សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី ៖ ជនជាតិវៀតណាម២៦នាក់ដែលចូលមកជីកកកាយយករ៉ែមាសខុសច្បាប់ដែលកម្លាំងចម្រុះខេត្តរតនគិរីធ្វើការបង្ក្រាបនិងឃាត់ខ្លួនរួមទាំងសម្ភារគ្រឿងចក្រជាច្រើនគ្រឿងទៀតផងនោះត្រូវបានសមត្ថកិច្ចចម្រុះសម្រេចដោះលែងនិងបណ្តេញចេញឲ្យទៅប្រទេសវៀតណាមវិញហើយ។
ការបណ្តេញចេញជនជាតិវៀតណាម២៦នាក់ដែលចូលមកជីកកកាយយករ៉ែមាសខុសច្បាប់ដែលស្ថិតនៅតំបន់កន្ទុយនាគក្នុងភូមិសាស្ត្រ ស្រុកតាវែង ខេត្តរតនគិរីនោះសមត្ថកិច្ចបានសម្រេចឲ្យចេញតាមច្រកទ្វារអន្តរជាតិអូរយ៉ាដាវនៅព្រឹកថ្ងៃទី១២ ខែមីនាឆ្នាំ២០២៤។
ជនអន្តោប្រវេសន៍វៀតណាមជីកយក រ៉ែមាសខុសច្បាប់ដែលត្រូវបានកម្លាំងចម្រុះចុះបង្ក្រាបដឹកនាំដោយលោក ម៉ា វិចត្រ អភិបាលរងខេត្ដ សម្របសម្រួលនីតិវិធីដោយព្រះរាជអាជ្ញារងអមសាលាដំបូងខេត្តបានធ្វើឡើងនៅថ្ងៃទី៧ខែមីនា ឆ្នាំ២០២៤កម្លាំងប្រដាប់អាវុធទាំង៣ប្រភេទរួមនិងមន្ត្រីឧទ្យានជាតិ មន្ត្រីរ៉ែនិងថាមពលខេត្ត មន្ត្រីខណ្ឌរដ្ឋបាលព្រៃឈើខេត្ត អភិបាលស្រុកតាវែងរួមនិងមន្ត្រីពាក់ព័ន្ធមួយចំនួនទៀត ដោយប្រើប្រាស់អស់ពេលចំនួន៤ថ្ងៃទើបធ្វើកិច្ចការនោះបានជោគជ័យ។
ហើយនៅថ្ងៃទី១០ខែមីនាឆ្នាំ២០២៤នោះជនសង្ស័យទាំង២៦នាក់ត្រូវបានកម្លាំងចម្រុះធ្វើការផ្ញើរទុកជាបណ្ដោះអាសន្ននៅអធិការដ្ឋាននគរបាលស្រុកអណ្ដូងមាសសាកសួរនិងកសាងសំណុំរឿងបញ្ជូនខ្លួនរួមទាំងភស្ដុតាងមកសាលាដំបូងខេត្ត។
ក្រុមការងារចម្រុះខេត្តរតនគិរីដែលដឹកនាំដោយលោក ម៉ា វិចិត្រ អភិបាលរងខេត្ត និងក្រោមការសម្របសម្រួលនីតិវិធីដោយលោក កែវ ភក្តី ព្រះរាជអាជ្ញារងអមសាលាដំបូងខេត្តដែលបានចុះអង្កេតត្រួតពិនិត្យ បទល្មើសធនធានរ៉ែឃើញមានចំនួន៦ទីតាំងជាក់ស្តែងឃើញមានជនជាតិវៀតណាមចំនួន២៦នាក់(ស្រីម្នាក់)ប្រើប្រាស់បណ្ណស្នាក់នៅអចិន្ត្រៃយ៍ផុតកំណត់)ក៏ត្រូវបានពិន័យតាមផ្លូវច្បាប់ការងារធ្វើកិច្ចសន្យា និង បណ្តេញចេញទៅកាន់ប្រទេសកំណើតវិញ អនុវត្តដោយមន្ត្រីអន្តោប្រវេសន៍នៃស្នងការនគរបាលខេត្តរតនគិរី តាមច្រកទ្វារអន្តរជាតិអូរយ៉ាដាវ នៅព្រឹកថ្ងៃទី១២ ខែមីនា ឆ្នាំ២០២៤។
លោក អ៊ុង ហ៊ួរ ប្រធានមន្ទីររ៉ែ និងថាមពលខេត្ត បានឱ្យដឹងដែរថា ក្រោយពីបានពិនិត្យទីតាំងទាំង៦ខាងលើរួចមកលោកយល់ឃើញថា ក្រៅពីទីតាំងអានាធិបតេយ្យចាស់(ទីតាំងទី២) ដែលទុកចោលយូរមកហើយនោះ មានទីតាំងចំនួន៥ផ្សេងទៀតមានដូចជា ទីតាំងទី១-នៅដើមទី មានអេស្កាវ៉ាទ័រ១គ្រឿង ទើបចូលមក(ទុកចោល) ។
ទីតាំងទី៦ មានអេស្កាវ៉ាទ័រ១គ្រឿងឈូសឆាយផ្លូវ ។
ឯទីតាំងទី៣,៤,៥ កំពុងរៀបចំហេដ្ឋារចនាសម្ព័ន្ធដែលអាចឈានទៅធ្វើអាជីវកម្មមានអាជ្ញាបណ្ណ(អាជីវកម្ម) ដូចនេះក្រុមហ៊ុនមិនទាន់បានប្រតិបត្តិការនៅឡើយ ដែលជាសកម្មភាពខុសលក្ខខណ្ឌអាជ្ញាបណ្ណស្វែងរុករកត្រូវពិន័យតាមមាត្រាទី៣៦ថ្មី នៃច្បាប់ស្តីពីការគ្រប់គ្រងនិងធ្វើអាជីវកម្មធនធានរ៉ែ ។
ចំណែកឯគ្រឿងចក្រជាច្រើនគ្រឿងដែលបម្រើឲ្យជាមធ្យោបាយប្រព្រឹតបទល្មើសជីយករ៉ែមាសខុសច្បាប់នោះ នៅរក្សាទុកនៅនឹងកន្លែងប្រព្រឹត្តសកម្មភាពនោះដដែលនៅឡើយ។
ពាក់ព័ន្ធក្នុងរឿងជនជាតិវៀតណាមចំនួន២៦នាក់នេះដែរ ប្រជាពលរដ្ឋ រួមនិងមន្ត្រី មួយចំនួននៅតែទទូចសុំឲ្យក្រសួងពាក់ព័ន្ធជាពិសេសក្រសួងបរិស្ថានមេត្តាបើកការស៊ើបអង្កេតឲ្យបានស៊ីជម្រៅផង ព្រោះថាជនអន្តោប្រវេសន៍ទាំងអស់នោះបើគ្មានការឃុបឃិតគ្នាជាមួយអាជ្ញាធរមូលដ្ឋាននិងមន្ត្រីស្នាក់ការបរិស្ថាននោះទេ ពួកគេក៏មិនអាចហ៊ាននាំគ្រឿងចក្រជាច្រើនគ្រឿងចូលព្រៃឧទ្យានជាតិនិងធ្វើសកម្មភាពកាយយករ៉ែជាច្រើនថ្ងៃខែបានរលូនបែបនេះដែរ៕
ដោយ ៖ ជីវ័ន្ត
