សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កាកសំណល់អាហាររបស់ហាងយីហោ “អយ ស្ទ័រ ហៅស៍” កំពុងបង្កឲ្យមានក្លិនស្អុយគគ្រុក ប៉ះពាល់ដល់សុខភាពប្រជាពលរដ្ឋធ្វើដំណើរតាមផ្លូវស្ទើរទ្រាំស្ទើរលែងបាន ស្ថិតតាមបណ្តោយផ្លូវលេខ១៥៤ សង្កាត់ផ្សារធំថ្មី៣ ខណ្ឌដូនពេញ ព្រោះតែកាកសំណល់គ្រឿងសមុទ្រ និង ទឹកស្អុយ ផងដែរ ។
យោងតាមប្រភពព័ត៍មានពីអ្នកធ្វើដំណើរតាមដងផ្លូវខាងលើនេះ បានរិះគន់យ៉ាងខ្លាំង ចំពោះម្ចាស់ហាងលក់គ្រឿងសមុទ្រមួយនេះ មិនដែលបានយកចិត្តទុកដាក់លើការវេចខ្ចប់សំរាមឲ្យបានល្អនោះទេ ។ មិនតែប៉ុណ្ណោះហាងមួយនេះ ត្រូវបានគេដឹងថា បានបម្រើសេវាកម្មអាហារគ្រឿងសមុទ្រ ដោយធ្វើការចតរថយន្ត និងម៉ូតូ លើចិញ្ចើមផ្លូវថែមទៀតផង ដែលបង្កឲ្យមានការកកស្ទះចរាចរណ៍រាល់ថ្ងៃ ជាពិសេសគឺនៅពេលល្ងាច ។
ចំពោះករណីខាងលើនេះ ប្រជាពលរដ្ឋសំណូមពរដល់ លោក សុខ ពេញវុធ អភិបាលខណ្ឌដូនពេញ នឹងមានវិធានការចំពោះម្ចាស់ហាងលក់គ្រឿងសមុទ្រយីហោ “អយ ស្ទ័រ ហៅស៍” មួយនេះឲ្យចេះវេចខ្ចប់កាកសំណល់សំរាមឲ្យបានត្រឹមត្រូវ ដូចពាក្យស្លោកថា «ត្រូវបង្កើនភាពទាក់ទាញ និងរស់រវើកនៅទីក្រុង តាមរយៈការធានាឲ្យបានភាពស្អាត និងបៃតង គឺកម្ពុជាស្អាត កម្ពុជាបៃតង ទម្លាប់នៃភាពស្អាត ទាំងលំនៅដ្ឋានស្អាត ភូមិស្អាត សង្កាត់ស្អាត ដែលផ្តើមចេញពីយើងទាំងអស់គ្នា» ៕ ស តារា
