សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ សារព័ត៌មានថៃ Bangkok Post នៅថ្ងៃសុក្រ ទី២៨ ខែឧសភា ឆ្នាំ២០២១នេះ បានដកស្រង់ចេញផ្សាយពីក្រសួងសុខាភិបាលថៃ បានរាយការណ៍ថា ក្នុងរយៈពេល ២៤ម៉ោងចុងក្រោយនេះ អាជ្ញាធរមូលដ្ឋានរកឃើញ ករណីឆ្លងថ្មីៗនៃជំងឺ COVID-19 ចំនួន ៣,៧៥៩ករណីបន្ថែមទៀត ខណៈចំនួនករណីស្លាប់វិញ គឺបានធ្លាក់ចុះវិញបន្តិច បើធៀបនឹងប៉ុន្មានថ្ងៃមុននេះ។
ក្រសួងសុខាភិបាលថៃ បានរាយការណ៍បន្ថែមថា ក្រោយការរកឃើញករណីឆ្លងថ្មីៗខាងលើនេះ ក៏បានរាយការណ៍ពីតួលេខអ្នកស្លាប់ចំនួន ៣៤នាក់ផងដែរ។ ក្នុងចំណោមករណីឆ្លងថ្មីៗខាងលើនេះ មាន ១,២៩៤នាក់ជាករណីឆ្លងក្នុងពន្ធនាគារ។ ចំណែកឯអ្នកជំងឺជិត ៣,០០០នាក់ បានជាសះស្បើយ និងត្រូវបានអនុញ្ញាតឱ្យចាកចេញពីមន្ទីរពេទ្យ។
ប្រភពដដែល បន្តថា បើគិតចាប់តាំងពីជំងឺ COVID-19 បានឆ្លងរីករាលដាលចូលមកដល់ជាលើកដំបូង កាលពីដើមឆ្នាំ២០២០ រហូតមកទល់ពេលនេះ ប្រទេសថៃបានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេស ១៤៤,៩៧៦ករណី ក្នុងនោះមានអ្នកស្លាប់ ៩៥៤នាក់ និងអ្នកជាសះស្បើយជាង ៩៧,៨៧២នាក់។
ដោយឡែក គិតត្រឹមថ្ងៃទី២៧ ខែឧសភា ឆ្នាំ២០២១ម្សិលមិញនេះ សម្រាប់យុទ្ធនាការចាក់វ៉ាក់សាំងបង្ការ COVID-19 វិញនោះ ប្រទេសថៃ ដែលមានប្រជាជនសរុបជិត ៧០លាននាក់ សម្រេចបានចំនួន ៣.២១លានដូស ក្នុងនោះប្រជាជន ២.២១លាននាក់បានចាក់ដូសដំបូង (ស្មើនឹង ៣.២% នៃចំនួនប្រជាជនសរុប) និងជិត ១លាននាក់ បានចាក់គ្រប់ដូស (១.៤% នៃចំនួនប្រជាជនសរុប)។
ជាមួយគ្នានេះ រដ្ឋាភិបាលថៃ គ្រោងនឹងចាត់វិធានការបន្ថែមទៀត ដើម្បីរក្សាការងារ និងបង្កើនការចំណាយក្នុងស្រុក ដើម្បីជួយសេដ្ឋកិច្ចប្រទេសមួយនេះ ដែលបានរងការប៉ះពាល់យ៉ាងធ្ងន់ធ្ងរ ដោយសារតែការផ្ទុះឡើង នៃជំងឺ COVID-19។ ខណៈប្រទេសដែលពឹងផ្អែកលើវិស័យទេសចរណ៍មួយនេះ បាននឹងកំពុងតស៊ូជាមួយនឹងរលកទី៣ នៃការឆ្លងជំងឺ COVID-19 ដែលវាមានចំនួនស្មើជាង៨០ភាគរយ នៃចំនួនករណីឆ្លង និងករណីស្លាប់សរុប។
បើតាមសម្តីលោក Danucha Pichayanan ប្រធានក្រុមប្រឹក្សាសេដ្ឋកិច្ចជាតិ និងអភិវឌ្ឍន៍សង្គម បានគូសបញ្ជាក់យ៉ាងដូច្នេះថា៖«យើងចាំបាច់ត្រូវមានអ៊ុកស៊ីសែនគ្រប់គ្រាន់ សម្រាប់វិស័យអាជីវកម្ម ក្នុងការបន្តទៅមុខ…និងដើម្បីរក្សាការចំណាយនៅកម្រិតធម្មតា»។ លោក បន្តថា «យើងអាចស្រោចស្រង់បាន ប្រសិនបើយើងជួយគ្នាទៅវិញទៅមក»។
លោកបានលើកឡើង ដោយមិនផ្តល់ព័ត៌មានលម្អិតថា វិធានការណ៍ ដែលត្រូវបានរៀបចំនោះ រួមមាន ការរក្សាការងារនៅក្រុមហ៊ុនតូចៗ និងជួយដល់វិស័យទេសចរណ៍ ដែលរងគ្រោះដោយសារការផ្ទុះឡើងនៃជំងឺ។
លោកប្រធានក្រុមប្រឹក្សាសេដ្ឋកិច្ចជាតិរូបនេះ បានបញ្ជាក់ទៀតថា ទេសចរណ៍ថៃ មិនអាចវិលត្រឡប់មកធម្មតាវិញនោះទេ លុះត្រាដល់ឆ្នាំ២០២៦, ដែលបានប៉ះពាល់ដល់កម្មករជាង៧លាននាក់, ខណៈអត្រាភាពគ្មានការងារធ្វើ នៅក្នុងប្រទេស បានកើនឡើងខ្ពស់ ក្នុងរយៈពេល១២ឆ្នាំ នៅក្នុងត្រីមាសដំបូងឆ្នាំនេះ។ បន្ថែមពីនេះ លោកបន្តថា វិធានការថ្មី នឹងត្រូវគាំទ្រហិរញ្ញវត្ថុ ដោយប្រាក់កម្ចីថ្មី៥០០ពាន់លានបាត (១៦ពាន់លានដុល្លារ), ដែលអនុម័តដោយព្រះមហាក្សត្រថៃ កាលពីដើមសប្តាហ៍នេះ។
គួររំលឹកថា រដ្ឋាភិបាលថៃ កាលពីពេលកន្លងទៅនេះ បានដាក់ចេញវិធានការណ៍ជំរុញ ដែលមានទឹកប្រាក់រាប់ពាន់លានដុល្លារ ដើម្បីកាត់បន្ថយផលប៉ះពាល់ នៃការផ្ទុះឡើងពីជំងឺ COVID-19 រួមមានការផ្ទេរសាច់ប្រាក់, ឧបត្ថម្ភធន, ប្រាក់កម្ចីគ្មានការប្រាក់ និងការគាំទ្រការជួលការងារ៕ដោយ៖ស តារា
រូបភាព៖ឯកសារ
