បុរស២នាក់ស្លាប់នៅស្រុកព្រៃនប់ ដោយសាររថយន្ដបុកម៉ូតូបណ្តាលឲ្យក្រឡាប់ឆេះរថយន្ត

ខេត្តព្រះសីហនុ ៖ មនុស្សចំនួន២នាក់បានស្លាប់ ក្នុងហេតុការណ៍គ្រោះថ្នាក់ចរាចរណ៍រវាងរថយន្ត កុងតឺន័របុកនឹងម៉ូតូមួយគ្រឿងនៅ លើផ្លូវជាតិលេខ៤ ចន្លោះគីឡូម៉ែត្រ ២០៤-២០៥ ស្ថិតនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ កាលពីរំលងអធ្រាត្រ ឈានចូលថ្ងៃទី០៥ ខែមករា ឆ្នាំ២០២០ ។

មន្ត្រីនគរបាលមូលដ្ឋានបានប្រាប់ឲ្យដឹងថា ករណីគ្រោះថ្នាក់ចរាចរណ៍នេះស្លាប់មនុស្ស២នាក់ គឺអ្នកបើកបររថយន្តកុងតឺន័រ និងអ្នកបើកបរម៉ូតូនៅនឹងកន្លែងកើតហេតុតែម្តង ។

មន្ត្រីនគរបាលមូលដ្ឋានបានប្រាប់ឲ្យដឹងបន្តថា គ្រោះថ្នាក់ចរាចរណ៍នេះបង្កឡើងដោយ រថយន្តកុងតឺន័រ ០១គ្រឿង អ្នកបើកបរមិនស្គាល់អត្តសញ្ញាណ មានទិសដៅពីខេត្តព្រះសីហនុ ឆ្ពោះទៅភ្នំពេញ ។ លុះដល់ចំណុចខាងលើបានបុកម៉ូតូ០១គ្រឿងម៉ាក HONDA SCOOPY អ្នកបើកបរឈ្មោះ អឹប សេថន ភេទប្រុស អាយុ ២២ឆ្នាំ មានទីលំនៅភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ទិសដៅផ្ទុយគ្នា បន្ទាប់រថយន្តធ្លាក់ផ្លូវក្រឡាប់ បណ្ដាលឲ្យឆាបឆេះតែម្តង ។

មន្ត្រីនគរបាលរូបនោះ បានបញ្ជាក់ទៀតថាអ្នកស្លាប់រួមមាន៖ ១៖ ឈ្មោះ អឹប សេថន អ្នកបើកបរម៉ូតូ ស្លាប់នៅនឹងកន្លែងកើតហេតុ ។ ចំណែកសាកសពប្រគល់ជូនក្រុមគ្រួសារនៃសពយកទៅធ្វើបុណ្យតាមប្រពៃណីខ្មែរ ។ ២៖ អ្នកបើកបររថយន្តកុងតឺន័រ មិនស្គាល់អត្តសញ្ញាណ ស្លាប់នៅនឹងកន្លែងកើតហេតុ (ឆេះគៀបជាប់ក្នុងក្បាលរថយន្ត) ។ បច្ចុប្បន្នសមត្ថកិច្ចជំនាញកំពុងស្រាវជ្រាវរកអត្តសញ្ញាណ ។

សូមបញ្ជាក់ថា សមត្ថកិច្ចជំនាញកំពុងចាត់ចែង ជួយអន្តរាគមន៍ពន្លត់អគ្គិភ័យដែលឆេះរថយន្តកុងតឺន័របានរលត់ទាំងស្រុង ហើយក៏បានយកវត្ថុតាង រថយន្ត និងម៉ូតូ មករក្សាទុកនៅអធិការដ្ឋាននគរបាលស្រុកព្រៃនប់បណ្តោះអាសន្នដើម្បីរង់ចាំដោះស្រាយតាមនីតិវិធី ៕ ឆ្លាម សមុទ្រ