សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្រ្តីចំណាស់ម្នាក់ ជិះម៉ូតូចេញពីផ្ទះ ទៅរកឡានធ្វើដំណើរទៅខេត្ត ដើម្បីចូលរួមកម្មពីធីបុណ្យ មកដល់ដល់ពាក់កណ្តាលផ្លូវ ត្រូវជនសង្ស័យបើកម៉ូតូមកពីក្រោយ ឆក់កាបូបបានសម្រេច បណ្តាលឲ្យជនរងគ្រោះ ដួលអូសជាច្រើនម៉ែត្រ រងរបួស ហើយជនសង្ស័យបានគេចខ្លួនបាត់ស្រមោល។
ហេតុការណ៍នេះ បានកើតឡើងនៅម៉ោង៦ព្រឹកថ្ងៃទី១៩ ខែតុលា ឆ្នាំ២០១៩ នៅម្តុំស្តុបពេទ្យចិន តាមបណ្តោយផ្លូវព្រះមុនីវង្ស សង្កាត់ចតុមុខ ខណ្ឌដូនពេញ រាជធានីភ្នំពេញ ។
តាមសម្ដីស្ត្រីរងគ្រោះបានប្រាប់ឲ្យដឹងថា មុនកើតហេតុ រូបគាត់ បានជិះម៉ូតូចេញពីផ្ទះ នៅម្តុំបឹងត្របែក ទៅរករថយន្តដើម្បីធ្វើដំណើរទៅខេត្តក្រចេះ ចូលរួមកម្មវីធីបុណ្យកឋិន ខណ:ធ្វើដំណើរមកដល់កន្លែងកើតហេតុ តាមបណ្តោយផ្លូវព្រះមុនីវង្ស ម្តុំស្កុបពេទ្យចិន ក៏មានជនសង្ស័យបើកម៉ូតូយ៉ាងលឿន មកពីក្រោយរួចធ្វើសកម្មភាពឆក់កាបូបគាត់ បានសម្រេច បណ្ដាលឲ្យរូបគាត់ដួលអូសជាច្រើនម៉ែត្ររងរបួស ចំណែកជនសង្ស័យគេចខ្លួនបាត់ពីកន្លែងកើតហេតុ ។
បន្ទាប់ពីកើតហេតុ ស្រ្តីរងគ្រោះក៏បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចតុមុខ ដើម្បីអោយសមត្ថកិច្ចស្រាវជ្រាវតាមចាប់ជនសង្ស័យយកមកផ្តន្ទាទោស ៕ ជ្រោយពេជ្រ
