សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង ៖ ថ្ងៃទី២៩ ខែមេសា ឆ្នាំ២០២០ ក្រុមការងារក្រសួងធនធានទឹក និងឧតុនិយម បានដឹកនាំមន្ត្រីបច្ចេកទេស ចុះពិនិត្យការងារ ជួសជុលប្រព័ន្ធធារាសាស្រ្តនៅខេត្តព្រៃវែង និងខេត្តកំពង់ចាម។
បើតាមហ្វេសប៊ុកក្រសួងធនធានទឹក និងឧតុនិយម នៅថ្ងៃពុធ ៨កើត ខែពិសាខ ឆ្នាំជូត ទោស័ក ព.ស ២៥៦៣ ត្រូវនឹងថ្ងៃទី២៩ ខែមេសា ឆ្នាំ២០២០ បានឱ្យដឹងថា លោក ថាំង វីយុទ្ធដា ប្រធាននាយកដ្ឋានធារាសាស្ត្រកសិកម្ម នៃក្រសួងធនធានទឹក និងឧតុនិយម បានដឹកនាំមន្ត្រីបច្ចេកទេសចុះពិនិត្យ ការងារជួសជុលខួបប្រព័ន្ធធារាសាស្រ្តកញ្ចំ មានទីតាំងស្ថិតនៅ ក្នុងឃុំកញ្ចំ ស្រុកពារាំងខេត្តព្រៃវែង។
ប្រព័ន្ធធារាសាស្រ្តកញ្ចំ យកប្រភពទឹកពីផ្ទៃរងទឹកភ្លៀងក្នុងតំបន់ និងពីទន្លេតូចតាមព្រែករំលិចកញ្ចំ និងរំលិចដូង។ នៅក្នុងឆ្នាំ២០១៨ ប្រឡាយមេកញ្ចំបានទទួលរងនូវការខូចខាតយ៉ាងខ្លាំងដោយសារទឹកជំនន់ ដែលបង្កឲ្យប្រព័ន្ធនេះមិនអាចដំណើរការស្រោចស្រពបាន ដោយស្ថានភាពនៃប្រព័ន្ធខូចខាតយ៉ាងធ្ងន់ធ្ងរ ពីមួយឆ្នាំទៅមួយឆ្នាំ តម្រូវឱ្យមានការជួសជុលខួបលើប្រព័ន្ធធារាសាស្ត្រកញ្ចំនេះ ដើម្បីធានាការទ្រទ្រង់ដោយនិរន្តរភាព នៃផលិតផលស្រូវនៅក្នុងគម្រោងប្រព័ន្ធធារាសាស្ត្រ បង្កើនទំនុកចិត្តដល់កសិករ និងអ្នកពាក់ព័ន្ធ ដើម្បីប្រើប្រាស់ និងវិនិយោគនៅក្នុងការអភិវឌ្ឍប្រព័ន្ធដីស្រែ កាត់បន្ថយទំនាស់ការបង្ហូរទឹក តាមប្រព័ន្ធស្រោចស្រពរវាងអ្នកប្រើប្រាស់ទឹក។
ក្នុងទំហំការងាររួមមានដូចជា៖ ជួសជុលប្រឡាយមេប្រវែង៣.៦០០ម៉ែត្រ។ ជួសជុលសំណង់ទ្វារទឹក(ទ្វារ៣)០២កន្លែង។ ជួសជុលសំណង់ស្ទាក់ទឹក(ទ្វារ២)០១កន្លែង។ ជួសជុលសំណង់លូរំដោះទឹក២០កន្លែង។ ជួសជុលសំណង់ស្ពាន(លូជ្រុង១ជូរ)០១កន្លែង និងសាងសង់សំណង់បង្ហៀរប្រវែង ១៥ម៉ែត្រ ០១កន្លែង។
នៅថ្ងៃដែលនេះលោកឈា ប៊ុនរិទ្ធ អគ្គនាយកកិច្ចការបច្ចេកទេសក្រសួងធនធានទឹក និងឧតុនិយម អមដំណើរដោយមន្ត្រីជំនាញ និងលោកអ៊ុន ចាន់ដា អភិបាលនៃគណ:អភិបាលខេត្តកំពង់ចាមអភិបាលរងខេត្ត មន្ទីរជំនាញ រួមជាមួយអាជ្ញាធរស្រុកព្រៃឈរ និងស្រុកជើងព្រៃ បានចុះពិនិត្យការងារជួសជុលទំនប់អាងទឹកតំបន់ ស្ថិតនៅក្នុងឃុំសំរោង ស្រុកព្រៃឈរ និងឃុំព្រៃចារ ស្រុកជើងព្រៃ ប្រភពទឹកទន្លេមេគង្គ។
សូមជម្រាបជូនថា ទំនប់អាងទឹកនេះមានលទ្ធភាពរក្សាទឹកទុកបានចំនួន ១៣លានម៉ែត្រគូប សម្រាប់ធ្វើការស្រោចស្រពជូនបងប្អូនប្រជាពលរដ្ឋចំនួន ១០ភូមិ ស្មើនឹង ៣២១៣គ្រួសារ លើផ្ទៃដី បង្កបង្កើនផលស្រូវរដូវវស្សាចំនួន ៤៩២ហិកតា ស្រូវរដូវប្រាំងចំនួន ១២៥០ហិកតា និងដំណាំរួមផ្សំចំនួន ៤០ហិកតា។
ក្នុងទំហំការងារជួសជុលអាងទឹកទំនប់តំបន់រួមមាន៖ ១-ជួសជុលទំនប់អាងទឹកតំបន់ប្រវែង៣៩០០ម៉ែត្រ។ ២-ជួសជុលសំណង់ទ្វារទឹក (ទ្វារ៤)ចំនួន ០១កន្លែងលើទំនប់អាង ទឹកតំបន់ និង៣-ជួសជុលសំណង់ទ្វារទឹក (ទ្វារ៣)ចំនួន ០២កន្លែងលើទំនប់អាងទឹកតំបន់ ៕ដោយ៖ហេង សូរិយា
