ព័ត៌មានទាន់ហេតុការណ៍៖

ខ្សឹបដាក់ត្រចៀក៖ កំពង់ចម្លងគ្រប់កន្លែង​នៅខេត្តកំពង់ចាម រថយន្តមួយគ្រឿង ថ្លៃ១ម៉ឺន៥ពាន់រៀល

ចែករំលែក៖

កំពង់ចម្លង​កាត់ទន្លេមេគង្គ ក្នុងភូមិសាស្ត្រខេត្តកំពង់ចាម សុទ្ធតែមានតម្លៃ​មួយម៉ឺនប្រាំពាន់រៀលសម្រាប់រថយន្តមួយគ្រឿង និងពេលយប់​ចាប់ពីម៉ោង​៦ទៅ ថ្លៃ៤ម៉ឺនរៀល ឬ១០ដុល្លារសហរដ្ឋអាមេរិក ។ គេមិនដឹងថា តើ​លោក​ អ៊ុន ចាន់ដា អភិបាលខេត្តកំពង់ចាម​បានជ្រាប​រឿងនេះដែរឬយ៉ាងណានោះទេ ហើយគិតថា វាជាតម្លៃសមរម្យ ឬក៏ថ្លៃពេក? បើតាម​ថៅកែកំពង់ចម្លងអះអាងដូចៗគ្នាថា តម្លៃនោះគឺកំណត់ដោយ​មន្ទីរសេដ្ឋកិច្ច និងហិរញ្ញវត្ថុខេត្តជាអ្នកកំណត់ ។ ដូច្នេះ អាចនិយាយបានថា ការកំណត់បែបនេះ ថ្លៃបន្តិចហើយ ។

អ្នកដំណើរទាំងឡាយដែលឆ្លងកាត់កំពង់ចម្លងភូមិថ្មី-ខ្ញូង ស្ថិតក្នុងស្រុកកំពង់សៀម ទៅស្រុកកោះសូទិន ខេត្តកំពង់ចាម អះអាងថា តម្លៃ​នៃការឆ្លង​ស្រឡាងសម្រាប់រថយន្តមួយគ្រឿងរហូតដល់១ម៉ឺន៥ពាន់រៀលនោះ ដូចជាថ្លៃបន្តិចហើយ ជាពិសេសនៅពេលយប់ ចាប់ពីម៉ោង៦ទៅ តម្លៃ៤ម៉ឹនរៀល ។ ជាងនេះទៅទៀត ការយកថ្លៃ​១ម៉ឺន៥ពាន់រៀល ឬ​៤ម៉ឺនរៀល មិនមានសំបុត្រ​ត្រឹមត្រូវនោះឡើយ ។ ការកំណត់តម្លៃ​ ឬការទារលុយ ពីម្ចាស់យានយន្តឆ្លងកំពង់ចម្លងទាំងឡាយ កាត់ទន្លេមេគង្គក្នុងភូមិសាស្ត្រខេត្តកំពង់ចាម អាស្រ័យទៅលើបបូរមាត់ថៅកែកំពង់ចម្លងប៉ុណ្ណោះ ។ នៅឯកំពង់ចម្លងពាមជីកង ម្តងម្កាល ម្ចាស់រថយន្តអះអាងថា គេយក២ម៉ឺនរៀលសម្រាប់រថយន្តមួយគ្រឿង ព្រោះដោយសារ​ទន្លេនៅម្តុំនោះ​វាធំ ទម្រាំដល់​ត្រើយចំណាយពេលយូរ និងអស់ប្រេងសាំងច្រើន ។

គេមិនដឹងថា តើ​ករណី​នៃការ​យកតម្លៃ​ឆ្លងស្រេចតែបបូរមាត់នេះ មានជ្រាបដល់ថ្នាក់ដឹកនាំខេត្តកំពង់ចាម ឬមួយក៏មានការដេញថ្លៃត្រឹមត្រូវ​យ៉ាងណានោះទេ​រវាងថៅកែកំពង់ចម្លង នឹងមន្ទីរសេដ្ឋកិច្ចហិរញ្ញវត្ថុខេត្ត ។ បើតាមការកត់សម្គាល់ គេសង្កេតឃើញថា ថៅកែកំពង់ចម្លង​មុខដដែល ហាក់ដូចជាមិនមានការដេញថ្លៃត្រឹមត្រូវ​នោះទេ ។ ហេតុដូច្នេះហើយ បានជា​តម្លៃនៃការឆ្លង​តាមកំពង់ចម្លងនានា​ស្រេចតែបបូរមាត់​របស់​ថៅកែ​កំពង់ចម្លងប៉ុណ្ណោះ ។ ករណីនេះ លោកអភិបាលខេត្តកំពង់ចាម មេត្តាពិនិត្យឡើងវិញផង ៕


ចែករំលែក៖