់ៗ បានត្រឹមក្អួតឈាមតែប៉ុណ្ណោះ ។
ប្រភពព័ត៌មានបានរាយការណ៍ថា ថៅកែ ឬអ្នកទិញដី បានឃុបឃិតជាមួយប្រធានមន្ទីរកសិកម្មនៅក្នុងតម្លៃផ្សេងមួយ ហើយការប្រកាសជាចំហរជាមួយថ្នាក់ដឹកនាំខេត្ត និងក្រសួងក្នុងតម្លៃមួយផ្សេង ។ និយាយឲ្យខ្លី គ្រាន់តែកុម្មុយស្យុង ក៏លោកឈាង តុលា សល់ខ្ទង់សែនដុល្លារដែរ ។ យ៉ាងណាក៏ដោយ បើទោះបីជាមានការរិះគន់ លាយឡំដោយទឹកភ្នែកពីមន្ត្រីចាស់ៗយ៉ាងណាក៏ដោយ ក៏លោក ឈាង តុលា ដែលទើបតែចូលមកកាន់តំណែង មិនដែលខ្វល់ ក្រៅតែខ្លួនបានសែនព្រេនថ្នាក់ដឹកនាំខេត្តរួចរាល់ហើយនោះ ។ ករណីនេះ មន្ត្រីនៃមន្ទីរកសិកម្មខេត្តកំពង់ស្ពឺ ស្នើឲ្យប្រមុខនៃរាជរដ្ឋាភិបាលពិចារណាឡើងវិញចំពោះការលក់ដីច្រើនកន្លែងនៅខេត្តកំពង់ស្ពឺនោះ ហើយជាពិសេសអង្គភាពប្រឆាំងអំពើពុករលួយគួរបើកការស៊ើបអង្កេតការលក់ដូរនោះផង ៕
