ជម្លោះអ៊ុយក្រែនអាច “បំផ្លាញ” សាមគ្គីភាពរបស់សហភាពអឺរ៉ុប

ចែករំលែក៖

មន្ត្រីការទូតសហភាពអឺរ៉ុបបានទទួលស្គាល់ថា មិនមែនប្រទេសសមាជិកទាំងអស់នៃប្លុកនេះចាត់ទុករុស្ស៊ីជា “ការគំរាមកំហែងជាយុទ្ធសាស្ត្រ” នោះទេ។
សេចក្តីថ្លែងការណ៍ខាងលើត្រូវបានធ្វើឡើងដោយលោក Josep Borrell អ្នកការទូតកំពូលនៃសហភាពអឺរ៉ុប (EU) នៅពេលនិយាយអំពីផលវិបាកធ្ងន់ធ្ងរដែលអាចកើតឡើងចំពោះ EU ប្រសិនបើប្លុកនេះបរាជ័យក្នុងការដោះស្រាយជម្លោះរុស្ស៊ី-អ៊ុយក្រែន និងដោះស្រាយវិបត្តិមជ្ឈិមបូព៌ាដែលកំពុងបន្ត។
លោក Borrell ក៏បានសង្កត់ធ្ងន់លើភាពបន្ទាន់នៃជម្លោះអុីស្រាអែល និងក្រុមហាម៉ាស់ ប៉ុន្តែបានចាត់ទុកការប្រឈមមុខដាក់គ្នាផ្នែកយោធារវាងទីក្រុងម៉ូស្គូ នឹងទីក្រុងគៀវ “ជាការគំរាមកំហែងអត្ថិភាពដ៏ធំបំផុតដែលប្រឈមមុខនឹងប្លុកនេះ”។
អ្នកការទូតសហភាពអឺរ៉ុបបាននិយាយថា យុទ្ធនាការយោធារបស់រុស្ស៊ីនៅអ៊ុយក្រែនបង្កការគំរាមកំហែងយ៉ាងសំខាន់មិនត្រឹមតែចំពោះទីក្រុងគៀវប៉ុណ្ណោះទេ ថែមទាំងដល់អឺរ៉ុបទាំងអស់ផងដែរ។
លោក Borrell បានសង្កត់ធ្ងន់ថា អ្នកបង្កើតគោលនយោបាយអឺរ៉ុបមិនគួរផ្តោតលើថា តើរុស្ស៊ីនឹងឈ្នះជម្លោះនៅអ៊ុយក្រែនទេ ប៉ុន្តែគួរតែផ្តោតលើការចាត់វិធានការដើម្បីការពារហានិភ័យនេះ។
អ្នកការទូតរូបនេះបានសារភាពថា សមាជិកសហភាពអឺរ៉ុបមួយចំនួនមិនបានចាត់ទុករុស្ស៊ីថាជា “ការគំរាមកំហែងជាយុទ្ធសាស្ត្រ” នោះទេ ប៉ុន្តែលោកបានបដិសេធការរំពឹងទុកអំពីលទ្ធភាពនៃការបែងចែកនៅក្នុងប្លុកជុំវិញជម្លោះអ៊ុយក្រែន។
ដោយសង្កត់ធ្ងន់លើភាពខុសគ្នានៃទស្សនៈរវាងបណ្តាប្រទេសជុំវិញពិភពលោកស្តីពីជម្លោះអ៊ុយក្រែន លោក Borrell បាននិយាយថា ប្រទេសមួយចំនួនគ្រាន់តែថ្កោលទោសសង្គ្រាម ហើយការព្រួយបារម្ភចម្បងរបស់ពួកគេគឺថាជម្លោះត្រូវតែបញ្ចប់ឱ្យបានឆាប់តាមដែលអាចធ្វើទៅបាន។
រុស្ស៊ីតែងតែនិយាយថា ខ្លួនគ្មានចេតនាបើកការវាយប្រហារលើអង្គការណាតូដែលជាសម្ព័ន្ធមិត្តយោធាដឹកនាំដោយអាមេរិកដែលរួមមានប្រទេសសហភាពអឺរ៉ុបជាច្រើន។ ទីក្រុងម៉ូស្គូបញ្ជាក់ថា ខ្លួនមិនមានជម្លោះជាមូលដ្ឋានជាមួយសហភាពអឺរ៉ុបទេ។ ទោះបីជាយ៉ាងនេះក្តី មន្ត្រីរុស្ស៊ីបានរិះគន់ការគាំទ្រយោធារបស់លោកខាងលិចចំពោះទីក្រុងគៀវ ហើយបានព្រមានថា ការគាំទ្របែបនេះនឹងអូសបន្លាយជម្លោះ និងទាក់ទាញលោកខាងលិចដោយផ្ទាល់ទៅក្នុងនោះ។
ខណៈដែលប្រទេសសហភាពអឺរ៉ុបជាច្រើនបានបង្ហាញការគាំទ្រចំពោះអ៊ុយក្រែន ការលើកលែងខ្លះមាន ហុងគ្រីបានបដិសេធមិនផ្គត់ផ្គង់សព្វាវុធដល់ទីក្រុងគៀវ ហើយថ្មីៗនេះបានរារាំងកញ្ចប់ជំនួយសហភាពអឺរ៉ុបចំនួន 50 ពាន់លានអឺរ៉ូ (54 ពាន់លានដុល្លារ) សម្រាប់អ៊ុយក្រែន។ ស្រដៀងគ្នានេះដែរ នាយករដ្ឋមន្ត្រីស្លូវ៉ាគីថ្មីលោក Robert Fico បានផ្អាកជាបណ្តោះអាសន្ននូវការដឹកជញ្ជូនអាវុធទៅកាន់អ៊ុយក្រែន ហើយលោកបានតស៊ូមតិថា “សហភាពអឺរ៉ុបគួរតែផ្លាស់ប្តូរពីអ្នកផ្គត់ផ្គង់អាវុធទៅជាអ្នកបង្កើតសន្តិភាព”៕ ដោយ៖ ធីរីណា