សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោកតាវ័យចំណាស់ម្នាក់អាយុប្រហែល៩០ឆ្នាំ ខណ:ដែលកំពុងបណ្តើរកង់ឆ្លងផ្លូវក៏ត្រូវរថយន្តដឹកទំនិញចាប់ហ្រ្វាំងមិនទាន់បុកកិនកង់ពីក្រោមរថយន្ត ចំណែកលោកតាវ័យចំណាស់នោះដួលបោកក្បាល បណ្តាលឲ្យរងរបួសធ្ងន់ ត្រូវបានរថយន្តសង្គ្រោះបន្ទាន់ដឹកទៅមន្ទីរពេទ្យ តែជាអកុសល ដោយសារតែរងរបួសធ្ងន់ធ្ងរពេក បណ្តាលឲ្យលោកតាដាច់ខ្យល់ស្លាប់តាមផ្លូវមុនពេលបញ្ជូលដល់មន្ទីរពទ្យ។ ហេតុការណ៍នេះបានកើតឡើងនៅវេលាម៉ោង១២ និង៣០នាទី ថ្ងៃទី៣ ខែធ្នូ ឆ្នាំ២០១៩ នៅតាមបណ្តោយផ្លូវអន្លងគោងថ្មី៥០ម៉ែត្រ សង្កាត់ព្រៃស ខណ្ឌដង្កោ ។
តាមប្រភពព័ត៌មានពីសាច់ញាតិរបស់លោកតាដែលបានជួបគ្រោះថ្នាក់ចរាចរណ៍រហូតបណ្តាលឲ្យស្លាប់បាត់បង់ជីវិតនេះ បានប្រាប់ឲ្យដឹងថា លោកតាមានឈ្មោះ ងិន វិន អាយុ៩០ឆ្នាំ បច្ចុប្បន្នគាត់ស្នាក់នៅផ្ទះក្នុងភូមិគោរលំ សង្កាត់សាក់សំពៅ ខណ្ឌដង្កោ ហើយជានិច្ចកាលគាត់តែតែងជិះកង់ទៅហូបកាហ្វេ ទៅនិងជិះកង់ទៅផ្ទះចៅៗដែលនៅក្បែរកន្លែងកើតហេតុ ស្រាប់តែថ្ងៃនេះបានជួបគ្រោះអកុសលបែបនេះតែម្តង។
ប្រភពពីសមត្ថកិច្ចពីកន្លែងកើតហេតុក៏បានឲ្យដឹងថា មុនពេលកើតហេតុ លោកតាបានបណ្តើរកង់ចេញពីភូមិគោរលំ ក្នុងទិសដៅពីត្បូងទៅជើង ពេលឆ្លងផ្លូវបានពាក់កណ្តាលផ្លូវចំណុចកើតហេតុខាងលើ ស្រាប់តែមានរថយន្តដឹកទំនិញដែលមានស្លាកលេខភ្នំពេញ3C-7372 បើកជែងរថយន្តមួយគ្រឿងផ្សេងទៀតផុត ក៏ស្រាប់តែវ៉ាក់អើឃើញលោកតាបណ្តើរកង់នៅចំទ្រូងផ្លូវ ក៏ជាន់ហ្វ្រាំងមិនជាប់ បណ្តាលឲ្យបុកកង់ចូលក្រោមរថយន្ត ចំណែកលោកតាបានដួលបោកក្បាលសន្លប់ស្តូកស្តឹងតែម្តង។ ប្រភពព័ត៌មានបានបន្ថែមទៀតថា ក្រោយពេលមានរថយន្តសង្រ្គោះបន្ទាន់មន្ទីរពេទ្យសួគ៌ាដឹកបញ្ជូនទៅសង្គ្រោះនៅមន្ទីរពេទ្យ ប៉ុន្តែជាអកុសលលោកតាបានស្លាប់ បាត់ទៅហើយ មុនពេលបញ្ជូនមន្ទីរពេទ្យ។
ក្រោយពេលកើតហេតុសមត្ថកិច្ចបានចុះទៅវាស់វែងនៅកន្លែងកើតហេតុ ដើម្បីយកថយន្តនិងកង់ខាងលើទៅរក្សាទុកបណ្តោះអសន្នរង់ចាំដោះស្រាយនៅពេលក្រោយ ចំណែកសពជនងគ្រោះ សមត្ថកិច្ចបានធ្វើកុះណត់ហេតុរួចប្រគល់ទៅឲ្យក្រុមគ្រួសារធ្វើបុណ្យផ្ទះតាមប្រពៃណី៕ ភារ៉ា ដង្កោ
