សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សាលមហោស្រពខ្សែភាពយន្តជាតិលើកទី០៦ ឆ្នាំ២០១៩ មានការចូលរួមពីបណ្ដាផលិតករ ដែលផលិតខ្សែភាពយន្តល្បីៗៗជាច្រើនដែលនៅក្នុងព្រះរាជាណាចក្រកម្ពុជា ដែលបានចូលរួមយកខ្សែភាពយន្តរបស់ខ្លួនមកដាក់បង្ហាញនិងធ្វើការប្រកួតប្រជែង ។ ក្នុងនោះគេសង្កេតឃើញថា សម្រាប់ឆ្នាំ២០១៩នេះ ទាំងគុណភាពនៃខ្សែភាពយន្តនិងចំនួនខ្សែភាពយន្ត ដែលយកមកប្រកួតប្រជែងឆ្នាំនេះ មានចំនួនការកើនឡើងរហូតដល់១៨ ។
មហោស្រពនេះ រៀបចំដោយនាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈកាលពីថ្ងៃទី២៥ខែវវិច្ឆិកាឆ្នាំ២០១៩ ។ ភាពយន្តទាំង ១៨រឿងដែលត្រូវបានដាក់បញ្ចូលដើម្បីប្រកួតប្រជែងគុណភាពក្នុងមហោស្រពភាពយន្តលើកទី៦នេះ មាន៖១/កំពូលអ្នកថតសែលហ្វី ២/មួយថ្ងៃនៅជនបទ ៣/ព្រឺ ៤/ត្បូងភ្លោះ ៥/ណូលីណូឡា ៦/លោកឪពុក ៧/ផ្ទះចុងភូមិ ៨/ព្រលឹង ៩/អនុស្សាវរីយ៍ចូលឆ្នាំ ១០/ស្នេហាក្មេងៗ ១១/វាលប្រមាញ់ ១២/ទាយាទអាគម ១៣/វិបល្លាស ១៤/ស្នេហ៍ស្វយ័គុណបួន ១៥/នាឡិកាដាសវិញ្ញាណ ១៦/រូហ្សា ៥ ១៧/ទារុណកម្មខ្មោច និងទី១៨ គឺរឿង “ធ្មប់” ។
ភាពយន្តទាំងអស់ នឹងត្រូវប្រកួតគ្នាដើម្បីទទួលបានពានរង្វាន់ជាភាពយន្តឆ្នើម ។ ដោយឡែក ពានរង្វាន់ផ្សេងទៀតមានក្នុងមហោស្រព រួមមាន ពានតារាឯកប្រុស ស្រីសម្ដែងឆ្នើម អ្នកនិពន្ធឆ្នើម និងពានអ្នកដឹកនាំរឿងឆ្នើមជាដើម ។ ក្រៅពីនេះ ក៏មានពានសម្រាប់ អ្នកថត អ្នកកាត់ត អ្នកផ្គុំសំឡេង អ្នករៀបចំ តុបតែងឆាកថែមទៀត ។
ប្រធាននាយកដ្ឋានភាពយន្ត និងផ្សព្វផ្សាយវប្បធម៌ លោក ប៉ុក បូរ័ក្ស ក៏បានឲ្យដឹងដូចគ្នាដែរ ។ លោកថា មានសញ្ញាណល្អច្រើនសម្រាប់មហោស្រពភាពយន្តជាតិឆ្នាំនេះ ពោលគឺកើនឡើងទាំងបរិមាណ និងគុណភាព ។ កាលពីឆ្នាំទៅ ចំនួនភាពយន្តចូលរួមមានត្រឹម ១៤ ប៉ុន្តែឆ្នាំនេះ មានដល់ទៅ ១៨ ។ បរិមាណជារឿងមួយ ប៉ុន្តែគុណភាពរឹតតែសំខាន់ ហើយឆ្នាំនេះ លោកមើលឃើញថា មានភាពយន្តគុណភាពល្អច្រើនបានចូលរួម ។ ដូច្នេះក្នុងនាមជាអាណាព្យាបាល លោកមោទកភាពចំពោះការរីកចម្រើននេះ នឹងសំណូមពរបងប្អូនផលិតករ បន្តផលិតភាពយន្តដោយផ្ដោតលើគុណភាពជាសំខាន់ ។ ទាំងលោក បូរ័ក្ស និងលោក ហ្វៃ សំអាង សុទ្ធតែអះអាងចង់ឲ្យការផលិតផ្ដោតលើគុណភាព ដើម្បីផលិតផលភាពយន្តរបស់យើងអាចចូលទីផ្សារអន្តរជាតិបាន ដែលមានបច្ច័យល្អ២ ទី១ ជាទីដែលយើងសង្ឃឹមច្រើនលើការប្រមូលទុនមកវិញ ជាទីផ្សារបន្ថែមលើទីផ្សារក្នុងស្រុកដែលនៅមានទំហំតូចនៅឡើយ ។ ដោយឡែកទី២ គឺបានបង្ហាញឲ្យបរទេសឃើញពីការរីកចម្រើនគុណភាពភាពយន្តក្នុងស្រុក ។
គួរបញ្ជាក់ដែរថា គ្រប់ស្នាដៃភាពយន្តទាំងអស់ ដែលបានចូលរួមប្រកួតប្រជែង នឹងត្រូវពិនិត្យវាយតម្លៃ វិនិច្ឆ័យ ដោយផ្អែកលើស្នាដៃឯកទេសសំខាន់ៗ៨រួមមាន៖ ស្នាដៃ អត្ថបទ និពន្ធភាពយន្ត, ស្នាដៃដឹកនាំរឿង,ស្នាដៃថត, ស្នាដៃសម្តែង, ស្នាដៃតុបតែងឆាក, ស្នាដៃដំឡើងរូបភាព និងស្នាដៃផ្ដុំសំឡេងដោយឆ្លងតាម គោលការណ៍វិនិច្ឆ័យ និងជ្រើសរើសជា២ដំណាក់កាល៖ ដំណាក់កាលទី១៖ ពិនិត្យជ្រើសរើសជម្រុះយកស្នាដៃភាពយន្តឆ្នើមចំនួន០៨រឿងក្នុងចំនោម១៨រឿងសម្រាប់ចូលរួមប្រកួតផ្តាច់ព្រ័ត្រ ដើម្បីដណ្តើមពានរង្វាន់មហោស្រព ។ ដំណាក់កាលទី២៖ ស្នាដៃភាពយន្តដែលបានជ្រើសរើសក្នុងដំណាក់កាលទី១ នឹងត្រូវពិនិត្យវាយតម្លៃជ្រើសរើសជាជ័យលាភីរបស់មហោស្រពភាពយន្តជាតិលើកទី៦ឆ្នាំ២០១៩ ដែលប្រព្រឹត្តទៅចាប់ពីថ្ងៃទី២៥-២៩ខែវិច្ឆិកា ឆ្នាំ២០១៩៕ វឌ្ឍនា
