សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានស្លាប់យ៉ាងអាណោចអាធ័មនៅកណ្តាលផ្លូវ ខណៈជិះម៉ូតូដៃចង្កូតជាមួយម៉ូតូមួយគ្រឿងទៀតដួលហើយត្រូវរថយន្តមកពីក្រោយជាន់ហ្វ្រាំងមិនទាន់ជ្រុលកិនស្លាប់ កាលពីវេលាម៉ោង ១២ និង១០រសៀល ថ្ងៃទី១៦ ខែមករា ឆ្នាំ ២០២០ ស្ថិតនៅតាមបណ្តោយផ្លូវជាតិលេខ៣ សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
សមត្ថកិច្ចបាន្យដឹងថា បុរសដែលត្រូវរថយន្តកិនស្លាប់មានឈ្មោះ ចាន់ វិចិត្ត ភេទប្រុស អាយុ៣៩ ឆ្នាំមុខរបរលក់ជ្រក់ស្ពៃ ស្នាក់នៅភូមិព្រែកស្ទង ឃុំរព្រែកគយ ស្រុកស្អាង ខេត្តកណ្តាល ។ ចំណែកអ្នកបើកបររថយន្តបង្កមិនត្រូវបានស្គាល់អត្តសញ្ញាណនោះទេ ដោយសារក្រោយកើតហេតុបានចុះពីរថយន្តរត់គេចខ្លួនបាត់ស្រមោល ។
តាមសម្តីប្រជាពលរដ្ឋដែលឃើញហេតុការណ៍បានឲ្យដឹងថា ដំបូងបុរសរងគ្រោះបានជិះម៉ូតូសង់កូរេ ពណ៌ក្រហម ធ្វើដំណើរចេញពីផ្លូវបេតុងឆ្ពោះមកផ្លូវជាតិលេខ៣ ខណៈមកដល់ផ្លូវជាតិក៏បានទាក់ដៃចង្កូតជាមួយម៉ូតូមួយគ្រឿងផ្សេងទៀត បណ្តាលឲ្យដួលខ្ទាតទៅលើកផ្លូវស្របពេលមានរថយន្តមួយគ្រឿងម៉ាកហុីយ៉ាន់ ពាក់ស្លាកលេខ កំពង់ធំ3A -1033 កំពុងធ្វើដំណើរតាមបណ្តោយផ្លូវជាតិលេខ៣ ទិសដៅពីជើងទៅត្បូងក្នុងល្បឿនលឿនជាន់ហ្វ្រាំងមិនទាន់ ក៏ជ្រុលកិនចំក្បាលបុរសរងគ្រោះ បណ្តាលឲ្យធ្លាយខួរស្លាប់យ៉ាងអាណោចអាធ័ម ។
ប្រភពដដែរបន្តថា បន្ទាប់ពីកើតហេតុរថយន្តបង្កបានព្យាយាមបើកគេចបានប្រហែល៣០០ម៉ែត្រ ទើបតៃកុងរថយន្តចុះពីលើរថយន្តរត់គេចខ្លួនបាត់ ទុករថយន្តចោល ។
ក្រោយកើតហេតុសមត្ថកិច្ចមូលដ្ឋានបានសហការជាមួយនគរបាលជំនាញចុះវាស់វែងអូសយករថយន្តបង្កនិងម៉ូតូយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនាពេលក្រោយ ចំណែកសពត្រូវបានប្រគល់ឲ្យសាច់ញាតិដឹកយកទៅធ្វើបុណ្យតាមប្រពៃណីនៅឯស្រុកកំណើត៕ ភារ៉ា ដង្កោ
