សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រុមចោរធ្វើសកម្មភាពវាយប្លន់ស្ត្រីអ្នកលក់បន្លែម្នាក់បានសម្រេចយកលុយអស់មួយលានបីសែនរៀល (១.៣០០.០០០រៀល) រួចនាំគ្នាជិះម៉ូតូគេចខ្លួនបាត់ស្រមោលតែ បន្សល់ម៉ូតូជនសង្ស័យមួយគ្រឿងនៅកន្លែងកើតហេតុ។
ហេតុការណ៍នេះបានកើតឡើងកាលពីម៉ោង០៤និង៣០នាទីទាបភ្លឺថ្ងៃទី៣ ខែមិថុនាឆ្នាំ២០២០ នៅចំណុចស្ពានថ្មតាមបណ្តោយផ្លូវបេតុង ភូមិកោះនរា សង្កាត់និរោធ ខណ្ឌច្បាអំពៅ រាជធានីភ្នំពេញ។
សមត្ថកិច្ចបានឲ្យដឹងថាស្ត្រីរងគ្រោះមានឈ្មោះ ហន ហៀង អាយុ៣៣ឆ្នាំ មុខរបរលក់បន្លែ ជិះម៉ូតូហុងហុងដាវ៉េវ ពណ៌ខ្មៅលាយក្រហម ពាក់ស្លាកលេខភ្នំពេញ1DD-3264 ។
ចំណែកឯម៉ូតូ ក្រុមជនសង្ស័យដែលបន្សល់ទុកនៅកន្លែងកើតហេតុម៉ាកsuzuki Let ពណ៌ទឹកប្រាក់លាយទឹកមាស ពាក់ស្លាកលេខ បាត់ដំបង1A-4678 ។
ប្រភពព័ត៌មានពីជនរងគ្រោះបានឲ្យដឹងថា មុនកើតហេតុរូបគាត់បានបើកម៉ូតូចេញពីផ្ទះក្នុងគោលបំណងទៅទិញបន្លែនៅផ្សារច្បារអំពៅ យកមកលក់ ដោយដាក់លុយក្នុងកាបូបចំនួន១លាន៣សែនរៀល(១.៣០០.០០០) និងទូរស័ព្ទដៃមួយគ្រឿងម៉ាកសាមសុង បានបើកម៉ូតូតាមបណ្តោយផ្លូវបេតុង (កោះនរា) ខណៈមកដល់ចំណុចកើតហេតុស្រាប់តែមានក្រុមជនសង្ស័យបើកម៉ូតូមកជិតគាត់រួចយកមួកសុវត្ថិភាពវាយមកលើគាត់។
ស្ត្រីរងគ្រោះបានបន្តទៀតថា ភ្លាមៗនោះរូបគាត់បានស្រែក ចោរៗ ពេលនោះជនសង្ស័យម្នាក់បានទាញកាបូប របស់គាត់ដែលដាក់ទាក់នឹង.កម៉ូតូបណ្ដាលឱ្យដួលរងរបួសរលាត់ដៃជើង ព្រមទាំងដួលម៉ូតូរបស់ជនសង្ស័យផងដែរ ហើយជនសង្ស័យវាយគាត់នឹងមួកសុវត្ថិភាពបន្ថែមទៀត ខណៈពេលនោះក៏មានប្រជាពលរដ្ឋបានចេញមកច្រើន ឃើញហេតុការមិនស្រួលជនសង្ស័យភ័យពេកបានរត់ឡើងជិះម៉ូតូបក្ខពួករបស់គេ ព្រមទាំងយកកាបូបលុយរបស់គាត់ទៅជាមួយផងដែរ គេចខ្លួនបាត់ដោយសុវត្ថិភាព ដោយបន្សល់ទុកម៉ូតូមួយគ្រឿង ។
បន្ទាប់ពីសមត្ថកិច្ចបានយកម៉ូតូជនសង្ស័យ និងឱ្យជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលនិរោធ ដើម្បីស្វែងរកចាប់ខ្លួនជនសង្ស័យយកមកផ្តន្ទាទោសទៅតាមច្បាប់ ៕ជ្រោយពេជ្រ
