សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បាត់មុខពីវិស័យសិល្បៈសម្តែងមួយរយៈពេល តារាសម្តែងស្រី ត្រកូលពេជ្រ គឺ ពេជ្រ សុវណ្ណវិជ្ជរ៉ា និង ពេជ្រ រតនាទេវី គ្រោងវិលចូលសិល្បៈជាថ្មីក្រោយពីពួកគេទើបនឹងវិលមកពីបន្តការសិក្សានៅប្រទេសអូស្ត្រាលី។
គេចាំបានថាស្រីស្អាត ពេជ្រ សុវណ្ណវិជ្ជរ៉ា និង ពេជ្រ រតនាទេវី ធ្លាប់បានអុកឡុកពិភពសិល្បៈឱ្យរង្គើកាលពីប៉ុន្មានឆ្នាំមុនពិសេសក្នុងការសម្តែងបទចម្រៀងជាច្រើនឲ្យផលិតកម្មក្នុងស្រុក ប៉ុន្តែដោយសារត្រូវបន្តការសិក្សានៅប្រទេសអូស្រ្តាលី បានធ្វើឱ្យនាងសម្រេចចិត្តផ្អាកសិល្បៈ ទាំងគ្មានដំណឹង។
ដោយឡែកជួបជាមួយ ពេជ្រ សុវណ្ណវិជ្ជរ៉ា និង ពេជ្រ រតនាទេវី កាលពីពេលថ្មីៗនេះយើងចាប់អារម្មណ៍ឃើញថា អ្នកទាំងពីរនៅតែស្រស់ស្អាតដដែល ។ ពេជ្រ សុវណ្ណវិជ្ជរ៉ា បានរៀបរាប់ប្រាប់ថា នាងទើបតែត្រឡប់មកពីប្រទេសអូស្រ្តាលីវិញ ក្រោយពេលចេញទៅបន្តការសិក្សានៅទីនោះរយៈពេលជាច្រើនឆ្នាំ ពេលនេះនាងសម្រេចចិត្តវិលត្រឡប់មករស់នៅស្រុកកំណើតវិញ ព្រមទាំងត្រៀមខ្លួននឹងចេញសម្តែងនៅក្នុងរឿងមួយចំនួនផងដែរ ។ អ្វីដែលពិសេសគឺម្តាយបង្កើតរបស់នាងដែលធ្លាប់មានឈ្មោះក្នុងការផលិតភាពយន្តកាលពីអំឡុងទសវត្សរ៍ទី៩០ នោះ នឹងចាប់ផ្តើមបើកដំណើរការផលិតកម្មឡើងវិញ ។ នាងថាការបើកដំណើរការនេះនឹងចាប់ផ្តើមពីដើមឆ្នាំ២០២០ ទៅដោយមានក្រុមការងារផលិតមួយត្រៀមរួចជាស្រេច ហើយប្រាកដណាស់ថា នាងនិងប្អូនស្រីនឹងលេចមុខជាថ្មីក្នុងភាពយន្តទាំងនោះ។
ស្របពេលត្រៀមខ្លួនលេចមុខក្នុងរឿងថ្មីមួយ ពេជ្រ សុវណ្ណវិជ្ជរ៉ា បានបង្ហើបប្រាប់ថា ជំហានដំបូងនេះ នាងត្រៀមខ្លួននឹងចូលដើរម៉ូដឡើងវិញ ។ ដោយឡែក ពេជ្រ រតនាទេវី ដែលជាប្អូនស្រីរបស់ ពេជ្រ សុវណ្ណវិជ្ររ៉ា វិញ ក៏បានប្រកាសវិលត្រឡប់មកសិល្បៈរួមជាមួយប្អូនស្រីផងដែរ នាងសង្ឃឹមថាការវិលត្រឡប់របស់នាងលើនេះនឹងកាន់តែធ្វើឱ្យនាងល្បីល្បាញឡើងវិញ កន្លងមកនាងធ្លាប់លេចមុខនៅក្នុងរឿងអប់រំ និង រឿងដុំជាច្រើន ៕ វឌ្ឍនា
