សារព័ត៌មាន នគរវត្ត តែងតែនាំមុខគេជានិច្ច
គ្រាន់តែការកាត់ផ្តាច់ជើងហោះហើរធ្វើឲ្យចិន និងប្រទេសជាច្រើន ត្រូវខាតបង់សេដ្ឋកិច្ចរាប់រយលានដុល្លារ ។ មិនតែប៉ុណ្ណោះទីផ្សារ មូលម័ត្រ(ភាគហ៊ុន) នៅចិនធ្លាក់ចុះយ៉ាងខ្លាំងដោយសារវីរុសកូរ៉ូណា។
ទីផ្សារភាគហ៊ុនចិន បានធ្លាក់ចុះយ៉ាងខ្លាំង ចាប់តាំងពីថ្ងៃទី២៣ ខែមករា រហូតមកដល់ពេលនេះ ហើយពិភពលោក បានបិទជើងហោះហើររបស់ខ្លួនដោយទុកប្រទេសចិនឲ្យនៅតែឯង លើកលែងតែកម្ពុជាមួយ។
ចំនួនអ្នកស្លាប់ដោយសារវីរុសកូរ៉ូណា នៅក្នុងប្រទេសចិន បានកើតឡើង រហូតដល់៣៦១នាក់ និងមានអ្នកឆ្លងនូវវីរុសនេះ កើនឡើងប្រហែល២ម៉ឺននាក់។ រីឯទីផ្សារភាគហ៊ុន និងទំនិញផ្សេងៗ នៅក្នុងទីផ្សាររបស់ប្រទេសចិន នៅថ្ងៃទី៣ ខែមករា នេះ ក៏បានធ្លាក់ចុះយ៉ាងខ្លាំងផងដែរ ដោយសារវិនិយោគិននានា កំពុងតែខ្វាយខ្វល់អំពីសុវត្ថិភាព និងសុខភាពរបស់ពួកគេ សំខាន់ជាងវិស័យពាណិជ្ជកម្ម។
ទីផ្សារភាគហ៊ុន និងទីផ្សារទំនិញ នៅក្នុងប្រទេសចិន បានដាំក្បាលចុះ ចាប់តាំងពីថ្ងៃទី២៣ ខែមករា ដោយសារតែការផ្ទុះនូវមេរោគផ្លូវដង្ហើមដ៏កាចសាហាវកូរ៉ូណា នៅក្នុងទីក្រុងវូហាន (Wuhan) ខេត្ត ហូប៉ី (Hubei) ប្រទេសចិន។
បើយោងតាមគណៈកម្មការសុខភាពជាតិរបស់ប្រទេសចិន បានថ្លែងថា បើគិតត្រឹម ថ្ងៃទី២ ខែកុម្ភៈ ឆ្នាំ២០២០ ចំនួនអ្នកស្លាប់ដោយសារវីរុសកូរ៉ូណា នៅក្នុងប្រទេសចិន បានកើតឡើង រហូតដល់៣៦១នាក់ និងអ្នកឆ្លងជំងឺនេះ បានកើនឡើង ១៧២០៥នាក់។ រីឯអង្គការសុខភាពពិភពលោករបស់អង្គការសហប្រជាជាតិ ក៏បានប្រកាសអាសន្នអំពីវីរុសកូរ៉ូណា នេះផងដែរ។
យោងតាមការគណនារបស់ទីភ្នាក់ងារព័ត៌មានរ៉យទ័រ បានឱ្យដឹងថា សន្ទស្សន៍ទីផ្សារសៀងហៃ បានធ្លាក់ចុះ៨ភាគរយ ជាកម្រិតទាប ក្នុងរយៈពេលមួយឆ្នាំ កាលពីថ្ងៃចន្ទ ទី៣ ខែមករា ដោយបានខាតបង់ជិត៣៧០ពាន់លានដុល្លារអាមេរិក។ ដោយឡែក ជើងហោះនានារបស់ពិភពលោក បានរឹតបន្ដឹងការហោះហើររបស់ខ្លួន ទៅកាន់ប្រទេសចិន រួមមាន អាមេរិក ថៃ ជប៉ុន ហុងកុង អូស្រ្ដាលី សិង្ហបុរី…ជាដើម។
ដើម្បីទប់ស្កាត់ការធ្លាក់ចុះ សេដ្ឋកិច្ចពាណិជ្ជកម្ម ដែលគំរាមកំហែងដោយមេរោគកូរ៉ូណាថ្មី ធនាគារកណ្តាលចិនបានប្រកាសបញ្ចេញលុយជាង ១៧១ ០០០លានដុល្លារ។
ប្រតិបត្តិការបញ្ចេញប្រាក់របស់ធនាគារកណ្តាលនឹងចាប់ផ្តើមនៅថ្ងៃចន្ទ ទី៣ កុម្ភៈ ពោលចំថ្ងៃដែលផ្សារមូលប័ត្របើកទ្វារជាថ្មី បន្ទាប់ពីបានឈប់សម្រាកក្នុងពេលបុណ្យចូលឆ្នាំថ្មី និងបានពន្យារពេលបិទទ្វារដោយសារមេរោគកូរ៉ូណាថ្មី។ ធនាគារកណ្តាលចិនបានពន្យល់នៅក្នុងសេចក្តីប្រកាសព័ត៌មានមួយចេញផ្សាយក្នុងថ្ងៃអាទិត្យ ទី២ កុម្ភៈថា អន្តរាគមន៍របស់ខ្លួនមានគោលដៅជួយរក្សាបរិមាណសាច់ប្រាក់សមហេតុផលនៅលើទីផ្សារសម្រាប់ប្រព័ន្ធហិរញ្ញវត្ថុ និងសម្រាប់ស្ថិរភាពទីផ្សារប្តូរប្រាក់។ ក្នុងថ្ងៃសៅរ៍ ទី១ កុម្ភៈ ធនាគារកណ្តាលចិនក៏បានប្រកាសចេញនូវវិធានការមួយចំនួនដើម្បីទំនុកបម្រុងដល់ក្រុមហ៊ុន សហគ្រាសដែលរួមចំណែកនៅក្នុងយុទ្ធនាការប្រឆាំងនឹងមេរោគកូរ៉ូណាថ្មី។
មេរោគកូរ៉ូណាថ្មីដែលកំពុងមានសន្ទុះកើនឡើងពីមួយថ្ងៃទៅមួយថ្ងៃនៅក្នុងប្រទេសចិនក៏ដូចជានៅប្រទេសមួយចំនួនក្នុងលោក។ តាមក្រុមអ្នកវិភាគ មេរោគផ្លូវដង្ហើមមួយនេះបានធ្វើឲ្យចិនបាត់បង់ទឹកប្រាក់សរុបជាង ១៤០ ០០០លានដុល្លារនៅក្នុងវិស័យសំខាន់ៗជាច្រើន ពិសេសទេសចរណ៍ និងភោជនីយដ្ឋាន។ ចិនដែលកំពុងមានកំណើនសេដ្ឋកិច្ចទាបខ្លាំងគិតក្នុងរយៈពេល ៣០ឆ្នាំចុងក្រោយសង្ឃឹមមានសន្ទុះឡើងវិញ បន្ទាប់ពីមានកិច្ចព្រមព្រៀងជាមួយអាមេរិកកាលពីខែមករាក្នុងជម្លោះសង្រ្គាមពាណិជ្ជកម្ម។ តែក្តីសង្ឃឹមហាក់កំពុងញាំញីដោយមេរោគកូរ៉ូណាថ្មី។ រហូតមកដល់ពេលនេះ ធនាគារកណ្តាលចិនបានបញ្ជាក់ពីផលវិបាកសេដ្ឋកិច្ចមានកម្រិត។
តែអ្នកជំនាញមួយចំនួននៅចិន ដូចយ៉ាងលោក Zhang Mong មកពីបណ្ឌិត្យសភាវិទ្យាសាស្ត្រសង្គមចិនដែលកាសែតអង់គ្លេស The Guardian បានស្រង់សម្តីយល់ឃើញថា កំណើនសេដ្ឋកិច្ចចិនប្រចាំឆ្នាំចិនសម្រាប់ត្រីមាសទី១ ឆ្នាំ ២០២០ អាចធ្លាក់នៅក្រោម ៦%។ គួររម្លឹកថា ចិនធ្លាប់បានហែលឆ្លងដោយជំងឺសារស៍លើកទី១ ក្នុងឆ្នាំ ២០០២។ តែខុសពីជំងឺសារស៍ រដ្ឋាភិបាលក្រុងប៉េកាំងបានបញ្ចេញប្រតិកម្មយ៉ាងលឿនដើម្បីប្រឆាំងនឹងមេរោគកូរ៉ូណាថ្មីដោយបានចំណាយប្រាក់ចំនួន ៩ ០០០លានដុល្លារ។ តែគេត្រូវហ៊ានទទួលស្គាល់ថា ចិនសព្វថ្ងៃជាប្រទេសមហាអំណាចសេដ្ឋកិច្ចទី២ ក្នុងលោក។
បើមេរោគផ្លូវដង្ហើមថ្មីនេះរីករាលដាលកាន់តែធំ ផលវិបាកសេដ្ឋកិច្ចនឹងមានកាន់តែខ្លាំងនៅក្នុងតំបន់អាស៊ីដែលបានរងគ្រោះស្រាប់ និងនៅលើពិភពលោកដែលផលិផលចំនួន ១ភាគ៤ ផលិតក្នុងប្រទេសចិន៕
