សារព័ត៌មាន នគរវត្ត តែងតែនាំមុខគេជានិច្ច
បន្ទាប់ពិធីបុណ្យភ្ជុំបិណ្ឌរួច សំរាមនៅរាជធានីភ្នំពេញនៅតែមិនត្រូវបានដោះស្រាយឲ្យបានជ្រះស្រឡះ ពោលគឺកណ្តាលរាជធានីភ្នំពេញនៅតែមានសំរាមកកស្ទះ ព្រោះតែការមិនចុះមកប្រមូលឲ្យទាន់ពេលវេលាតាមកាលកំណត់ ។ នៅតាមផ្លូវតូចៗ សំរាមត្រូវបានគរចោលទុកយូរច្រើនថ្ងៃ ។ នៅពេលដែលយើងខ្ញុំជាប្រជាពលរដ្ឋសួរនាំទៅខាងកម្មករប្រមូលសំរាមក្រុមហ៊ុនស៊ីនទ្រីគេឆ្លើយថា ដោយសារមិនមានកន្លែងចាក់សំរាម ពោលគឺបញ្ហាទីតាំងចាក់សំរាមមិនទាន់ត្រូវបានដោះស្រាយនៅឡើយ ។ ម្យ៉ាងទៀតបញ្ហាតម្លៃប្រមូលសំរាម ក៏មិនទាន់បានព្រមព្រៀងជាផ្លូវការនៅឡើយ ។
ក្នុងនាមប្រជាពលរដ្ឋម្នាក់ មើលឃើញថា អាជ្ញាធរត្រូវឈានមុខដោះស្រាយបញ្ហាសំរាមនេះឲ្យបានលឿនបំផុត ពីព្រោះសំរាមប្រសិនបើត្រូវទុកចោលលើសកាលកំណត់តែមួយម៉ោងឬពីរម៉ោង វានឹងបណ្តាលឲ្យរលួយចេញដង្កូវជាមិនខាន ។ នៅពេលដែលមានបញ្ហាសំរាមកើតឡើង អាជ្ញាធរតែងតែទម្លាក់កំហុសមកលើប្រជាពលរដ្ឋ ប៉ុន្តែមិនបានមើលការខកខាន ឬចំណុចខុសឆ្គងរបស់ក្រុមហ៊ុនប្រមូលសំរាមនោះឡើយ ។ បច្ចុប្បន្នបញ្ហាចោទ មិនមែនប្រជាពលរដ្ឋនោះទេ ប៉ុន្តែគឺដោយសារក្រុមហ៊ុនប្រមូលសំរាមមិនចុះមកប្រមូលឲ្យបានទៀងទាត់តាមវេលាកំណត់របស់ខ្លួន ហើយពេលខ្លះប្រជាពលរដ្ឋបង្ខំចិត្តយកសំរាមទៅគរនៅមុខផ្ទះ ដែលពេលខ្លះសំរាមទុកយូរបង្កឲ្យមានដង្កូវ និងជះក្លិនស្អុយគួរឲ្យអសោចិ៍ ។
វាមិនមែនជារឿងថ្មីនោះទេ ប៉ុន្តែអាជ្ញាធរហាក់ដូចជាមិនបានយកចិត្តទុកដាក់ឲ្យពេញលេញចំពោះបញ្ហាសំរាមនេះ ។ នៅក្នុងរាជធានីភ្នំពេញ មួយថ្ងៃៗសំរាមរាប់ពាន់តោន ដូច្នេះនៅពេលដែលខកខានការដឹកជញ្ជូនតែមួយថ្ងៃ ធ្វើឲ្យសំរាមកកស្ទះពេញទីក្រុង ។ សាកគិតមើលទៅថា នៅពេលដែលសំរាមកកស្ទះ វានឹងមានបញ្ហាអ្វីកើតឡើង ។ អាជ្ញាធរត្រូវមានវិធានការជាក់លាក់ជាមួយក្រុមហ៊ុនប្រមូលសំរាម បើទោះបីជាត្រូវកែប្រែសេវានៃការដឹកជញ្ជូនយ៉ាងណាក៏ដោយ ។ បើតាមមើលទិដ្ឋភាពជាក់ស្តែង បច្ចុប្បន្ននេះ ទំហំសំរាមមានការកើនឡើង ប៉ុន្តែសេវានៃការដឹកជញ្ជូនមិនបានកើនឡើងនោះទេ ។ រថយន្តចាស់ៗ ដែលសល់ជាយូរមកហើយ នៅតែបន្តប្រើប្រាស់ក្នុងពេលដែលកម្មករភាគច្រើនមានការថ្នាំងថ្នាក់ចំពោះបញ្ហាប្រាក់ខែ ។
ក្នុងនាមប្រជាពលរដ្ឋម្នាក់ ថ្មីៗលេចឮអំពីព័ត៌មានស្តីអំពីដំឡើងប្រាក់សេវាដឹកជញ្ជូនសំរាមបន្ថែមទៀត ។ បច្ចុប្បន្នសេវាប្រមូលសំរាមក្នុងផ្ទះមួយល្វែង ដែលមិនប្រកបរបររកស៊ីអ្វីសោះ តម្លៃ៤ពាន់រៀល ឬ១ដុល្លារ ។ ឥឡូវនេះផែនការនៃការប្រមូលសំរាមបានឡើងថ្លៃជាង៣ដង ពោលគឺជាង១ម៉ឺន២ពាន់រៀល ។ តើមានទេការឡើងថ្លៃសេវាប្រមូលសំរាមរហូតដល់ជាង៣ដងយ៉ាងដូច្នេះ? តើធានាបានទេនៃសេវាប្រមូលសំរាមទៀងទាត់មិនកកស្ទះដូចសព្វថ្ងៃ ក្រោយការដំឡើងថ្លៃប្រមូលសំរាមហើយនោះ ។ អាជ្ញាធរទំនងជាគិតថា សំរាមជារឿងកំប៉ិកកំប៉ុក ប៉ុន្តែវាមិនយ៉ាងដូច្នោះឡើយ បច្ចុប្បន្ននេះ សំរាមនៅតែគរតាមផ្លូវតូចៗ ព្រោះតែក្រុមហ៊ុនជាង៉កចង់ឡើងថ្លៃប្រមូលសំរាមនោះហើយមើលទៅ ។ យ៉ាងណាក៏ដោយ វានៅតែជាការសម្រេចចិត្តរបស់អាជ្ញាធរមានសមត្ថកិច្ចនិងក្រុមហ៊ុន ប៉ុន្តែបើឡើងថ្លៃហួសហេតុពេក អាចនឹងមានប្រតិកម្មពីប្រជាពលរដ្ឋ ៕ ប្រជាពលរដ្ឋម្នាក់
