សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ចាប់ពីម៉ោង៧និង០០នាទីព្រឹកដល់ម៉ោង៩និង០០នាទីយប់ ថ្ងៃទី១៤ ខែតុលា ឆ្នាំ២០១៩ លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានបញ្ជាកម្លាំងគណៈបញ្ជាការឯកភាពខណ្ឌដូនពេញ ដឹកនាំដោយ លោក ចាន់ គន្ថេត អភិបាលរងខណ្ឌ និងលោក គឹម វុត្ថា ប្រធានប្រជាការពារខណ្ឌ រួមមានកម្លាំងសរុបចំនួន៦០នាក់ បែងចែក១០គោលដៅ បានចុះអនុវត្តច្បាប់ចរាចរផ្លូវគោក ដោយធ្វើកាចុះឃាត់រថយន្ត ធុនធំដែលបើកលើផ្លូវហាមឃាត់ រួមមាន មហាវិថីព្រះនរោត្តម មហាវិថីព្រះមុនីវង្ស វិថីព្រះស៊ីសុវត្ថិ សហព័ន្ធរុស្សី ព្រះសីហនុ ព្រះអង្គឌួង និងចេញ ចូលខុសម៉ោងកំណត់ ។
ក្នុងប្រតិបត្តិការនោះដែរ កម្លាំងជំនាញបានឃាត់រថយន្តធុនធំចំនួន៣គ្រឿង បញ្ជូនទៅស្នងការនគរបាលរាជធានីភ្នំពេញ ដើម្បីធ្វើការអប់រំណែនាំនិងផាកពិន័យតាមច្បាប់ ។
គួរបញ្ជាក់ថាកន្លងមក លោក សុខ ពេញវុធ អភិបាលខណ្ឌដូនពេញ បានមានប្រសាសន៍ថា ចំពោះប្រតិបត្តិការ ចាប់រថយន្តធុនធំដែលហ៊ានបើកលើផ្លូវហាមឃាត់នៅក្នុងមូលដ្ឋានខណ្ឌដូនពេញនេះដែរ ត្រូវធ្វើជាប្រចាំតែម្ដង ព្រោះបណ្ដោយផ្លូវទាំងនោះ គឺមហាវិថីព្រះនរោត្តម មហាវិថីព្រះមុនីវង្ស និង តីរវិថីព្រះស៊ីសុវត្ថិ មិនអនុញ្ញាតឲ្យមានរថយន្តធុនធំបើកឆ្លងកាត់នោះទេ ៕ ស តារា
