សារព័ត៌មាន នគរវត្ត តែងតែនាំមុខគេជានិច្ច
ក្នុងនាមប្រជាពលរដ្ឋម្នាក់ ខ្ញុំបាទកត់សម្គាល់ឃើញថា ស្ថាប័នកាំកុងត្រូល តែងតែចុះពិនិត្យការលក់ប្រេងនៅតាមស្ថានីយប្រេងនានាស្ទើរទូទាំងប្រទេស ។ ភាគរយនៃអ្នកលក់ប្រេងតាមស្ថានីយច្រើនលើសលប់ គឺមិនគ្រប់ចំណុះនោះឡើយ ។ មន្ត្រីកាំកុងត្រូលបានត្រឹមអប់រំ ណែនាំដោយមិនបានផ្តន្ទាទោសចំពោះអ្នក«លួច» ចំណុះប្រេងនោះឡើយ ។ ក្នុងន័យនេះ ខ្ញុំបាទយល់ថា បទល្មើសដូចគ្នា គឺ«លួច» ប៉ុន្តែអ្នកលួចចំណុះប្រេងគ្មានទោសនោះឡើយ ។ បើតាមខ្ញុំបាទយល់ អ្នកដែលប្រព្រឹត្តល្មើសបែបនេះ គួរតែមានទោស ដូចទៅអ្នកប្រព្រឹត្តល្មើសបទលួចដទៃទៀត ។
ខ្ញុំបាទយល់ថា ការដែលអប់រំចំពោះជនដែលលួចចំណុះប្រេង ពោលគឺលក់ប្រេងមិនគ្រប់លីត្រ មិនគ្រប់គ្រាន់នោះឡើយ ។ ផ្ទុយទៅវិញ គឺត្រូវផ្តន្ទាទោសដូចទៅនឹងអ្នកលួចដទៃទៀត ទើបពួកគេរាងចាល ។ បានជាថា ដូច្នេះ ពីព្រោះ តាមការសង្កេត មន្ត្រីកាំកុងត្រូល រកឃើញស្ថានីយប្រេងខ្លះ បន្តលក់ប្រេងមិនគ្រប់ចំណុះ បើទោះបីជាទទួលបានការអប់រំ ទូន្មានពីមន្ត្រីកាំកុងត្រូលម្តងជាពីរដងរួចហើយក៏ដោយ ។ ស្ថានីយប្រេងស្ទើរទូទាំងប្រទេស សុទ្ធតែលក់ប្រេងមិនគ្រប់ចំណុះ ។ នៅតាមបណ្តោយផ្លូវជាតិលេខ២ និងលេខ៣ក្នុងខេត្តតាកែវ សមត្ថកិច្ចកាំកុងត្រូលរកឃើញស្ថានីយប្រេងលក់ប្រេងមិនគ្រប់ចំណុះរហូតដល់១០០លីត្រ បាត់ពី៧ទៅ៩លីត្រ ។ វាជារឿងដែលហួសហេតុ ពីព្រោះក្រៅពីលួចចំណុះហើយនោះ ក៏នៅមានអ្នកបន្លំគុណភាពថែមទៀត ។ រឿងបែបនេះ គឺមានច្រើនណាស់ មិនថា តែស្ថានីយប្រេងនៅខេត្តតាកែវនោះទេ ។
បើតាមយោបល់ខ្ញុំបាទ ស្ថាប័នកាំកុងត្រូលអាចអប់រំ ណែនាំចំពោះស្ថានីយប្រេងណា ដែលប្រព្រឹត្តខុសជាលើកទី១ ប៉ុន្តែបើនៅតែបន្តខុសដោយ«លួច»ជាលើកទី២ ត្រូវផ្តន្ទាទោសតាមច្បាប់ឲ្យខាងតែបាន ។ បើមិនដូច្នោះទេគ្រាន់តែក្រុមមន្ត្រីកាំកុងត្រូលដកម៉ាស៊ីនត្រួតពិនិត្យចេញភ្លាម ម្ចាស់ស្ថានីយប្រេងទាំងនោះ នឹងបន្ត«លួច» ចំណុះ និងគុណភាពប្រេងវិញដដែល ។ មន្ត្រីស្ថាប័នជំនាញខ្លះ គ្រាន់តែអូសម៉ាស៊ីនទៅជាការព្រមានឲ្យម្ចាស់ស្ថានីយប្រេង មកជួបខ្លួនដើម្បីប្រយោជន៍ណាមួយ ក៏មាន ។ ដូច្នេះបញ្ហា នៃការ«លួច» ចំណុះប្រេង តម្រូវឲ្យមានវិធានការក្តៅ ទើបអាចមានប្រសិទ្ធភាពទៅថ្ងៃក្រោយ ។ និយាយរួមទៅ បទល្មើសនៃការ«លួច» គួរតែត្រូវផ្តន្ទាទោសឲ្យស្មើៗគ្នា មិនមែនអ្នកលួចចំណុះប្រេង បានលុយធ្វើជាអ្នកមានបានដោយស្រួល ហើយគ្មានទោសនោះទេ ៕ ប្រជាពលរដ្ឋម្នាក់
