សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្មេងទំនើង២ក្រុម ប្រដាប់ដោយដំបង និងដាវបានបើកឆាកប្រយុទ្ធគ្នាតាមផ្លូវសាធារណៈ បង្កការភ័យខ្លាចដល់បងប្អូនប្រជាពលរដ្ឋនិងបណ្តាលឲ្យភាគីម្ខាងរងរបួស ត្រូវបាននគរបាលអន្តរាគមន៍ឃាត់បាន៣នាក់ នាំយកទៅសាកសួរ ។
ហេតុការណ៍នេះ បានកើតឡើងកាលពីវេលាម៉ោង៤ និង ១០នាទីទៀបភ្លឺ ថ្ងៃទី១៧ ខែធ្នូ ឆ្នាំ២០១៩ នៅក្នុងសួនឧស្សាហកម្ម កាណាឌីយ៉ា ភូមិ ត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ក្នុងប្រតិបត្តិការឃាត់ខ្លួនក្មេងទំនើងខាងលើនេះ នគរបាលបានឃាត់ខ្លួនមនុស្ស៣នាក់ និងដកហូតដាវចំនួន១ដើម និងដំបងទីបចំនួន១ ។
សមត្ថកិច្ចបានឲ្យដឹងថា មុនឈានដល់ការឃាត់ខ្លួន ក្មេងទំនើងខាងលើ មុនពេលកើតហេតុកម្លាំងប៉ុស្តិ៍បានល្បាតក្នុងមូលដ្ឋានដើម្បីទប់ស្កាត់បទល្មើសផ្សេងៗ ខណៈមកដល់ចំណុចកើតហេតុ ស្រាប់តែឃើញក្មេងទំនើង២ក្រុម ប្រដាប់ដោយដំបង និងដាវកំពុងបើកឆាកប្រយុទ្ធគ្នាយ៉ាងអនាធិបតេយ្យតាមដងផ្លូវ ទើបបង្ក្រាបភ្លាមៗ និងឃាត់មនុស្សចំនួន៣នាក់តែម្តង។
ក្រោយពេលកើតហេតុ សមត្ថកិច្ចនគរបាលបានធ្វើកិច្ចសន្យាណែនាំអប់រំឲ្យអាណាព្យាបាលមកធានា និងឲ្យត្រឡប់ទៅផ្ទះវិញភ្លាមៗផងដែរ ៕ សុខាសែនជ័យ
