សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ មន្ត្រី នគរបាល ខេត្តព្រះសីហនុបានឲ្យដឹងថា៖ នៅថ្ងៃចន្ទ ៥កើត ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១៩ ខែកុម្ភៈ ឆ្នាំ២០១៨ វេលាម៉ោង១៥និង៣០នាទី លើវិថីផែ ចំណោត លោកយាយម៉ៅ ស្ថិតនៅក្នុងភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ មានគ្រោះថ្នាក់ចរាចរណ៍មួយកើតឡើង បង្កដោយខ្លួនឯង រថយន្តបែនដឹកដីខ្សាច់១គ្រឿងម៉ាក HYUNDAI ពណ៌ស ពាក់ផ្លាកលេខ ស្វាយរៀង 3A-0384 បើកបរ ដោយឈ្មោះ វិបុល កុសល អាយុ25ឆ្នាំ បច្ចុប្បន្នរស់នៅ ឃុំកំពេញ ស្រុក ស្ទឹងហាវ ខេត្តព្រះសីហនុ (ស្លាប់) មាន ទិសដៅពីឃ្លាំងលើ ឆ្ពោះមកកែងរ៉ា ដល់ចំណុចខាងលើ ផ្លូវចុះចំណោតខ្លាំង ហ្វ្រាំងមិនជាប់ រថយន្តក៏បានរេចង្កូតមកខាងឆ្វេងបុកនឹងរបាំងពុះចែកទ្រូងផ្លូវ ពេលនោះ អ្នកបើកបរ បានលោតចេញពីក្នុងរថយន្តធ្លាក់ចូលប្រឡាយទឹកចិញ្ចើមថ្នល់ បណ្តាលឲ្យបោកក្បាលស្លាប់ នៅនឹងកន្លែងកើតហេតុ។
ចំណែកសាកសពត្រូវបាន សមត្តកិច្ចដឹក ទៅតំកល់ទុកនៅវត្តឥន្ទញ្ញាណ ហៅ វត្តក្រោម ដើម្បីរង់ចាំក្រុមគ្រួសារ មកទទួលយកទៅធ្វើបុណ្យ។ ចំណែករថយន្តគ្រោះថ្នាក់នេះ សមត្ថកិច្ចកំពុងចាត់ចែងស្ទូចយកទៅរក្សាទុកនៅការិយាល័យផ្លូវគោក ៕ ឆ្លាម សមុទ្រ
