សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ យោងតាមរបាយការណ៍នគរបាលស្រុកភ្នំក្រវាញ នៅវេលាម៉ោង៥ និង៤៥នាទី ព្រឹកថ្ងៃសុក្រ ៩កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣ ខែមករា ឆ្នាំ២០២០ នៅចំណុចដើមឈើ (អំពិលតិក)ក្បែរផ្ទះ ស្ថិតក្នុងភូមិបាក់ត្រកួន ឃុំលាច ស្រុកភ្នំក្រវាញ មានករណីអត្តឃាត(ចងក)បង្កឡើងដោយស្រ្តីវ័យ ១៨ឆ្នាំ សមត្ថកិច្ចពាក់ព័ន្ធសន្និដ្ឋានអាចបណ្ដាលមកពីទំនាស់ពាក្យសម្ដីជាមួយប្ដី ។
របាយការណ៍នគរបាលស្រុកដដែលបន្តថា លុះនៅវេលាម៉ោង៦ និង៣០នាទី ព្រឹកថ្ងៃទី៤ ខែមករា ឆ្នាំ២០២០ ត្រង់ចំណុចការដ្ឋានធារាសាស្ត្រមួយកន្លែង ស្ថិតក្នុងភូមិព្រែក១ ឃុំសំរោង ស្រុកភ្នំក្រវាញ មានករណីមនុស្សស្លាប់ក្នុងអង្រឹងសង្ស័យជំងឺខ្យល់គរ (គាំងបេះដូង) បន្ទាប់សមត្ថកិច្ចស្ថាប័នជំនាញសហការចុះពិនិត្យ ។
ដោយឡែក៖ របាយការណ៍មូលដ្ឋានកងរាជអាវុធហត្ថស្រុកកណ្ដៀងឯនេះវិញ នារសៀលថ្ងៃទី៤ ខែមករា ឆ្នាំ២០២០ ស្ថិតក្នុងភូមិបឹងចក ឃុំស្យា ស្រុកកណ្ដៀង ខេត្តពោធិ៍សាត់ ក៏មានករណីកុមារីលង់ទឹកស្ទឹងខាងមុខផ្ទះ បណ្ដាលឲ្យស្លាប់ម្នាក់ផងដែរ នៅគ្រាដែលឪពុករវល់ទៅរកសុីទទួលទាន ដោយទុកកូនតូចរងគ្រោះជាមួយជីដូនមើលថែ ប៉ុន្តែជាអកុសល់ធ្វេសប្រហែសតែបន្តិច ធ្វើឲ្យបាត់បង់ជីវិតកូនស្រីម្នាក់យ៉ាងសង្វេគបែបនេះ ៕ បុឹម ពិន
