សារព័ត៌មាន នគរវត្ត តែងតែនាំមុខគេជានិច្ច
ក្រោយពេលដែលចិនបានកែប្រែរដ្ឋធម្មនុញ្ញអនុញ្ញាតឲ្យប្រធានាធិបតីអាចកាន់តំណែងអស់មួយជីវិត បើទទួលបានការគាំទ្រពីសភា ។ កន្លងមក មេដឹកនាំចិន ក៏ដូចជា មេដឹកនាំផ្សេងទៀតនៅលើពិភពលោក កាន់អំណាចបានរយៈពេលតែពីរអាណត្តិតែប៉ុណ្ណោះ នឹងត្រូវចុះចេញដោយស្វ័យប្រវត្តិ ។
ពេលនេះលោកពូទីនក៏បានរៀបចំកែប្រែរដ្ឋធម្មនុញ្ញ ដោយរៀបចំបោះឆ្នោត ប្រជាមតិស្តីពីការកែទម្រង់រដ្ឋធម្មនុញ្ញ ត្រូវបានប្រធានាធិបតីពូទីនស្នើឡើងនៅក្នុង សារប្រចាំឆ្នាំ ។ ការបោះឆ្នោតប្រជាមតិ នឹងត្រូវធ្វើឡើងនៅថ្ងៃទី១ខែឧសភាឆ្នាំ ២០២០ ។
សារព័ត៌មាន TASS បានផ្សាយថា តាមប្រភពព័ត៌មានពីព្រឹទ្ធសភារុស្ស៊ីបញ្ចាក់ថា ការបោះឆ្នោតប្រជាបតិនឹងត្រូវបានធ្វើឡើងមុនពេលកែប្រែរដ្ឋធម្មនុញ្ញ ។ នៅពេលរដ្ឋាភិបាលកំពុងតែរៀបចំសម្រាប់ការបោះឆ្នោតប្រជាបតិ ។ ការកែទម្រង់ រដ្ឋធម្មនុញ្ញ ចាំបាច់ត្រូវតែឆ្លងកាត់ការឯកភាពពីពលរដ្ឋ ។
នៅពេលនេះរុស្ស៊ីបានកែទម្រង់រដ្ឋាភិបាលជាទ្រង់ទ្រាយធំ ក៏ដូចជាបង្កើនអំណាចដល់ប្រធានាធិបតីពូទីនអាច កាន់តំណែងអស់មួយជីវិត ។
ជាមួយគ្នានេះ សភារុស្ស៊ីទើបតែបោះឆ្នោត អនុម័ត គាំទ្រលោក Mikhail Mishustin ធ្វើជានាយករដ្ឋមន្ត្រី ជំនួសលោក Dmitry Medvedev ដែលបានប្រកាសលាលែងចេញពីតំណែងកាលពីថ្ងៃទី១៥ ខែមករា ។
ក្រោយការបោះឆ្នោតលោកពូទីនក៏បាន ចុះហត្ថលេខាតែងតាំងលោក Mishustin ឡើងកាន់តំណែងភ្លាមៗ ។ នៅពេលនេះលោក Mishustin នឹងត្រូវជ្រើសរើស រដ្ឋមន្ត្រី ដើម្បីបង្កើតគណៈរដ្ឋមន្ត្រីថ្មី ឲ្យទាន់ពេលវេលា ។ លោកបានសន្យាថានឹងមិនការកែទម្រង់ជាទ្រង់ទ្រាយធំ ដោយក្នុងនោះបានជ្រើសរើសបុគ្គល ថ្មីមួយចំនួនកាន់តំណែងជារដ្ឋមន្ត្រី ។
ចេតនាចង់កែប្រែរដ្ឋធម្មនុញ្ញរុស្ស៊ីនេះ គឺលោក ពូទីន ចង់ធ្វើតាំងពីពេលលោកផ្តើមឡើងកាន់អំណាចរដ្ឋមកម្ល៉េះ ប៉ុន្តែពុំទាន់មានឱកាសល្អដូចពេលនេះ ។ កាលពីថ្ងៃទី១៥មករា បុរសខ្លាំងលេខមួយរុស្ស៊ី បានលើកឡើងថា ចាំបាច់ត្រូវធ្វើកំណែទម្រង់ច្រើនផ្នែកចំពោះស្ថាប័នរដ្ឋជាច្រើន ទាំងថ្នាក់តំបន់ និងទាំងរដ្ឋសភាផង ។ រដ្ឋសភារុស្ស៊ី គឺមានភាពចាស់ទុំគ្រាន់បើខ្លាំងនឹងគេដែរ ហេតុនេះ ត្រូវមានអំណាចសិទ្ធិក្នុងសម្រេចឱ្យបានច្រើនជាងមុន ដូចជាក្នុងការតែងតាំងនាយករដ្ឋមន្ត្រីជាដើម ។
មិនតែប៉ុណ្ណោះ លោកពូទីន ស្នើឱ្យកែទម្រង់ពង្រឹងអំណាចដល់អភិបាលថ្នាក់តំបន់ ។ ចំពោះសមាជិករដ្ឋាភិបាល និងចៅក្រម គឺហាមមិនឱ្យមានសញ្ជាតិពីរ ឬហាមមិនឱ្យមានផ្ទះនៅក្រៅស្រុក ឬក៏មានបណ្ណស្នាក់នៅបរទេសឡើយ ។ សម្រាប់រាល់តែគ្រប់បេក្ខជនប្រធានាធិបតី ត្រូវតែរស់នៅក្នុងប្រទេសរុស្ស៊ី យ៉ាងហោច២៥ឆ្នាំជាប់ៗគ្នា ។ ក្នុងក្រសែភ្នែកអ្នកវិភាគនយោបាយរុស្ស៊ី, ការចងមាត្រាបែបនោះ គឺដើម្បីបញ្ជៀសក្រុមប្រឆាំងដែលមានសញ្ជាតិពីរ និងដែលច្រើនតែគេចទៅរស់នៅក្រៅស្រុក កុំឱ្យអស់លោកទាំងនោះ អាចមានលទ្ធភាពស្របច្បាប់ឈរឈ្មោះ សម្រាប់តំណែងបេក្ខជនប្រធានាធិបតីបាន ។
ទោះយ៉ាងនេះក្តី ប្រធានាធិបតី ពូទីន ថារុស្ស៊ីជាប្រទេសប្រកាន់របបសាធារណរដ្ឋប្រធានាធិបតីនិយម ហេតុនេះប្រមុខរដ្ឋត្រូវតែមានអំណាចខ្លាំងក្នុងការសម្រេចកិច្ចការប្រទេសជាតិ ។ ដូចជាការកំណត់បេសកម្ម និងកិច្ចការជាអាទិភាពរបស់រដ្ឋាភិបាល ។ ថែមពីនេះ បើតាមលោកពូទីន, ប្រធានាធិបតីរុស្ស៊ី ក៏ត្រូវរក្សាសិទ្ធិក្នុងការបណ្តេញសមាជិករដ្ឋាភិបាល ហើយនឹងតែងតាំង ថ្នាក់ដឹកនាំស្ថាប័នដែលកាន់ការកន្លែងសន្តិសុខជាតិ ជាដើម ។ ដូច្នេះ កំណែទម្រង់រដ្ឋធម្មនុញ្ញ ក៏ត្រូវសម្របតាមលំអានដែលបានលើកឡើងទាំងនេះដែរ ។
ចំពោះអ្នកសង្កេតការណ៍ គម្រោងការកែរដ្ឋធម្មនុញ្ញនេះ គឺច្បាស់ណាស់ នឹងប៉ះពាល់ដល់សិទ្ធិអំណាចនៃការតែងតែប្រធានចៅក្រមតុលាការកំពូល និងប្រធានក្រុមប្រឹក្សាធម្មនុញទៀតផង ដែលគេមើលទៅ គឺជាទម្រង់នៃការចងក្រសោបឱបអំណាច ទៅក្រុមណាមួយ ជាក់ជាមិនខាន ។
នៅក្នុងអាណត្តិកាន់អំណាចរដ្ឋ នៅលើកទី១ របស់លោក វ្ល៉ាឌីមៀរ ពូទីន ពីឆ្នាំ២០០០-២០០៨ ។ ឧទាហរណ៍មួយ លោក ពូទីន បានចុះពីប្រមុខរដ្ឋ មកធ្វើជានាយករដ្ឋមន្ត្រី ហើយលើកលោក Dmitri Medvedev ពីនាយករដ្ឋមន្ត្រី មកឱ្យកាន់តំណែងជាប្រធានាធិបតីជំនួសរូបលោក មួយរយៈសិន គឺចន្លោះឆ្នាំ២០០៨-២០១២ ។ ដូច្នេះ ជាផ្លូវការនៅលើក្រដាស គឺលោក ពូទីន ជានាយករដ្ឋមន្ត្រីមែន តែតាមពិតអំណាចរបស់គាត់គឺនៅតែជាប្រធានាធិបតីដដែល ព្រោះ លោក Dmitri Medvedev ជាមនុស្សជំនិតមែនទែន និងដ៏ស្មោះស្មគ្របំផុតរបស់លោកពូទីន ។ ហើយការចុះឡើងតំណែងពីប្រធានាធិបតីមកនាយករដ្ឋមន្ត្រីបែបនេះ គឺគ្រាន់តែធ្វើបំភាន់ កុំឱ្យខុសនឹងការចែងរបស់រដ្ឋធម្មនុញ្ញរុស្ស៊ីតែប៉ុណ្ណោះ ។
ចំណែកសេណារីយ៉ូនៃការសាកល្បងជ្រើសរើសរកអ្នកស្នងតំណែងវិញ គឺធ្លាប់កើតមានការសាកល្បង កាលទីប្រាំដងឯណោះនៅក្នុងរជ្ឋកាលរបស់អតីតប្រធានាធិបតី បូរីស អែលស៊ីន (Boris Eltsine) ក្នុងសម័យឆ្នាំ១៩៩១ ដល់១៩៩៩ ។ អំលុងពេលនោះ លោកអតីតប្រមុខរដ្ឋរុស្ស៊ី បូរីស អែលស៊ីន បានសាកល្បង ដោះដូរ និងជ្រើសរើសនាយករដ្ឋមន្ត្រី ដល់ទៅ៤-៥នាក់ ។ ម្នាក់ មើលទៅមិនកើត ទៅមិនរួច ក៏ប្តូរមួយទៀត រហូតដល់គម្រប់ប្រាំនាក់ឯណោះ ទើបដល់វេនបុរសខ្លាំងខ្សែក្រវាត់ខ្មៅកីឡាយូដូ លោក វ្ល៉ាឌីមៀរ ពូទីន៕
